Kasal ng magulang, hindi maaaring ipawalang-bisa ng mga anak

ni Atty. Persida Rueda-Acosta @Magtanong Kay Attorney | February 27, 2026

Dear Chief Acosta,

Nang mamatay si mama, nagpakasal ulit si papa ng sumunod na taon. Sa kasamaang palad, namatay sa sakit si papa noong nakaraang taon. Kamakailan lamang, nalaman naming magkakapatid na posibleng walang bisa ang pangalawang kasal ni papa. Maaari ba naming maipawalang-bisa ang pangalawang kasal ng aming papa? — Yujin

---

Dear Yujin,

Nakasaad sa Administrative Matter No. 02-11-10-SC, na inilabas ng Korte Suprema noong ika-4 ng Marso, 2003, na ang petisyon para sa pagpapawalang-bisa ng kasal ay maaari lamang maisampa ng sinuman sa mag-asawa:

“Section 2. Petition for declaration of absolute nullity of void marriages.

(a) Who may file. - A petition for declaration of absolute nullity of void marriage may be filed solely by the husband or the wife.”

Kaugnay nito, ipinahayag ng ating Korte Suprema sa kasong Lolita D. Enrico vs. Heirs of Sps. Eulogio B. Medinacelli and Trinidad Catli-Medinacelli, G.R. No. 173614, 28 Setyembre 2007, sa panulat ni Honorable Associate Justice Minita V. Chico-Nazario, na ang nasabing petisyon ay hindi maaaring ihain ng mga tagapagmana (compulsory or intestate heirs) o ng Estado:

“There is no ambiguity in the Rule. Absolute sententil expositore non indiget. When the language of the law is clear, no explanation of it is required. Section 2(a) of A.M. No. 02-11-10-SC, makes it the sole right of the husband or the wife to file a petition for declaration of absolute nullity of void marriage.

Respondents clearly have no cause of action before the court a quo. Nonetheless, all is not lost for respondents. While A.M. No. 02-11-10-SC declares that a petition for declaration of absolute nullity of void marriage may be filed solely by the husband or the wife, it does not mean that the compulsory or intestate heirs are already without any recourse under the law. They can still protect their successional right, for, as stated in the Rationale of the Rules on Annulment of Voidable Marriages and Declaration of Absolute Nullity of Void Marriages, Legal Separation and Provisional Orders, compulsory or intestate heirs can still question the validity of the marriage of the spouses, not in a proceeding for declaration of nullity, but upon the death of a spouse in a proceeding for the settlement of the estate of the deceased spouse filed in the regular courts.”

Sa kabilang banda, isinaad ng ating Korte Suprema na hindi ito nangangahulugan na ang mga tagapagmana ay wala nang anumang legal na paraan o remedyo sa ilalim ng batas. Tinalakay sa kasong nabanggit na maaari pa ring maprotektahan ng mga tagapagmana ang kanilang mana. Sa partikular, maaaring kuwestyunin ng mga anak ang bisa ng kasal ng yumaong magulang sa isang paglilitis sa korte para sa pag-aayos ng ari-arian ng namatay na magulang o proceeding for the settlement of the estate.

Gaya sa iyong sitwasyon, bagama’t hindi ka maaaring magsampa ng petisyon para ipawalang-bisa ang kasal ng iyong ama sa kanyang pangalawang asawa, maaari mo pa rin kwestiyunin ang bisa ng nasabing kasal sa pag-aayos ng mga naiwang ari-arian ng iyong ama.   

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.