Sen. Marcoleta, mauuna pang masampahan ng plunder kaysa kay Cong. Romualdez

ni Pablo Hernandez @Prangkahan | July 1, 2026

MAY DAHILANG MAGALIT ANG INC KASI SI CONG. ROMUALDEZ ANG INAASAHAN NILANG MAKUKULONG, PERO KA-MEMBER PA NILA NA SI SEN. MARCOLETA UNANG IPAPAKULONG – Isang araw matapos ihayag ni Ombudsman Boying Remulla na magsasampa sila ng kasong plunder laban kay Sen. Rodante Marcoleta, nagsagawa kahapon ng surpresang rally sa Edsa Shrine sa Quezon City at Liwasang Bonifacio sa Maynila ang mga miyembro ng Iglesia ni Cristo (INC).

Sa totoo lang, may punto ang galit ng mga miyembro ng INC dahil ang kaanib nilang si Sen. Marcoleta pa ang unang haharap sa kasong plunder, samantalang wala pang kaso si Leyte 1st District Rep. at dating Speaker Martin Romualdez, na ayon sa INC ay utak umano ng flood control scandal. Period!

XXX

DOBLENG KAMALASAN ANG INABOT NI MIKE DEFENSOR SA MARCOS ADMIN KASI 2 KASONG NO BAIL ANG KAHAHARAPIN NIYA – Damay si dating Cong. Mike Defensor at dalawang negosyante sa kasong plunder na isinampa laban kay Sen. Marcoleta.

Ayon sa reklamo, ang P75 milyong donasyon kay Sen. Marcoleta ay hindi umano nito idineklara sa kanyang Statement of Contributions and Expenditures (SOCE). Samantala, hindi rin umano iniulat sa Comelec ng mga donor, kabilang si Defensor, na nagbigay sila ng ganoong kalaking halaga. Ayon sa Ombudsman, maituturing itong suhol at dahil lampas sa P50 milyon ang sangkot na halaga, pasok umano ito sa kasong plunder.

Dobleng kamalasan ang sinapit ni Defensor sa ilalim ng administrasyong Marcos dahil una na siyang kinasuhan ng NBI ng non-bailable offense na human trafficking matapos umanong gamiting front ng prostitusyon ang isa sa kanyang negosyo. Ngayon, nadagdagan pa ito ng isa pang non-bailable offense na plunder. Kung mapapatunayang nagkasala sa parehong kaso, habambuhay na pagkakakulong ang maaari niyang kaharapin. Saklap!

XXX

SINO-SINONG POLITICIANS KAYA ANG HUHUBARAN NG MASKARA NI EX-DPWH SEC. BONOAN NA SANGKOT SA FLOOD CONTROL SCANDAL? – Inanunsyo rin ni Ombudsman Remulla na ang sinampahan nila ng kasong plunder na si dating Department of Public Works and Highways (DPWH) Secretary Manuel Bonoan ay gagawin nilang state witness matapos umano itong magpahayag ng kahandaang makipagtulungan sa pamahalaan at "ikanta" ang mga pulitikong tumanggap ng kickback sa umano'y flood control projects scam.

Kaya ang mga tiwaling pulitikong nakatransaksyon ni Bonoan, lagot na dahil mahuhubaran na sila ng maskara kapag ibinunyag na ng dating DPWH secretary ang kanilang mga pangalan. Abangan!

XXX

FEELING MAGAGALING ANG HOUSE PROSECUTORS PANEL, MAGPAPASAKLOLO LANG PALA SA SANGKATUTAK NA PRIVATE PROSECUTORS SA IMPEACHMENT KAY VP SARA – Nagdagdag pa ng mga private prosecutors ang House Prosecution Panel upang tumulong sa impeachment trial laban kay Vice President Sara Duterte na magsisimula sa Hulyo 6, 2026.

Hay naku, kung makapagsalita ang ilang kongresistang miyembro ng House Prosecution Panel ay parang kaygagaling. 'Yun pala, magpapasaklolo rin sa sangkatutak na private prosecutors para sa impeachment trial ni VP Sara. Boom!