Pagdeposito o consignation ng halaga ng utang sa korte

ni Atty. Persida Rueda-Acosta - @Magtanong Kay Attorney | December 07, 2021

Dear Chief Acosta,

Umutang ako sa aking kaibigan kung saan nagkasundo kami na ito ay papatungan niya ng buwanang interest hanggang sa ako ay makapagbayad. Noong isang araw ay handa na akong bayaran ang nasabing utang, ngunit ang aking kaibigan ay nasa ibang bansa at nais niyang ibigay ko na lamang sa kanyang kapatid ang nasabing halaga.

Tumanggi ang kapatid niya na magbigay ng resibo, kaya naman, hindi ko muna ibinigay ang pera. Ano ang maaari kong gawin upang makonsidera ang aking pagbabayad at hindi na mapatungan pa ng interest sa mga susunod na buwan? – Alwin

Dear Alwin,

Ang batas na sasaklaw tungkol sa inyong katanungan ay ang Republic Act No. 386, o mas kilala bilang The Civil Code of the Philippines. Nakasaad sa Article 1256 ng nasabing batas na:

“Article 1256. If the creditor to whom tender of payment has been made refuses without just cause to accept it, the debtor shall be released from responsibility by the consignation of the thing or sum due.

Consignation alone shall produce the same effect in the following cases:

(1) When the creditor is absent or unknown, or does not appear at the place of payment;

(2) When he is incapacitated to receive the payment at the time it is due;

(3) When, without just cause, he refuses to give a receipt;

(4) When two or more persons claim the same right to collect;

(5) When the title of the obligation has been lost.”

(Binigyang-diin)

Kaugnay nito, inilahad ng Korte Suprema sa kaso ng Soledad Dalton vs. FGR Realty and Development Corporation et al. (G.R. No. 172577, January 19, 2011, Ponente: Honorable Associate Justice Antonio T. Carpio) na:

“In order that consignation may be effective, the debtor must show that: (1) there was a debt due; (2) the consignation of the obligation had been made because the creditor to whom tender of payment was made refused to accept it, or because he was absent or incapacitated, or because several persons claimed to be entitled to receive the amount due or because the title to the obligation has been lost; (3) previous notice of the consignation had been given to the person interested in the performance of the obligation; (4) the amount due was placed at the disposal of the court; and (5) after the consignation had been made the person interested was notified thereof. Failure in any of these requirements is enough ground to render a consignation ineffective.”

Alinsunod sa nabanggit na probisyon ng batas, at sa desisyon ng Korte Suprema, upang maituring na ganap na ang inyong kabayaran, maaari ninyong ideposito sa korte ang halagang katumbas ng inyong utang, kung ang mga rekisitong nabanggit sa itaas ay inyo nang nagawa.

Mariing inilahad ng Korte Suprema na ang kakulangan o hindi pagtupad sa mga nasabing rekisito ay maaaring magdulot ng pagkawalang-bisa ng pagdeposito ninyo sa korte o consignation ng alin mang halaga.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa abogado.

Maraming salamat sa inyong patuloy na pagtitiwala.