Olsim at Miado, masusubok sa Grand Prix at rematch

ni MC / Gerard Arce - @Sports | October 29, 2021

Minsan lang kumatok ang tsansa sa pintuan ni Team Lakay women’s atomweight fighter Jenelyn Olsim nang maging kahalili siya sa semifinal bout kontra kay Indian wrestler Ritu Phogat sa Atomweight Women’s Grand Prix co-main event ngayong gabi sa ONE: Next Gen sa Singapore Indoor Stadium.

Umatras ang orihinal na makakatapat ng 27-anyos na 2016 Commonwealth Wrestling Championship gold medalist na si Istuki “Android 18” Hirata ng Japan dahil sa problema sa kalusugan, habang hindi na matutuloy ang dapat na alternate atomweight bout ni 2019 SEA Games Muay Thai silver medalist Olsim kontra kay Jihin “Shadow Cat” Radzuan ng Malaysia.

Dahil na rin sa biglaang pagpalit ng makakalaban, patuloy pa ring tiwala ang 24-anyos na Bokod, Benguet native na kaya niyang sabayan ang wrestling at grappling skills ng 2016 Commonwealth Games freestyle wrestling champion. “I think I can handle her wrestling. I want to prove that I’m not just some alternate they can feed on her. When it comes to wrestling maybe I can grapple with her,” saad ni Olsim na may 2-fight winning streak at umaasang makakausad sa final round para kaharapin sii women’s Atomweight champion Angela Lee. “I’m very confident on my training. I prepared for that kind of game.”

Samantala, itatampok din sa ONE Championship™ (ONE) ngayong araw ng bakbakan sina Iraj Azizpour laban kay Anderson "Braddock" Silva para sa heavyweight kickboxing non-title bout. Dahil sa pag-atras ni ONE Light Heavyweight Kickboxing World Champion Roman Kryklia sa ONE heavyweight kickboxing world title bout, si Anderson ang humalili.

Magsisilbing main event sina Stamp Fairtex vs. Julie Mezabarba para sa iba pang World Grand Prix semifinal bout ng ONE: NEXTGEN. Tampok din si Filipino fighter Jeremy “The Jaguar” Miado para sa rematch kay Chinese Miao Li Tao sa men’s strawweight bout mixed martial arts event.

Pinatumba sa unang round ng Pinoy fighter ang Chinese opponent sa ONE: Age of Dragons noong Nobyembre 16, 2019 sa pamamagitan ng flying knee sa 3:01 ng 1st round.