Pagbalik-tanaw sa animnapung taon ng tunay na paglilingkod

ni Fr. Robert Reyes @Kapaayapaan / Patakbo-takbo | June 20, 2026

Taong 1966 nang magsimula ang munting pamayanan ng Ina ng Laging Saklolo sa Project 8, Barangay Bahay Toro, Quezon City. Taong 2026 na ngayon. Animnapu’t taon na ang lumipas.

Noong nakaraang linggo, pinarangalan ng parokya ang tatlumpung yumaong parokyano na naglingkod nang tapat hanggang sa katapusan ng kanilang buhay. Naaalala pa natin ang halong galak at lungkot sa mga mukha ng kanilang mga kamag-anak na dumalo sa pagtitipon.

Maliban sa tatlong unang paring yumao na nakasama natin sa ilalim ni Jaime Cardinal Sin, mula kay Padre Caparas hanggang kina Padre Laban at Padre Mortillero, hindi natin personal na nakilala ang karamihan sa mga pinarangalan. Ngunit sa simpleng pagmasid sa mga mukha ng mga lider na nag-alay ng kanilang sarili sa paglilingkod, naunawaan natin ang kahalagahan ng pagbabalik-tanaw at pag-aaral ng kasaysayan sa paghubog ng kasalukuyang parokya at pamayanan ng Ina ng Laging Saklolo.

Nagsimula na kagabi ang nobenaryo ng mga misa bilang paghahanda sa dakila at banal na pagdiriwang ng Pista ng Parokya. Sa pagkakataong ito, hindi muna natin piniling magbahagi ng pagninilay tungkol sa animnapu't taong kasaysayan ng parokya. Sa halip, ibinahagi natin ang ating karanasan sa paglilingkod sa nakalipas na limang taon, mula Hunyo 2021 hanggang Hunyo 2026.

Ang pangunahing tema ng nobenaryo hanggang sa pista ay: “Huwag Kayong Matakot, Kasama Ninyo Ako Lagi” (Isaias 41:10).

Marami tayong kinatatakutan at iba-iba ang paraan ng bawat isa upang harapin ang mga ito. Ayon sa mga sikologo, may pitong pangunahing takot ang tao: (1) kahirapan, (2) kritisismo, (3) pagkawala ng pag-ibig, (4) sakit, (5) pagtanda, (6) kamatayan, at (7) pagkawala ng kalayaan.

Marami sa mga takot na ito ang nakapaloob sa kasalukuyang pandaigdigang pangamba sa digmaan. Nakalulungkot na may mga pinuno ng makapangyarihang bansa na piniling magsimula ng mga digmaan upang ipakita ang kanilang kapangyarihan at isulong ang kanilang layunin na sakupin o kamkamin ang yaman ng ibang bansa.

Hindi na natin tatalakayin nang detalyado ang masalimuot na usaping ito, bagama’t ito ang tema ng unang araw ng Misa Nobenaryo.

Sa halip, ipinaliwanag natin na ang maraming digmaan ay hindi nagsisimula sa labas kundi sa loob ng tao—sa isip at kalooban ng mga lider na naniniwalang may pakinabang sa pakikipagdigma, manalo man o matalo. Kapag ang kanilang kalooban ay hindi nakatuon sa kapayapaan at pakikipagtulungan, madaling mauwi sa tunggalian at sigalot ang kanilang mga salita at kilos, hanggang sa humantong sa marahas, mapanira, at nakamamatay na mga aksyon.

Nabanggit din natin na nakikialam ang Diyos sa mundong pinatatakbo ng mga pinunong mahilig sa alitan, digmaan, at pagkamkam ng kapangyarihan at kayamanan. Isang matinding paalala ang nangyari noong 2020.

Noong Marso 15, 2020, nagsimula ang pandaigdigang lockdown. Ipinagbawal ang paglabas ng bahay, at nagbantay ang mga pulis at sundalo upang pigilan ang pagkalat ng COVID-19. Napakarami ang nahawa at namatay. Napuno ang mga ospital at nagkaroon ng kakulangan sa gamot at oxygen. Sa ilang bansa, tulad ng India, sa mga lansangan na isinagawa ang pagsusunog sa mga yumao dahil sa dami ng nasawi. Sa Pilipinas naman, ginamit maging ang mga paaralan at simbahan bilang pansamantalang pasilidad para sa mga maysakit.

Masakit ang naging karanasan ng buong mundo sa panahon ng pandemya. Marami ang nawalan ng magulang, kapatid, anak, kaibigan, kapitbahay, at kasamahan sa trabaho.

Nang humupa ang pandemya noong kalagitnaan ng 2022, dapat sana’y naging seryosong paksa ng pagninilay at pagpaplano ng buong mundo ang mga aral na natutunan upang hindi na maulit ang ganitong trahedya. Lumitaw noon ang konsepto ng “New Normal.” Ipinahiwatig nito na hindi na dapat bumalik ang mundo sa mga dating gawi na maaaring naging sanhi ng paglitaw ng pandemya.

Ngunit nakalulungkot na tila hindi ito ang direksyong tinahak ng marami. Sa halip, mabilis na bumalik ang mundo sa dating nakasanayan o “Old Normal.” Kasabay nito ang paglaganap ng maling impormasyon at pekeng balita sa social media, na lalo pang pinalakas ng malawakang paggamit ng cellphone. Napakalaki ng impluwensiya ng social media—maaari itong gamitin para sa kabutihan, ngunit maaari rin itong magamit sa kasamaan.

Opo, may mga digmaang nagaganap sa labas—mga pisikal at aktuwal na digmaan. Ngunit kadalasan, nagsisimula ang mga ito sa loob ng tao: sa isip, diwa, imahinasyon, at kaluluwa.

Ayon kay Joan of Arc, “Lahat ng laban ay napapanalo o natatalo muna sa isip ng tao.”

Sa nakalipas na animnapung taon, mahalagang balikan, pag-aralan, pagnilayan, at pagkunan ng aral ang mga naging pananaw, pagpapasya, at konkretong gawa ng mga pari, lider-layko, at ng buong pamayanan ng Parokya ng Ina ng Laging Saklolo sa Project 8, Quezon City.

Magandang tanungin ang ating sarili: Kanino tayo sumunod? Kanino at paano tayo naglingkod? Amen.