Kapangyarihan ng homeowner’s association

ni PAO Chief Persida Rueda-Acosta @Magtanong Kay Attorney | May 28, 2026

Dear Chief Acosta,

Nagpasya ang mga opisyal ng homeowners’ association sa aming subdivision na maglagay ng isa pang basketball court sa panlahatang lugar. May karapatan ba silang magdesisyon tungkol dito nang hindi man lang kinokonsulta kaming mga homeowners? Nais ko po sanang maliwanagan. Maraming salamat po. — Carmela 

---

Dear Carmela,

Itinataguyod ng pamahalaan ang mga samahan ng mamamayan at kinikilala ang karapatan ng bawat isa na bumuo ng asosasyon. Gayundin, kinikilala nito ang mahalagang papel ng mga homeowners sa komunidad. Dahil dito, nabuo ang Republic Act (R.A.) No. 9904 o mas kilala sa tawag na “The Magna Carta for Homeowners and Homeowners’ Associations.” Ayon sa Seksyon 66, Rule 11, Revised Implementing Rules and Regulations (IRR) ng R.A. No. 9904:

“Section 66. Rights and powers of the association. An association duly registered in accordance with this Rules shall have the following rights and powers: 

a. Subject to consultation and with the approval of a simple majority of the members, regardless of standing, adopt and amend the Articles of Incorporation, By laws, rules and regulations, pursuant to existing laws and regulations; 

b. In behalf of its members, institute, defend, or intervene in litigation and/or administrative proceedings affecting the welfare of the association and the subdivision/village or community as a whole, excluding, however, disputes that are not the responsibility of the association; 

c. Without prejudice to the responsibility of the subdivision owners/developers to maintain the road lots, open spaces, and other facilities under Presidential Decree No. 1216 and its implementing rules and regulations, regulate the use, maintenance, repair, replacement and modification of common areas and cause additional improvements to be made part of the common areas; Provided, that the aforementioned do not contradict the provisions of the approved subdivision plan;” 

Batay sa nabanggit na batas, ang isang homeowners’ association, gamit ang sarili nitong kapangyarihan at kahit walang karagdagang konsultasyon sa mga miyembro nito, ay may karapatan at kapangyarihang magsagawa ng mga karagdagang pagpapaunlad sa mga panlahatang lugar. Ang tanging limitasyon dito ay hindi ito dapat sumalungat sa mga probisyon ng aprubadong subdivision plan.

Upang sagutin ang iyong katanungan, maaaring magpasya ang homeowners’ association sa iyong subdivision na magpatayo ng isa pang basketball court sa panlahatang lugar, sa kondisyong hindi ito sumasalungat sa mga probisyon ng aprubadong subdivision plan sa iyong lugar.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.