Pananagutan ng mga opisyal ng kumpanya sa illegal dismissal

ni PAO Chief Persida Rueda-Acosta @Magtanong Kay Attorney | June 20, 2026

Dear Chief Acosta,

Nais ko lamang itanong kung maaari bang managot nang personal ang isang opisyal o direktor ng korporasyon sa ilegal na pagtanggal ng empleyado? Maaari bang sila ay mapanagot kasama ng mismong korporasyon? — Emma

---

Dear Emma,  

Ang sagot sa iyong mga katanungan ay matatagpuan sa ating mga umiiral na batas, at kaugnay na mga kaso. Hinggil dito, ang sagot sa iyong katanungan ay nakasalalay sa kung ang opisyal o direktor ng korporasyon ay sadyang pumayag o sangkot sa ilegal na pagtanggal sa empleyado, o kung siya ay kumilos nang may masamang loob o matinding kapabayaan sa pamamahala ng korporasyon.

Bilang pangkalahatang tuntunin, ang isang korporasyon ay may hiwalay at natatanging personalidad na naiiba sa mga direktor, opisyal, at empleyado nito. Dahil dito, ang mga obligasyon ng korporasyon ay karaniwang pananagutan lamang ng mismong korporasyon at hindi ng mga taong kumikilos para rito.

Gayunman, may mga pagkakataon na maaaring managot nang personal at solidaryo ang mga opisyal o direktor, kasama ng korporasyon. Ito ay nakasaad sa Section 30 ng Republic Act (R.A.) No. 11232 o ang “Revised Corporation Code of the Philippines,” na nagsasaad:

 “Section 30. Liability of Directors, Trustees or Officers. – Directors or trustees who willfully and knowingly vote for or assent to patently unlawful acts of the corporation or who are guilty of gross negligence or bad faith in directing the affairs of the corporation or acquire any personal or pecuniary interest in conflict with their duty as such directors or trustees shall be liable jointly and severally for all damages resulting therefrom suffered by the corporation, its stockholders or members and other persons.” 

Kaugnay nito, ipinaliwanag ng Korte Suprema sa kasong Kho vs. Magbanua, (G.R. No. 237246, 24 July 2019), sa panulat ni Honorable Associate Justice Estela M. Perlas-Bernabe, ang sumusunod:

“However, it bears emphasis that a finding of personal liability against a director, trustee, or a corporate officer requires the concurrence of these two (2) requisites, namely: (a) a clear allegation in the complaint of gross negligence, bad faith or malice, fraud, or any of the enumerated exceptional instances; and (b) clear and convincing proof of said grounds relied upon in the complaint sufficient to overcome the burden of proof borne by the complainant.”

Gayunman, binigyang-diin din ng Korte Suprema na hindi sapat ang simpleng pagbibintang lamang laban sa opisyal o direktor kasama ng korporasyon. Kinakailangan na may malinaw na alegasyon at sapat na ebidensya na siya ay kumilos nang may bad faith, pandaraya, o matinding kapabayaan upang siya ay personal na mapanagot.

Samakatuwid, hindi awtomatikong mananagot ang isang opisyal o direktor sa lahat ng ilegal na pagtanggal ng empleyado laban sa korporasyon. Kinakailangan munang mapatunayan na siya ay direktang sangkot sa ilegal na gawain at kumilos nang may bad faith, matinding kapabayaan, o may sadyang pagpayag sa malinaw na ilegal na hakbang ng korporasyon.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.