Maging mapuso hindi mapusok ngayong V-Day

ni Leonida Sison @Boses | February 14, 2026

Hindi maiiwasan ang intimate romance, lalo na sa ating pinakamamahal, ngunit mahalaga na laging handa at may proteksyon sa pakikipagtalik. Ito ang paalala ng Department of Health (DOH), na iginiit na ang ligtas na pakikipagtalik ay hindi lamang pana-panahon kundi isang panghabambuhay na pananagutan. Sa gitna ng selebrasyon ng Valentine’s Day, dapat manaig ang pag-iingat kaysa damdaming padalus-dalos.

Ayon sa DOH, ang pagsasabuhay ng safe sex ay epektibong paraan upang maiwasan ang sexually transmitted infections, kabilang ang HIV, at ang hindi planadong pagbubuntis. Isa rin itong mahalagang bahagi ng responsable at makataong family planning. Ang proteksyon ay hindi hadlang sa pagmamahal; bagkus, ito ay nakatutulong para mas maging handa ang dalawang tao kapag nagbunga ang kanilang relasyon.

Partikular na pinaalalahanan ang mga nasa “dating stage” at mga hindi pa kasal na gumamit ng napatunayang proteksyon tulad ng condom, lubricants, at pre-exposure prophylaxis o PrEP. Hindi sapat ang tiwala lamang—dapat itong samahan ng konkretong hakbang para sa kaligtasan. Sa ganitong paraan, nagiging mas responsable at ligtas ang magkabilang panig.

Hindi rin pinalampas ng ahensya ang usapin ng consent at personal boundaries. Ang anumang pisikal na intimacy ay dapat nakabatay sa malinaw na pagpayag at paggalang. Ang pananaw na ito ay hindi lamang tungkol sa kalusugang pisikal, kundi pati sa dignidad at mental well-being ng bawat indibidwal. Kapag iginagalang ang hangganan, mas nagiging malusog ang relasyon at mas matibay ang tiwala.

Lalo na ngayon na tumataas ang kaso ng HIV sa bansa—may mahigit 1,400 bagong kaso na naitala mula Nobyembre hanggang Disyembre 2025. Ang bilang na ito ay salamin ng realidad na direktang tumatama sa pamilya at komunidad. Kaya mahalaga ang access sa libreng kombinasyon ng preventive services na iniaalok ng pamahalaan, upang ang pag-iingat ay maging praktikal at abot-kamay.

Para sa mga single, binigyang-diin ng ahensya ang kahalagahan ng self-love at pangangalaga sa mental health. Ang paglalaan ng oras para sa sarili ay paghahanda para sa mas matalinong desisyon at mas malusog na relasyon sa hinaharap.

Ang tunay na pagmamahal ay hindi nasusukat sa tapang ng damdamin kundi sa tibay ng pananagutan. Ang pagpili ng proteksyon ay pagpili ng buhay, kinabukasan, at malasakit sa kapwa. Kapag ang pag-ibig ay sinabayan ng pag-iingat, mas nagiging makabuluhan ang bawat ugnayan at mas ligtas ang buong komunidad.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com