Obligasyon ng local agency sa ‘Pinas na siguraduhing naipatutupad ang orihinal na kontrata sa POEA

ni Atty. Persida Rueda-Acosta - @Magtanong Kay Attorney | December 17, 2021

Dear Chief Acosta,

Ako ay nagpunta sa ibang bansa upang magtrabaho. Nakasaad sa aking kontrata na ipinasa sa Philippine Overseas Employment Administration (POEA) ay eight hundred (SR800) Saudi Riyals ang aking suweldo kada buwan, ngunit pagdating ko sa Riyadh, pinapirma ako ng panibagong kontrata na nagsasaad na ang tatanggapin ko na lamang ay five hundred (SR500.00) Saudi Riyals kada buwan. Napilitan akong pirmahan ito dahil sabi nila ay ipade-deport diumano ako kung hindi ako pipirma.

Mawawalan na ba talaga ng saysay ang kontratang pinirmahan ko sa Pilipinas? – Lito

Dear Lito,

Para sa inyong kaalaman, sa ilalim ng ating batas ay ilegal ang contract substitution o ang pagpapalit ng kontrata na may mas mababang benepisyo. Ayon sa Section 6 (i) ng Migrant Workers and Overseas Filipinos Act (Republic Act (R.A.) No. 8042, na inamyendahan ng R.A. No. 10022), mahigpit na ipinagbabawal ang sumusunod ng gawain:

“(i) To substitute or alter to the prejudice of the worker, employment contracts approved and verified by the Department of Labor and Employment from the time of actual signing thereof by the parties up to and including the period of the expiration of the same without the approval of the Department of Labor and Employment;”

Isinaad din ng Kagalang-galang na Korte Suprema sa kaso ng Datuman vs. First Cosmopolitan Manpower and Promotion Services, Inc. (G.R. 156029, November 14, 2008), na ang kontrata na kailangang ipatupad ay ang kontratang inaprubahan ng POEA:

“Hence, in the present case, the diminution in the salary of petitioner from US$370.00 to US$100 (BD 40.00) per month is void for violating the POEA-approved contract which set the minimum standards, terms, and conditions of her employment. Consequently, the solidary liability of respondent with petitioner's foreign employer for petitioner's money claims continues although she was forced to sign another contract in Bahrain. It is the terms of the original POEA-approved employment contract that shall govern the relationship of petitioner with the respondent recruitment agency and the foreign employer.

“(Binigyang-diin)

Ibig sabihin, hindi nararapat na five hundred (SR500) Saudi Riyals lamang ang natatanggap ninyo kahit nakapirma kayo sa pangalawang kontrata sa Riyadh.

Obligasyon ng lokal na ahensiya na inyong pinag-aplayan sa Pilipinas na siguraduhing naipatutupad ang inyong orihinal na kontrata sa POEA.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa abogado.

Maraming salamat sa inyong patuloy na pagtitiwala.