Ilegal ang pagkuha o pagtatago ng passport ng OFW

ni Atty. Persida Rueda-Acosta @Magtanong Kay Attorney | Jan. 21, 2025

Dear Chief Acosta,

May katanungan lamang ako tungkol sa application ko bilang isang overseas Filipino worker (OFW). Kinuha kasi ng aking agency ang aking pasaporte. Sabi nila ay “for safekeeping” muna diumano nila ito hanggang makapagbayad ako ng tinatawag nilang application fee.  Maaari ba nila itong gawin? Salamat po. — Jeangrey

---

Dear Jeangrey,

Ang Republic Act (R.A.) No. 8042, na inamyendahan ng R.A. No. 10022, o mas kilala bilang “Migrant Workers and Overseas Filipinos Act of 1995,” ay nagbibigay proteksyon sa ating mga manggagawang Pilipino na nagtatrabaho at nagnanais magtrabaho sa ibang bansa. Ipinatupad ito upang maiwasan ang illegal recruitment at iba pang anyo ng pang-aabuso laban sa ating mga OFWs. Ang batas na ito ay isa ring hakbang upang mapanatili ang dignidad at kaligtasan ng mga Pilipino sa labas ng bansa.

Ayon sa nasabing batas, ang hindi awtorisadong pag-withhold o pagkuha sa mga dokumentong panglakbay na pagmamay-ari ng isang manggagawang Pilipino, nang dahil sa pinansyal na konsiderasyon, ay isang uri ng pamimilit na pinarurusahan bilang Illegal Recruitment. Partikular na nakasaad sa Seksyon (6)(k) ng R.A. No. 8042, as amended, na:

“SEC. 6. Definition. — For purposes of this Act, illegal recruitment shall mean any act of canvassing, enlisting, contracting, transporting, utilizing, hiring, or procuring workers and includes referring, contract services, promising or advertising for employment abroad, whether for profit or not, when undertaken by a non-licensee or nonholder of authority contemplated under Article 13 (f) of Presidential Decree No. 442, as amended, otherwise known as the Labor Code of the Philippines: Provided, That any such non-licensee or non-holder who, in any manner, offers or promises for a fee employment abroad to two or more persons shall be deemed so engaged. It shall likewise include the following acts, whether committed by any person, whether a non-licensee, non-holder, licensee or holder of authority: xxx

(k) To withhold or deny travel documents from applicant workers before departure for monetary or financial considerations other than those authorized under the Labor Code and its implementing rules and regulations;”

Samakatuwid, ang pagkuha o pagtago sa mga dokumentong panglakbay ng isang manggagawang Pilipino, gaya ng pasaporte nito, nang dahil sa pinansyal na konsiderasyon, ay mariing ipinagbabawal ng ating batas, at pinarurusahan bilang isang akto ng illegal recruitment.

Patungkol sa iyong katanungan, bilang isang aplikante sa pagiging OFW, hindi maaaring kunin ng iyong agency ang iyong pasaporte at itago ito hangga’t hindi ka pa nakapagbabayad ng tinatawag nilang application fee. Ito ay ipinagbabawal ng ating batas at itinuturing na krimeng Illegal Recruitment. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.