Lakad-panalangin sa Senado, panawagan ng paglilinis at pagkakaisa

ni Fr. Robert Reyes @Kapaayapaan / Patakbo-takbo | July 5, 2026

Inutos ni Yahweh sa mga Israelita na maglakad sa paligid ng Jericho hanggang sa gumuho ang muog na bumabalot dito. At ito nga ang kanilang ginawa. Sa loob ng pitong araw ay inikutan nila ang Jericho habang hinihipan ang pitong trumpeta na nasa harapan ng Kaban ng Tipan (Ark of the Covenant). Pagsapit ng ikapitong araw, gumuho ang mga pader na nakapalibot sa Jericho. (Joshua 6:15-27)

Kakaiba ang ugnayan ng Diyos at ng tao noong unang panahon. Kapag nagsalita ang Diyos, naririnig Siya ng mga tao at hindi nagtatagal ay natutupad ang Kanyang mga salita. Inutusan Niya si Moises na hampasin ang bato sa gilid ng bundok. Ginawa ito ni Moises at bumulwak ang tubig upang mapawi ang uhaw ng mga Israelita.

Ngunit hindi rito nagtapos ang kanilang mga pagsubok. Nang magkaroon na sila ng tubig, pagkain naman ang kinulang. Muli silang nagreklamo, kaya idinulog ni Moises sa Diyos ang kanilang hinaing. Hindi nagtagal, umulan ng mana—tinapay na nagmula sa langit—at nabusog ang mga nagugutom na Israelita. Katulad nito, ang pagguho ng mga pader ng Jericho ay hindi nangyari agad, kundi matapos ang ilang araw ng paglalakad, panalangin, at pagtitiwala sa Diyos.

Ginawa na rin ng iba't ibang grupo ang sari-saring paraan upang maipahayag ang kanilang mga paninindigan. Noong nakaraang linggo, nagsagawa ng kilos-protesta ang isang grupo laban kay PBBM at nagbantang "walang alisan" hangga't hindi siya bumababa sa puwesto. Ngunit pagsapit ng ikatlong araw ay unti-unting nabawasan ang mga raliyista hanggang sa tuluyan nang tapusin ng mga organizer ang protesta. Nanatili pa rin si PBBM sa kanyang puwesto.

Bilang paghahanda sa nalalapit na impeachment trial ni VP Sara Duterte, nagsagawa naman ng Jericho Walk ang iba't ibang grupong Kristiyano—mga Protestante, Ebangheliko, at Katoliko—noong Sabado, Hulyo 4, 2026. Dumalo rito ang mga miyembro ng iba't ibang simbahan. Sa halip na sigawan at protesta, taimtim na paglalakad at panalangin ang kanilang isinagawa. Tinawag nila itong Lakad-Panalangin o Pilgrimage of Conscience.

Dalawang bahagi ang naging programa. Una ang mismong Jericho Walk, na sinimulan sa pamamagitan ng mga panalangin, pagbasa ng Bibliya, at pag-awit. Sinundan ito ng paglalakad na pinangunahan ng mga lalaking humihip ng shofar—isang trumpetang yari sa sungay ng tupa—na kahalintulad ng ginamit ng mga Israelita sa pag-ikot sa Jericho. Sa tradisyong Hudyo, ang pag-ihip ng shofar ay sumasagisag sa pagtawag sa bayan ng Diyos at sa pagtataboy ng kasamaan. Kasabay nito ang tahimik na panalangin ng mga lumahok.

Ikalawa, nagsagawa ang ilang paring Katoliko ng Prayer of Deliverance o Panalangin para sa Kaligtasan mula sa Masasamang Espiritu sa paligid ng Senado. Layunin nitong ipanalangin ang paglilinis ng kapaligiran at ang paggabay ng Diyos sa mga namumuno.

Sa nakalipas na mga linggo at buwan, nasaksihan ng publiko ang mga kaguluhan at tunggalian sa loob ng Senado. Marami ang nagtatanong kung normal pa ba ang mga nangyayari rito. Para sa ilan, bihira nang makita ang ganitong lalim ng hidwaan, na nauwi sa matinding pagkakahati-hati ng kapulungan.

Naranasan pa ng Senado ang pagkakaroon ng dalawang magkatunggaling pamunuan sa ilalim nina Alan Peter Cayetano at Sherwin Gatchalian. Natapos lamang ang sitwasyong ito nang lumipat si Joel Villanueva sa kabilang panig, dahilan upang mabuo ang bagong mayorya na may 13 senador at ang bagong minorya na may 11. Sa huli, si Win Gatchalian ang naging bagong Senate President.

Malinaw na hindi magiging madali ang impeachment trial sa gitna ng nahating Senado. Bagama't nabuo na ang bagong mayorya at tila mas naging maayos ang sitwasyon kaysa dati, hindi pa rin nawawala ang posibilidad ng panibagong sigalot mula sa loob at labas ng kapulungan.

Ito ang dahilan kung bakit isinagawa ang Jericho Walk at ang Paglalakbay ng Konsensiya. Dalangin ng mga lumahok na sa pamamagitan ng pagsaboy ng binasbasang asin at banal na tubig, pag-iinsenso, pagsisindi ng binasbasang kandila, at sama-samang panalangin, ay muling luminis at maging sagrado ang Senado.

Nawa'y manaig sa institusyong ito ang katotohanan, katarungan, at kabutihang nagmumula lamang sa Makapangyarihan at Mapagligtas na Panginoong Diyos. Amen.