May “K” na bumalik sa pagtuturo ang dating guro na nahinto sa propesyon

ni Atty. Persida Rueda-Acosta - @Magtanong Kay Attorney | November 3, 2020

Dear Chief Acosta,

Ako ay guro sa elementary school na tumigil sa pagtatrabaho noong nagkaroon ako ng asawa at mga anak. Ngayong sila ay high school na, nais ko sanang bumalik sa trabaho ngunit ayaw akong payagan ng aking asawa. Sabi niya ay dapat manatili na lamang ako sa bahay dahil obligasyon ko ito bilang babae. Tama ba ito? Anong solusyon ang mayroon ako? – Celeste

Dear Celeste,

Kung walang seryoso, matibay at moral na dahilan ang inyong asawa ay hindi niya kayo maaaring pigilan na bumalik sa inyong trabaho at propesyon. Ayon sa Family Code of the Philippines:

 “Art. 73. Either spouse may exercise any legitimate profession, occupation, business or activity without the consent of the other. The latter may object only on valid, serious, and moral grounds.
 In case of disagreement, the court shall decide whether or not:
 (1) The objection is proper; and
 (2) Benefit has occurred to the family prior to the objection or thereafter. If the  benefit accrued prior to the objection, the resulting obligation shall be  enforced against the separate property of  the spouse who has not obtained consent.
 The foregoing provisions shall not prejudice the rights of creditors who acted in good faith. (117a)”

Maaari ninyong hilingin sa korte na mamagitan at tukuyin kung sapat ba o hindi ang pagpigil sa inyo ng inyong asawa na muling magtrabaho. Taliwas sa kanyang pananaw, tungkulin hindi lamang ng babae kundi pati na rin ng lalaking asawa ang pangangalaga sa tahanan. Narito ang mga probisyon ng nasabing batas na may kaugnayan dito:

 “Art. 70. The spouses are jointly responsible for the support of the family. The expenses for such support and other conjugal obligations shall be paid from the community property and, in the  absence thereof, from the income or fruits of their separate properties. In case of insufficiency or absence of said income or fruits, such obligations shall be satisfied from the separate properties. (111a)
 “Art. 71. The management of the household shall be the right and the duty of both spouses. The expenses for such management shall be paid in accordance with the provisions of Article 70. (115a)”

Dahil magkatuwang dapat ang mag-asawa sa mga nabanggit na responsibilidad, maaari ninyong ipaglaban ang inyong kagustuhan at karapatang maging produktibo muli lalo na at ito ay makatutulong sa suporta at pang-araw-araw na pamumuhay ng inyong pamilya.

Nawa ay nasagot namin ang inyong mga katanungan. Ang opinyong ito ay nakabase sa inyong mga naisalaysay at sa pagkakaintindi namin dito. Maaaring maiba ang opinyon kung mayroong karagdagang impormasyon. Mas mainam kung personal kayong sumangguni sa abogado.

Maraming salamat sa inyong patuloy na pagtitiwala.