Kapag ang krimen ay naganap sa gitna ng dagat...

Ang may jurisdiction ay ang bansa kung saan nakarehistro ang barko

ni Atty. Persida Rueda-Acosta - @Magtanong Kay Attorney | November 14, 2020

Dear Chief Acosta,

Napatay ang aking asawa sa barko habang sila ay nasa kalagitnaan ng dagat. Ayon sa report ng kapitan ng barko, nasaksak daw ng kapwa niya marino ang aking asawa. Gayunman, may nakapagsabi sa akin na hindi sa Pilipinas isasampa ang kaso sapagkat nasa gitnang dagat daw nangyari ang insidente at hindi raw sa ‘Pinas ang rehistrasyon ng barko. Ganun ba talaga ‘yun? – Gina

Dear Gina,

Ang sagot sa inyong katanungan ay opo. Para sa inyong kaalaman, nakasaad sa Article 2 (1), ng Act No. 3815 o mas kilala sa tawag na “The Revised Penal Code,” na ang jurisdiction ng Pilipinas sa mga kasong kriminal na nagawa sa labas ng bansa, tulad ng sa barko kapag nasa gitna ng dagat ay limitado lamang sa sitwasyon kung saan ang barko ay rehistrado sa Pilipinas:

“Article 2. Application of its provisions. - Except as provided in the treaties and laws of preferential application, the provisions of this Code shall be enforced not only within the Philippine Archipelago, including its atmosphere, its interior waters and maritime zone, but also outside of its jurisdiction, against those who:
1.Should commit an offense while on a Philippine ship or airship; xxx.”

Kaugnay ng nasabing probisyon ng batas, sinabi ng Korte Suprema sa kasong People vs. Wong Cheng (G.R. No. L-18924, October 19, 1922) na isinulat ni Honorable former Associate Justice Norberto Romualdez, na kapag ang krimen ay naganap sa gitna ng dagat at sa kondisyon na wala sa teritoryo ng ibang bansa ang barko, ang may jurisdiction ay ang bansa kung saan nakarehistro ang barko:

“The English rule, based on the territorial principle and followed in the United States, according to which, crimes perpetrated under such circumstances are in general triable in the courts of the country within territory they were committed. Of this two rules, it is the last one that obtains in this jurisdiction, xxx.
No court of the Philippine Islands had jurisdiction over an offense or crime committed on the high seas or within the territorial waters of any other country, but when she came within three miles of a line drawn from the headlands, which embrace the entrance to Manila Bay, she was within territorial waters, and a new set of principles became applicable. The principle which governs the whole matter is this: Disorder which disturb only the peace of the ship or those on board are to be dealt with exclusively by the sovereignty of the home of the ship, xxx.”

Alinsunod sa mga nabanggit ng Korte Suprema at dahil nabanggit mo na ang barko ay hindi nakarehistro sa Pilipinas, kung gayun ay tama na walang hurisdiksiyon ang Pilipinas at hindi maaaring isampa rito ang kaso.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinion kung mayroong karagdagang impormasyong ibibigay. Mas mainam kung personal kayong sumangguni sa abogado.