ni Atty. Persida Rueda-Acosta - @Magtanong Kay Attorney | November 22, 2022
Dear Chief Acosta,
Mahirap sumakay sa pampublikong sasakyan ngayong pandemya, kaya sumasabit ako sa likod ng jeep upang makauwi agad sa bahay. May pagkakataong nagalit sa akin ang drayber at pinababa ako ng jeep. Ipinagbabawal ba ng batas ang pagsabit sa likuran ng jeep? - Jomar
Dear Jomar,
Ang sagot sa iyong katanungan ay matatagpuan sa Section 51 ng Republic Act No. 4136 o mas kilala sa tawag na “Land Transportation Code” kung sana nakasaad na:
“Section 51. Hitching to a vehicle. – No person shall hang on to, ride on, the outside or rear end of any vehicle, and no person on a bicycle, roller skate or other similar device, shall hold fast to or hitch on to any moving vehicle, and no driver shall knowingly permit any person to hang on to or ride, the outside or rear end of his vehicle or allow any person on a bicycle, roller skate or other similar device to hold fast or hitch to his vehicle.” (Binigyang-diin)
Samakatwid, ang iyong pagsabit sa likod ng jeep ay labag sa batas at hindi wastong katwiran na mahirap sumakay sa panahon ng pandemya para gawin ito. Dahil dito, maiging sumunod na lamang sa batas para sa inyong kaligtasan.
Ang kaparusahan sa pagsabit sa sasakyan ay matatagpuan sa Section 56 (l) at (m) ng nasabing batas, kung saan nakasaad na:
“Section 56. Penalty for violation. – The following penalties shall be imposed for violations of this Act: xxx
(l) For violation of any provision of this Act or regulations promulgated pursuant hereto, not hereinbefore specifically punished, a fine not less than ten or more than fifty pesos shall be imposed.
(m) In the event an offender cannot pay any fine imposed pursuant to the provisions of this Act, he shall be made to undergo subsidiary imprisonment as provided in the Revised Penal Code.” (Binigyang-diin)
Kaugnay nito, ang nasabing multa ay itinaas sa ₱1,000 alinsunod sa Aytem J (8) ng Joint Administrative Order No. 2014-01 ng Land Transportation Office (LTO) at Land Transportation Franchising and Regulatory Board (LTFRB).
Batay sa nabanggit, ang taong sasabit o sasakay sa likod o labas ng sasakyan, tulad ng jeep ay maaaring pagmultahin ng ₱1,000. Dagdag pa rito, maaaring magsanhi rin ito ng pagkakakulong kung hindi mababayaran ng taong lumabag ang ipinataw sa kanyang multa.
Sana ay nabigyan namin ng linaw ang iyong katanungan. Ang payong aming ibinigay ay base lamang sa impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.