Mula kay Quezon hanggang kay Marcos, may nagbago na ba?

ni Fr. Robert Reyes @Kapaayapaan / Patakbo-takbo | November 2, 2025

Nag-aral sa Manuel L. Quezon University o MLQU ang aking nanay na si Naty Reyes. Master’s in Education ang kanyang kinuhang kurso noong dekada 60. 

Maliliit pa kami noon, naaalala namin ang mga umagang inihahanda kaming magkakapatid ng aming ina sa pagpasok sa paaralan habang siya rin ay naghahandang pumasok bilang guro. Tuwing Sabado, siya naman ang nag-aaral sa MLQU para sa kanyang Master’s in Education. Nagkataon ding merong kalye ML Quezon sa baryong tinitirhan namin. Dahil dito, naging bahagi ng paglaki namin ang pangalang Manuel L. Quezon na alam naming pangalan ng presidente noong panahon ng Commonwealth mula 1935 hanggang 1946. 

Hindi natapos ni Quezon ang kanyang termino dahil namatay ito kaya ipinagpatuloy ni Sergio Osmeña ang pamumuno mula 1944 hanggang 1946. Nasa ilalim tayo noon ng Estados Unidos bilang “unincorporated territory” habang naghahanda tayong maging lubos na independiente (sa Estados Unidos).

Noong nakaraang Huwebes, nagkaroon tayo ng pagkakataong panoorin ang pelikulang “Quezon” kasama ang staff ng parokya. Ilang kaibigan na ang nagbalita sa atin na napanood na nila ang pelikula. Kuwento nila, “Maganda at makapangyarihan ang pelikula.” Nang pinanood namin ang pelikula bumulagta sa amin ang ilang mahahalaga bagkus kontrobersyal na pangyayari sa kapanahunan ni Pangulong Quezon, presidente ng Komonwelt ng Pilipinas (1935-1944).

Lumabas ang ilang mahahalagang personalidad sa buhay ni Pres. Quezon tulad nina Joven Hernando, Pedro Janolino, Ana Ricardo, Aurora Aragon, Leonard Wood, Emilio Aguinaldo at Sergio Osmeña. 

Isang manunulat si Joven Hernando na sinundan ang buong panahon ni Quezon bilang presidente. May mga pagkakataong hindi nagugustuhan ni Quezon ang isinusulat ni Hernando. Sa galit ni Quezon ipinasara nito ang Alerta, ang pahayagang pinatatakbo ni Hernando. 

Ngunit, walang Alerta sa kasaysayan, bahagi lang ito ng pelikula. Sa movie, pinalabas na nagkuwento si Pedro Janolino kay Hernando na inutusan siya ni Emilio Aguinaldo na patayin si Heneral Antonio Luna. Hindi ganito ang pangyayari. Totoong si Janolino ang pumatay kay Heneral Luna ngunit iba ang nagsabi kay Quezon na pinapatay ni Aguinaldo si Luna. Si Pantaleon Garcia, isang heneral ng rebolusyon ang nagsabi kay Quezon nito. Hindi maaaring si Janolino ang nagsabi kay Quezon dahil dalawang taon nang patay ito bago pa naging presidente si Quezon noong 1935.