Pagkilala sa karapatan at kapakanan ng mga beterano

ni PAO Chief Persida Rueda-Acosta @Magtanong Kay Attorney | November 8, 2026

Sa Republic (R.A.) Act No. 12320, na kilala bilang "Philippine Veterans' Month Act," ay kinikilala ng Estado ang hindi matatawarang ambag, hindi natitinag na dedikasyon, at pambihirang sakripisyo ng mga beteranong Pilipino sa pagtatanggol sa soberanya at integridad ng teritoryo ng bansa, gayundin sa kalayaan ng sambayanang Pilipino. Alinsunod sa Artikulo XVI, Seksyon 7 ng Konstitusyon, ang buwan ng Abril ng bawat taon ay idinideklarang "Philippine Veterans' Month," upang parangalan, kilalanin, at gunitain ang ating mga bayani, habang tinitiyak na ang sapat na pangangalaga, mga benepisyo, at tulong ay ipinagkakaloob sa kanila at sa kanilang mga pamilya.

Ang Buwan ng mga Beteranong Pilipino ay magsasakatuparan ng mga sumusunod na layunin:

(a) Honor and Memorialization - Upang palakasin at gawing institusyonal ang pangako ng bansa na parangalan at alalahanin ang mga beterano at ang kanilang mga makabayanihang sakripisyo sa pagtiyak ng kalayaan, kapayapaan, at seguridad ng bansa. Ang isang buwang pagdiriwang ay magsisilbing isang makapangyarihang simbolo ng kanilang kabayanihan, kagitingan, at pagkamakabayan, na magpapalakas ng kamalayang sibiko at damdaming makabayan sa mga Pilipino sa pamamagitan ng malikhain at pinahusay na mga aktibidad;

(b) Historical Preservation and Youth Education - Upang magbigay ng plataporma para sa mga beterano na maibahagi ang kanilang mga karanasan at personal na salaysay, na tinitiyak na ang kanilang mga kuwento ay mapangangalagaan at maipapasa sa mga susunod na henerasyon. Kabilang dito ang komprehensibong edukasyon ng mga kabataang Pilipino tungkol sa mga kritikal na papel sa kasaysayan ng mga beterano sa mga armadong tunggalian, pagtugon sa mga sakuna, at mga kampanyang militar na humubog sa bansa;

(c) Welfare and Benefit Accessibility - Upang bigyang-diin at tugunan ang mga pangangailangan at kapakanan ng mga beterano at kanilang mga pamilya, tinitiyak ang pantay na pag-access at de-kalidad na paghahatid ng lahat ng benepisyo, serbisyo, at tulong na legal nilang nararapat;

(d) Institutionalization and Civic Engagement - Upang gawing institusyonal ang taunang pagdiriwang ng Buwan ng mga Beterano ng Pilipinas sa pamamagitan ng mga coordinated programs and activities na aktibong nakikibahagi sa publiko, mga non-governmental organization (NGOs), mga lokal na yunit ng pamahalaan (LGUs), at iba pang mga stakeholders bilang pagkilala sa mga kontribusyon ng mga beterano at pagsuporta sa kanilang kapakanan; at

(e) Advocacy and Policy Development - Upang magsilbing isang angkop na panahon para sa pagtataguyod ng mga patakaran, programa, at proyektong nakabatay sa ebidensya na nagpapahusay sa paghahatid ng mga serbisyo sa mga beterano, lalo na sa mga liblib na komunidad, komunidad na kulang sa serbisyo, at mga komunidad na apektado ng tunggalian.

Layunin ng Estado na sa panahon ng Buwan ng mga Beteranong Pilipino, ang lahat ng departamento, ahensiya, at instrumentalidad ng pambansang pamahalaan, kabilang ang mga korporasyong pag-aari o kontrolado ng gobyerno (GOCC) at mga unibersidad at kolehiyo ng estado (SUC), pati na rin ang mga LGU, ay dapat magsagawa ng mga coordinated na programa, proyekto, at aktibidad upang parangalan ang mga beterano ng Pilipinas at upang mapahusay ang paghahatid ng mga serbisyo, benepisyo, at tulong sa mga beterano at sa kanilang mga pamilya sa buong bansa. Ang mga NGO, mga private entities, at iba pang mga stakeholder ay hinihikayat din na mag-organisa at magpatupad ng mga katulad na inisyatibo sa paggunita o lumahok sa mga programa at aktibidad na pinamumunuan ng gobyerno.

Ang Philippine Veterans Affairs Office (PVAO) at ang Department of National Defense (DND), sa pakikipag-ugnayan sa Department of the Interior and Local Government (DILG), Department of Health (DOH), Department of Education (DepEd), at iba pang kaugnay na ahensya ng pamahalaan, ay magsasagawa at magpapahusay ng mga aktibidad at programang nagtataguyod sa pag-alala sa mga beteranong Pilipino, sa kanilang mga sakripisyong makabayan, at sa kanilang mahalagang papel sa pagprotekta sa bansa at sa sambayanang Pilipino, nang sa gayon ay mapataas ang kamalayan at mapalaganap ang pagmamahal sa bayan, lalo na sa hanay ng mga kabataan.