Ilegal na pagtatanggal sa isang caregiver

ni PAO Chief Persida Rueda-Acosta @Magtanong Kay Attorney | August 26, 2026

Dear Chief Acosta, 

Kasalukuyan akong nagtatrabaho bilang isang caregiver. Ayon sa aming napag-usapan, ang kontrata ko ay isang taon. Ngunit sinabihan ako na tatanggalin na ako sa trabaho kahit nakaka-walong buwan pa lang ako. Noong tinanong ko kung ako ang dahilan, wala naman silang masabi. May makukuha pa po ba ako bukod sa sahod ko sa huling buwan na ipinagtrabaho ko kung sakaling tanggalin ako sa aking trabaho? — Ate Arlyn

---

Dear Ate Arlyn,

Alamin muna natin kung sino ba ang itinuturing na caregiver sa ilalim ng batas? Ayon sa Section 3 ng Republic Act (R.A.) No. 11965: 

“Section 3. Definition of Terms. - For purposes of this Act, the following terms shall mean:

(a) Caregivers refers to a person, at least eighteen (18) years of age, who renders services as enumerated under Section 7 of this Act and shall include the following:

(1) Licensed health care professionals who listed themselves voluntarily with the Department of Labor and Employment (DOLE) as caregivers;

(2) Any person duly assessed and certified by the Technical Education and Skills Development Authority (TESDA) upon compliance with any of the following:

(i) Graduate of a caregiving qualification who achieved the required competencies;

(ii) Graduate of allied health care courses of an educational and/or accredited training institution; or

(iii) Practitioner or any person with prior learning and/or experience who has undergone competency or portfolio assessment.”

Ang tanong ngayon ay kung ano ang karapatan ng isang caregiver laban sa iligal na pagtanggal sa kaniya sa trabaho. Ayon sa Section 18 ng nasabing batas: 

“Section 18. Termination of Service. - Neither the caregiver nor the employer may terminate the contract before the expiration of the term except for grounds enumerated in Sections 19 and 20 of this Act: Provided, That the caregiver may terminate the contract by serving a written notice to the employer at least one (1) month in advance.

If the caregiver is unjustly dismissed, the caregiver shall be paid the compensation already earned plus the equivalent of fifteen (15) days work by way of indemnity. The caregiver and the employer may mutually agree upon written notice to pre-terminate the contract of employment to end the employment relationship.”

Maliwanag ang nakasaad sa batas na hindi maaaring tanggalin nang walang dahilan ang isang caregiver hangga’t hindi pa tapos ang kaniyang kontrata, maliban sa mga pagkakataon na ibinibigay at pinapayagan ng batas. 

Kung ang isang caregiver ay tinanggal nang walang dahilan bago matapos ang kanyang kontrata, at hindi alinsunod sa mga rason na pinapayagan ng batas, maaari siyang makakuha ng karagdagang kabayaran na katumbas ng kaniyang sahod para sa 15 na araw ng pasok. 

Sa iyong sitwasyon, kung ikaw ay tatanggalin nang walang dahilan bago matapos ang iyong kontrata, bukod sa sahod mo sa huling buwan na ipinasok mo, maaari kang makakuha ng karagdadagang halaga na katumbas ng 15 araw mong sahod, bilang bayad-pinsala. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.