Kustodiya sa illegitimate child

ni PAO Chief Persida Rueda-Acosta @Magtanong Kay Attorney | September 7, 2026

Dear Chief Acosta,

Meron po kaming anak ng dati kong live-in partner. Naging madalas ang aming pagtatalo at pag-aaway noon, kaya nauwi sa hiwalayan ang relasyon namin. Mula noon, wala na akong narinig sa kanya. Hindi siya nagpakita sa anak namin at hindi siya nagbigay ng sustento. Kamakailan, pagkatapos ng limang (5) taon, nakatanggap ako ng tawag mula sa tatay ng anak ko, humihingi ng tawad at gusto diumano niyang makabawi sa anak namin. Hinihingi rin niya na maghati kami sa kustodiya ng anak namin, pero hindi ako sang-ayon. Maaari bang ipilit niya ang gusto niya? — Jelika

---

Dear Jelika,

Ang iyong katanungan ay nasagot ng Kagalang-galang na Korte Suprema sa kasong Joey D. Briones vs. Maricel P. Miguel, et al., G.R. No. 156343, 18 October 2004, na isinulat ni Honorable Associate Justice Artemio V. Panganiban, kung saan pinasiyahan dito ang mga sumusunod:

“Having been born outside a valid marriage, the minor is deemed an illegitimate child of petitioner and Respondent Loreta. Article 176 of the Family Code of the Philippines explicitly provides that ‘illegitimate children shall use the surname and shall be under the parental authority of their mother, and shall be entitled to support in conformity with this Code.’ This is the rule regardless of whether the father admits paternity.

David v. Court of Appeals held that the recognition of an illegitimate child by the father could be a ground for ordering the latter to give support to, but not custody of, the child. The law explicitly confers to the mother sole parental authority over an illegitimate child; it follows that only if she defaults can the father assume custody and authority over the minor. Of course, the putative father may adopt his own illegitimate child; in such a case, the child shall be considered a legitimate child of the adoptive parent.

Only the most compelling of reasons, such as the mother’s unfitness to exercise sole parental authority, shall justify her deprivation of parental authority and the award of custody to someone else. In the past, the following grounds have been considered ample justification to deprive a mother of custody and parental authority: neglect or abandonment, unemployment, immorality, habitual drunkenness, drug addiction, maltreatment of the child, insanity, and affliction with a communicable disease. ” 

Ayon sa nasabing kaso, ang anak na ipinanganak sa labas ng isang balidong kasal ay itinuturing na illegitimate o non-marital child. Alinsunod sa batas, ang nasabing anak ay nasa ilalim ng parental authority ng kanyang ina. Sa paggamit ng nasabing awtoridad, siya ay may karapatang panatilihin ang bata sa kanyang kustodiya. Hindi aalisin ang kustodiya sa kanya kung walang anumang mahalagang dahilan na nagpapakita na siya ay hindi karapat-dapat na gawaran ng naturang awtoridad at pangangalaga.

Samakatuwid, dahil hindi ka kasal sa iyong dating live-in partner at bilang ina, ikaw ang may tanging parental authority o karapatan sa kustodiya ng iyong anak, hindi alintana kung kinilala siya ng kanyang ama. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa impormasyong iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.