Karapatan ng isang Data Subject

ni Atty. Persida Rueda-Acosta @Magtanong Kay Attorney | April 4, 2023

Dear Chief Acosta,

Ako ay nakatanggap ng sulat, kung saan nakasaad na ako ay nanalo sa isang raffle.

Wala naman akong kailangang bayaran para makuha ito, ngunit kailangan kong pumunta sa kanilang opisina para makuha ito. Tinawagan ko ang numerong nakasaad sa sulat, ipinagtataka ko lang kung paano nila nakuha ang address ko, gayung wala naman akong sinalihang raffle. Tinanong ko kung paano nila nakuha ang aking address, at ano pang personal impormasyon ko ang mayroon sila. Sinabi ng kausap ko na hindi diumano niya maaaring ibigay ang nasabing impormasyon sapagkat ang pagbibigay nito ay ipinagbabawal sa kanilang kumpanya. Tama ba ‘yun? –Audris

Dear Audris,

Ang batas na sasaklaw patungkol sa iyong katanungan ay ang Republic Act No. 10173 o mas kilala bilang “Data Privacy Act of 2012” Nakasaad sa Sections 16 (c) at 25 ng batas na:

“SEC. 16. Rights of the Data Subject. – The data subject is entitled to:

(c) Reasonable access to, upon demand, the following:

(1) Contents of his or her personal information that were processed;

(2) Sources from which personal information were obtained;

(3) Names and addresses of recipients of the personal information;

(4) Manner by which such data were processed;

(5) Reasons for the disclosure of the personal information to recipients;

(6) Information on automated processes where the data will or likely to be made as the sole basis for any decision significantly affecting or will affect the data subject;

(7) Date when his or her personal information concerning the data subject were last accessed and modified; and

(8) The designation, or name or identity and address of the personal information controller; xxx

SEC. 25. Unauthorized Processing of Personal Information and Sensitive Personal Information.

– (a) The unauthorized processing of personal information shall be penalized by imprisonment ranging from one (1) year to three (3) years and a fine of not less than Five hundred thousand pesos (Php500,000.00) but not more than Two million pesos (Php2,000,000.00) shall be imposed on persons who process personal information without the consent of the data subject, or without being authorized under this Act or any existing law.”

Alinsunod sa mga nabanggit na probisyon ng batas, ang isang data subject, o ang taong kinuhanan ng personal na impormasyon ay may karapatang malaman ang mga impormasyon patungkol sa kanya. Kaugnay nito, ang isang data subject ay may karapatan na magkaroon ng access kaugnay sa mga impormasyong nabanggit sa itaas, kabilang na ang pagkakaroon ng access sa kanyang personal na impormasyon na nasa tala ng isang kumpanya o organisasyon, at ang impormasyon kung saan nakuha ng nasabing kumpanya ang kanyang pagkakakilanlan. Ang paglabag sa nasabing na batas ay may katumbas na kaparusahan na pagkakakulong o multa.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.