Libreng serbisyong pagkalusugan, tiyaking mararamdaman ng Pilipino

ni Leonida Sison @Boses | February 20, 2026

Malaking tulong ang hatid ng pinalawak na Yaman ng Kalusugan Program (YAKAP) ng Philippine Health Insurance Corporation sa mga karaniwang Pilipino, lalo na sa panahong ang pagkakasakit ay madalas at nauuwi sa pagkakautang.

Sa ilalim ng pinalawak na YAKAP, umakyat na sa 75 ang libreng gamot na maaaring ma-avail ng mga miyembro. Kabilang dito ang 54 bagong gamot sa ilalim ng Guaranteed and Accessible Medications for Outpatient Treatment (GAMOT) component, na may ₱20,000 annual cap kada miyembro. Dagdag ito sa dati nang libreng konsultasyon, 13 laboratory procedures, at 20 gamot. Para sa maraming pamilyang Pilipino, ang benepisyong ito ay konkretong tulong na nagpapabawas sa pangamba tuwing may karamdaman ang isang miyembro.

Mas lalong mahalaga ang pagdaragdag ng libreng cancer screening para sa apat na pinaka-karaniwang uri ng cancer sa bansa. Kabilang dito ang:

• Mammography at breast ultrasound para sa breast cancer,

• Alpha-fetoprotein para sa liver cancer,

• Low-dose CT scan para sa lung cancer, at

• Colonoscopy para sa colorectal cancer.

Ang maagang pagtuklas ng sakit ay susi sa mas mataas na tsansang gumaling, kaya’t nagiging makabuluhan ang papel ng YAKAP sa pang-araw-araw na buhay ng mamamayan.

Ayon kay Israel Francis A. Pargas, patuloy ang pag-aaral upang gawing mas komprehensibo ang YAKAP bilang outpatient primary care package. Mahigit 40 milyong Pilipino na ang rehistrado, bagama’t humigit-kumulang 25 milyonlamang ang may unang patient encounter. Ipinapakita nito ang puwang para sa mas agresibong impormasyon at episyenteng implementasyon sa 4,099 YAKAP clinics at sa tulong ng halos 7,000 accredited primary care doctors sa buong bansa.

Ang tagumpay ng YAKAP ay nakasalalay sa kung gaano karaming nangangailangan ang naaabot nito. Naroon na ang benepisyo; ang hamon ay tiyakin na alam ito ng mamamayan, madali ang proseso, at may tuluy-tuloy na pondo.

Kung mapapanatili ang direksyong ito, ang kalusugan ay hindi na magiging pribilehiyo kundi karapatang tunay na nararamdaman ng bawat Pilipino.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com