Mga depensa ni VP Sara, nanganganib dahil sa sunud-sunod na pag-aresto

ni Pablo Hernandez @Prangkahan | July 7, 2026

MGA SENADOR NA TAGAPAGTANGGOL NI VP SARA SA IMPEACHMENT TRIAL, ISA-ISA NANG IKINUKULONG – Ilang oras bago umpisahan ang impeachment trial ni Vice President Sara Duterte kahapon ay inaresto ng mga awtoridad si Sen. Rodante Marcoleta sa kasong plunder na may kaugnayan sa umano'y P75 milyong campaign donation na hindi umano niya idineklara sa kanyang Statement of Contributions and Expenditures (SOCE) at Statement of Assets, Liabilities and Net Worth (SALN).

Dahil dito, may mga nagsasabing ginagamit ng Marcos administration ang kapangyarihan upang isa-isang ipakulong ang mga senador na tagapagtanggol ni VP Sara sa impeachment court. Bago si Sen. Marcoleta, nauna nang inaresto at ikinulong si Sen. Jinggoy Estrada. Period!

XXX

DAHIL NAKAKULONG NA SI EX-CONG. DEFENSOR, LUMITAW PA KAYA ANG 17 'EX-SOLDIERS' NA BAGONG TESTIGO? – Sabi noon ni dating Cong. Mike Defensor na bukod sa 18 bodyguards ni Zaldy Co, may ilalabas pa siyang 17 "ex-soldiers" na umano'y nagdeliber din ng maleta-maleta umanong pera sa ilang politiko at opisyal ng gobyerno.

Kahapon ay inaresto rin si Defensor sa kasong plunder na kinasasangkutan din ni Sen. Marcoleta. Ngayong nakakulong na rin siya, lilitaw pa rin kaya ang 17 "ex-soldiers" na umano'y sangkot din sa pagdeliber ng maleta-maleta umanong pera? Abangan!

XXX

BAGO SUMAPIT ANG SONA NI PBBM, MAKUKULONG NA KAYA ANG 8 'CONG-TRACTORS'? – Sinabi ni Ombudsman Boying Remulla na posibleng banggitin ni Pangulong Ferdinand “Bongbong” Marcos Jr. (PBBM) sa kanyang State of the Nation Address (SONA) sa Hulyo 27 ang walong tinaguriang "Cong-tractor," o mga kongresistang nakatakda nang sampahan ng kasong plunder ng Office of the Ombudsman.

Hindi man aminin, tiyak na kakaba-kaba na ang walong Cong-tractor na ito dahil sa pahiwatig ni Ombudsman Remulla na maaari silang makulong bago pa sumapit ang SONA ni PBBM. Boom!

XXX

SA PAGTESTIGO NI EX-SEC. BONOAN, MALAMANG LALONG MADIIN SI EX-SEN. BONG REVILLA SA KASONG PLUNDER – Matapos isama bilang state witness si dating Department of Public Works and Highways (DPWH) Secretary Manuel Bonoan, sinabi ng Department of Justice (DOJ) na isa siya sa magiging testigo ng pamahalaan laban kay dating Sen. Bong Revilla.

Naku po! Sa pahayag na iyan ng DOJ, tiyak na lalong iigting ang kaso ng plunder laban sa dating senador. Period!