Negosyong ‘di obligadong magbayad ng minimum wage sa empleyado

ni Atty. Persida Rueda-Acosta @Magtanong Kay Attorney | April 3, 2023

Dear Chief Acosta,

Ako ay may-ari ng isang negosyo na nakarehistro bilang isang Barangay Micro Business Enterprise. Mayroon kaming 11 empleyado. Kinakailangan ba namin sumunod sa mandato ng minimum wage sa aming mga empleyado? –Ben

Dear Ben,

Para sa iyong kaalaman, nakasaad sa Seksyon 8 ng Republic Act No. 9178 o mas kilala bilang “Barangay Micro Business Enterprise Act of 2002” na ang mga negosyong nakarehistro bilang isang Barangay Micro Business Enterprise (BMBE) ay hindi saklaw ng batas ukol sa pagbabayad ng minimum wage. Ayon dito:

“Section 8. Exemption from the Coverage of the Minimum Wage Law – The BMBEs shall be exempt from the coverage of the Minimum Wage Law: Provided, That all employees covered under this Act shall be entitled to the same benefits given to any regular employee such as social security and healthcare benefits.”

Samakatuwid, kung ang negosyong iyong pagmamay-ari ay rehistrado sang-ayon sa batas na nabanggit, kahit na higit sa 10 ang iyong empleyado, ay hindi mo kailangan sumunod sa pagbabayad ng minimum wage, dahil ang batayan ng batas ay ang pagrehistro bilang BMBE at hindi ang dami ng iyong empleyado. Hindi ito kagaya ng exemption sa ilalim ng Republic Act No. 6727 o mas kilala bilang “Wage Rationalization Act,” kung saan bilang ng empleyado ang basehan ng exemption sa minimum wage.

Gayunpaman, hindi dapat mabago ang sakop ng benepisyo sa social security at healthcare benefits para sa iyong mga empleyado.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.