Karapatan at proteksyon laban sa puwersahang pag-amin

ni Atty. Persida Rueda-Acosta @Magtanong Kay Attorney | January 11, 2026

Sa ilalim ng ating Saligang Batas at ng Republic Act (R.A.) No. 7438 o mas kilala sa tawag na “An Act Defining Certain Rights of Person Arrested, Detained or Under Custodial Investigation as Well as the Duties of the Arresting, Detaining, and Investigating Officers and Providing Penalties Thereof,” naging malinaw na polisiya ng ating estado na bigyang halaga ang dignidad ng bawat tao at bigyan ng kasiguraduhan at pangangalaga ang mga karapatang pantao.

Binibigyang garantiya ng estado sa pamamagitan ng R.A. No. 7438 at Seksyon 12, Artikulo III ng 1987 Philippine Constitution ang mga iba’t ibang karapatan ng isang taong inaresto, nakadetine, at nasa ilalim ng custodial investigation. Sakop ng custodial investigation ang pagbibigay ng imbitasyon sa isang taong pinaghihinalaang gumawa ng isang krimen upang siya ay maimbestigahan ukol dito. Ang taong ito ay isasailalim sa kustodiya ng mga pulis o awtoridad para sumagot sa isinasagawang imbestigation na may kinalaman sa isang krimeng naganap. Kapag ang isang tao ay sumailalim na sa pagtatanong ng mga awtoridad sa kung anong kinalaman niya sa isang krimen o ang nasabing tao ay mawalan na ng kalayaan para gumalaw nang ayon sa kanyang kagustuhan, dito na papasok ang garantiya ng ating Saligang Batas at RA 7438 para maprotektahan ang mga karapatan ng nasabing tao na sumasailalim sa pagtatanong.   

Ayon sa mga nabanggit na batas, ang isang tao na isinasailalim sa custodial investigation ay may karapatang manahimik at magkaroon ng isang mahusay at independenteng abogado na kanyang pinili. Siya rin ay may karapatang mabasahan o masabihan ng kanyang mga karapatang manahimik at magkaroon ng sariling abogado. 

Kung ang taong iniimbestigahan ay walang kakayahang kumuha ng kanyang sariling abogado, may karapatan siyang mabigyan ng estado ng isang abogado. Ang mga karapatang ito ay hindi maaaring talikdan ng isang taong iniimbestigahan maliban lamang kung ang pagtalikod dito ay nakasulat at ginawa sa harap ng isang abogado.

Sa isang imbestigasyon, mahigpit na ipinagbabawal ang paggamit ng awtoridad na nag-iimbestiga ng dahas, pamimilit, pananakit, pananakot, pagpapahirap, o anumang paraan na maaaring makakaimpluwensiya sa taong iniimbestigahan na magbigay ng impormasyong labag sa kanyang kalooban at pag-iisip. Anumang uri ng pag-amin na makuha sa ganitong paraan ay hindi maaaring gamiting ebidensya laban sa taong umamin sa kahit saang hukuman.

May karapatan din ang iniimbestigahan na mabisita ng kanyang mga malalapit na kaaanak, maging ng kanyang doktor, pari o ministro ng relihiyong kanyang kinabibilangan na kanyang mapili. May karapatan din siyang madalaw ng kanyang abogado o ng isang pribadong organisasyon na kinikilala ng Commission on Human Rights. Kabilang sa mga malalalapit na kaanak ang asawa, nobyo o nobya, magulang, anak, kapatid, lolo, tito, tita, pamangkin, guardian, ward, at apo. 

Ang mga pulis o awtoridad na lumabag sa mga isinasaad na probisyon ng mga nasabing batas, partikular sa pagsasabi ng mga karapatan ng taong iniimbestigahan, ay maaaring maparusahan ng pagbayad ng P 6,000 na multa o pagkakakulong ng walo hanggang 10 taon, o parehong multa at pagkakakulong. 

Parehong kaparusahan din ang igagawad sa mga awtoridad na hindi nagbigay ng abogado, kapag ang taong iniimbestigahan ay walang kakayahang kumuha ng kanyang sariling abogado.

May kaparusahan din ang pagbabawal na madalaw ang taong iniimbestigahan ng kanyang mga kaanak, abogado, doktor, o pari na kanyang ipinatawag.             

Sa lahat ng oras na nangyayari ang naturang pagsisiyasat o pagtatanong, ang mga pulis o awtoridad na nagsasagawa nito ay dapat na palagiang isaalang-alang ang mga nasabing karapatan dahil ang anumang paglabag sa mga ito ay may katumbas na kaparusahan.