Regular na guro, may suweldo kahit semestral break

ni Atty. Persida Rueda-Acosta @Magtanong Kay Attorney | Oct. 14, 2024

Dear Chief Acosta,

Mayroon lamang akong katanungan tungkol sa aking pinsan na isang guro sa pribadong paaralan sa aming lalawigan. Matagal na siyang nagtatrabaho bilang regular na guro sa pribadong paaralan at ito lamang ang kanyang pinagkukunan ng kita. Gayunpaman, sinabi niya sa akin na magkakaroon ng semestral break ang kanilang paaralan at nag-aalala siya kung makatatanggap siya ng anumang kompensasyon sa panahong iyon upang makabayad sa kanyang mga buwanang bayarin. Maaari ko bang malaman kung siya ay may karapatan sa kanyang suweldo sa panahon ng semestral break at kung ang “no work, no pay” ba ay naaangkop sa kanyang sitwasyon? Salamat. — Migs

---

Dear Migs,

Ang kaalaman at pamamahala sa oras ng trabaho ay mahalaga para matiyak ang makatarungang gawi sa paggawa, mapanatili ang pagsunod sa batas, at maisulong ang positibong kapaligiran sa trabaho. Sa ating bansa, ang Labor Code of the Philippines ang namamahala sa mga oras ng trabaho ng mga empleyado, partikular sa Chapter I, Title I of Book III nito. Dagdag pa rito, ipinaliwanag sa Section 4, Rule I, Book III ng Omnibus Rules Implementing the Labor Code ang mga prinsipyo sa pag-alam ng oras ng trabaho: 

 “Section 4. Principles in determining hours worked. - The following general principles shall govern in determining whether the time spent by an employee is considered hours worked for purposes of this Rule: xxx

(d) The time during which an employee is inactive by reason of interruptions in his work beyond his control shall be considered working time either if the imminence of the resumption of work requires the employee’s presence at the place of work or if the interval is too brief to be utilized effectively and gainfully in the employee's own interest.”

Sa sitwasyon ng iyong pinsan, napagdesisyunan ng Korte Suprema sa kasong University of Pangasinan Faculty Union vs. University of Pangasinan and National Labor Relations Commission and University of Pangasinan, G.R. No. L-63122, February 20, 1984, sa pamamagitan ni Kagalang-galang na Kasamang Mahistrado Hugo E. Gutierrez, Jr., na ang semestral break ay isang pagkaantala sa trabaho na lampas sa kontrol ng guro. Ito ay itinuturing na kasama sa “oras na nagtrabaho.” Partikular na nakasaad sa kaso na:

“The semestral break scheduled is an interruption beyond petitioner’s control and it cannot be used ‘effectively nor gainfully in the employee’s interest’. Thus, the semestral break may also be considered as ‘hours worked.’ For this, the teachers are paid regular salaries and, for this, they should be entitled to ECOLA. Not only do the teachers continue to work during this short recess but much less do they cease to live for which the cost of living allowance is intended.”

Nakasulat sa Article 84, Chapter I, Title I of Book III ng Labor Code of the Philippines, ang mga oras na kasama sa trabaho:

“Article 84. Hours Worked. — Hours worked shall include (a) all time during which an employee is required to be on duty or to be at a prescribed workplace; and (b) all time during which an employee is suffered or permitted to work.”

Tungkol sa prinsipyo ng “no work, no pay,” hindi nito nasasaklawan ang sitwasyon ng iyong pinsan. Sa nabanggit na kaso sa itaas, tinalakay na ang mga guro ay hindi lumiliban sa kanilang trabaho dahil sa pansariling dahilan tuwing semestral break. Sa halip, napipilitan silang kumuha ng mandatory leave mula sa kanilang trabaho. Partikular na binanggit sa nasabing kaso na:

“The petitioner’s members received their regular salaries during this period. It is clear from the law that it contemplates a “no work” situation where the employees voluntarily absent themselves. Petitioners, in the case at bar, certainly do not, ad voluntatem absent themselves during semestral breaks. Rather, they are constrained to take mandatory leave from work.  For this, they cannot be faulted nor can they be begrudged that which is due them under the law.”

Sa mga nabanggit na talakayan, mahihinuha na ang mga regular na guro ay may karapatan sa kanilang mga suweldo tuwing semestral break at ang prinsipyo ng “walang trabaho, walang bayad” ay hindi naaangkop sa kanila.

Sana ay nabigyan namin ng linaw ang iyong katanungan.  Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.