Problema sa pag-uugali, maaaring matanggal sa trabaho

ni Atty. Persida Rueda-Acosta @Magtanong Kay Attorney | July 21, 2025

Dear Chief Acosta,

Patuloy kaming nakatatanggap ng negatibong feedback dahil sa attitude ng isa naming empleyado. Maaari ba siyang tanggalin sa trabaho dahil sa kanyang attitude problem?

– Lilibeth

---

Dear Lilibeth,

Ang iyong katanungan ay nasagot ng ating Kagalang-galang na Korte Suprema sa kasong Heavy Lift Manila, Inc., et al. vs. The Court of Appeals, et al., G.R. No. 154410, 20 Oktubre 2005, sa panulat ni Honorable Associate Justice Leonardo A. Quisumbing. Sa kasong ito napagpasyahan na ang attitude problem ng isang empleyado ay maaaring maging batayan para tanggalin siya sa trabaho:

“An employee who cannot get along with his co-employees is detrimental to the company for he can upset and strain the working environment. Without the necessary teamwork and synergy, the organization cannot function well. Thus, management has the prerogative to take the necessary action to correct the situation and protect its organization. When personal differences between employees and management affect the work environment, the peace of the company is affected. Thus, an employee’s attitude problem is a valid ground for his termination. It is a situation analogous to loss of trust and confidence that must be duly proved by the employer. Similarly, compliance with the twin requirement of notice and hearing must also be proven by the employer.

However, we are not convinced that in the present case, petitioners have shown sufficiently clear and convincing evidence to justify Galay’s termination. Though they are correct in saying that in this case, proof beyond reasonable doubt is not required, still there must be substantial evidence to support the termination on the ground of attitude. The mere mention of negative feedback from her team members, and the letter dated February 23, 1999, are not proof of her attitude problem. Likewise, her failure to refute petitioners’ allegations of her negative attitude does not amount to admission. Technical rules of procedure are not binding in labor cases. Besides, the burden of proof is not on the employee but on the employer who must affirmatively show adequate evidence that the dismissal was for justifiable cause.

x x x

In sum, we find that Galay was illegally dismissed, because petitioners failed to show adequately that a valid cause for terminating respondent exists, and because petitioners failed to comply with the twin requirement of notice and hearing.” 

Gaya ng tinalakay sa nasabing kaso, ang ugali ng isang empleyado na hindi nakakasundo ang kanyang mga katrabaho ay nakapipinsala sa kumpanya dahil maaaring masira niya ang payapa sa kapaligiran ng pagtatrabaho. Kung walang pagtutulungan, hindi gagana nang maayos ang isang organisasyon. Kaya, ang pamunuan ay may karapatang magpasya na gawin ang kinakailangang aksyon upang itama ang sitwasyon at protektahan ang kanilang organisasyon. Kapag ang mga alitan o hindi pagkakasundo sa pagitan ng mga empleyado at pamunuan ay nakaaapekto sa kapaligiran ng trabaho, ang kapayapaan ng kumpanya ay apektado. Kung kaya, ang problema sa ugali o attitude problem ng isang empleyado ay maaaring maging wastong batayan para siya ay tanggalin sa trabaho. Ito ay isang sitwasyon na kahalintulad sa pagkawala ng tiwala at kumpiyansa na dapat patunayan muna ng employer upang masabing may katwiran ang pagtanggal ng empleyado sa trabaho.

Samakatuwid, maaari lamang tanggalin ang inyong empleyado kung mayroon kayong sapat na katibayan ng kanyang problema sa pag-uugali na nakapipinsala sa kapaligiran sa pagtatrabaho. Ang pagbanggit lamang ng negatibong feedback mula sa mga katrabaho, tulad ng kaso sa itaas, ay hindi patunay ng kanyang attitude problem. Dagdag pa rito, kinakailangang mapatunayan na nabigyan siya ng sapat na pagkakataon na marinig at ipagtanggol ang kanyang sarili.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.