Kalidad ng edukasyon, dapat maging sentro ng reporma sa trimester system

ni Leonida Sison @Boses | February 15, 2026

Kalidad ng edukasyon ang dapat manatiling sentro ng anumang reporma, kaya’t ang panukalang trimester system ng Department of Education (DepEd) para sa School Year 2026–2027 ay nararapat tingnan nang may bukas na isip.

Hindi lamang ito pagbabago ng petsa sa kalendaryo, kundi pagtatangkang ayusin ang mismong proseso ng pagkatuto—hakbang na may pangakong ginhawa ngunit may kaakibat na responsibilidad para matiyak ang kahandaan ng buong sistema.

Ayon sa DepEd, bahagi ang trimester ng isang “holistic approach” sa balanseng time management upang magkaroon ng mas mahaba at tuluy-tuloy na learning blocks. Layunin nitong pagandahin ang pacing ng mga aralin at bawasan ang administrative burden ng mga guro, batay sa mga natuklasan ng Second Congressional Commission on Education (Edcom2).

Sa praktikal na aspeto, ang 201 school days ay hahatiin sa tatlong termino: Hunyo–Setyembre, Setyembre–Disyembre, at Enero–Marso, na may tig-54 hanggang 61 araw ng instruksyon bawat isa, kasama ang enrichment blocks at minimal na abala mula sa non-academic activities.

Magkakaroon ng malinaw na paghahati ng instructional blocks para sa de-kalidad na pagtuturo, at enrichment blocks para sa remediation, enrichment, pagkuwenta ng grado, paghahanda ng school forms, at wellness breaks. May opening block din sa unang termino para sa mga gawain sa pagbubukas ng klase. Ang nakatakdang pahinga sa pagitan ng termino ay nagbibigay ng oras sa mga guro para sa lesson planning, assessment, at propesyonal na gawain—isang tugon sa matagal nang isyu ng pagkaputol-putol ng aralin at pagdami ng gawain.

Kasabay nito, itinutulak ng DepEd ang “low-disruption alternatives,” kung saan ang mga pagdiriwang at observances ay isinasama sa outputs ng klase—mula sa pagbasa at pagsulat hanggang sa agham at project-based learning—sa halip na hiwalay na programa na nagpapahinto sa oras ng klase. Sa ganitong paraan, napapanatili ang lesson continuity habang naiuugnay ang civic at cultural themes sa aralin.

May malinaw na benepisyo ang mas mahabang uninterrupted learning, ngunit mahalagang tiyakin ang sapat na konsultasyon at malinaw na polisiya bago ipatupad. Iba-iba ang kakayahan ng mga paaralan, lalo na sa malalayong lugar, kaya’t kailangang sabayan ng suporta ang anumang pagbabago.

Ang trimester system ay maaaring maging kasangkapan para sa mas maayos na pagkatuto kung ipatutupad ito nang dahan-dahan, malinaw, at inklusibo. Ang tagumpay ng reporma ay hindi nasusukat sa bilis ng pagbabago, kundi sa husay ng pagpapatupad nito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com