Ikalawang Linggo ng Nobyembre para sa kaalamang pinansyal

ni PAO Chief Persida Rueda-Acosta @Magtanong Kay Attorney | May 11, 2026

Dear Chief Acosta,

Malaki ang paniniwala ko na ang bawat tao ay nararapat na magkaroon ng kaalaman sa pinansyal na aspeto ng kanyang buhay dahil ito ay maaaring makatulong para maiangat ang kanyang pamumuhay. Dahil dito, may batas ba patungkol sa pagkakaroon ng araw upang kilalanin ang pinansyal na literacy sa bansa? Salamat po.

— Jacks Reyes

---

Dear Jacks Reyes,

Maaaring matagpuan ang kasagutan sa iyong katanungan sa  Seksyon 2 ng Republic Act (R. A.) No. 10922, “An Act Declaring the Second Week of November of Every Year as Economic and Financial Literacy Week,” o mas kilala sa tawag na, “Economic and Financial Literacy Act,” kung saan nakasaad na:

“Section 2. Declaration of Policy. - It is declared the policy of the State to develop national consciousness on economic and financial literacy by declaring the second week of November of every year as "Economic and Financial Literacy Week". The State recognizes the growth potential of the country through a financially literate people who make sound financial decisions, mobilize savings, and contribute ideas on improving economic and financial policies and programs.”

Para sa nasabing batas, naging polisiya ng ating Gobyerno ang paunlarin ang pambansang kamalayan sa pang-ekonomiya at pampinansyal na literacy sa pamamagitan ng pagdedeklara ng ikalawang linggo ng Nobyembre ng bawat taon bilang "Economic and Financial Literacy Week". Ito ay dahil kanilang kinikilala ang potensyal ng paglago ng bansa sa pamamagitan ng mga taong may matibay na kaalaman sa pananalapi, gumagawa ng matatalinong desisyon sa pananalapi, nagpapakilos ng mga ipon, at nag-aambag ng mga ideya sa pagpapabuti ng pang-ekonomiya at pampinansyal na mga patakaran at programa.

Karagdagan dito, may mga ahensya ng pamahalaan na inaatasan na lumahok sa obserbasyon ng Economic and Financial Literacy Week, at ito ay nabanggit sa Seksyon 3 ng nasabing batas:

“Section 3. Participating Government Agencies. - To ensure meaningful observance of the Economic and Financial Literacy Week as herein declared, the National Economic and Development Authority (NEDA) shall lead the participation of government agencies and instrumentalities during the Economic and Financial Literacy Week. As the lead agency, the NEDA shall plan, initiate, execute, and encourage knowledge-expanding activities on economic and financial literacy which may be adopted by government agencies and instrumentalities, including local government units (LGUs), government-owned and -controlled corporations (GOCCs) and educational institutions.

The NEDA shall convene for the purpose the relevant agencies, to include the Bangko Sentral ng Pilipinas (BSP), the Department of Finance (DOF), the Department of Education (DepED), the Commission on Higher Education (CHED), the National Youth Commission (NYC), and the Department of the Interior and Local Government (DILG).

All heads of government agencies and instrumentalities, including LGUs, GOCCs, and those identified by the NEDA as relevant agencies, are hereby directed to collaborate and cooperate with the lead agency in advocating and implementing activities to celebrate the Economic and Financial Literacy Week.”

Kung kaya, bilang kasagutan sa iyong katanungan at base sa mga nabanggit na probisyon ng nasabing batas, pinapahalagahan ng ating Gobyerno ang pagkakaroon ng pang-ekonomiya at pampinansyal na literacy ng bawat Pilipino at ito ay nagdeklara ng araw kung kailan ito kailangan obserbahin. Para rin mapalawak ang nasabing selebrasyon, may mga partikular na ahensya ng Gobyerno tulad ng National Economic and Development Authority, mga lokal na Gobyerno, Bangko Sentral ng Pilipinas at Department of Finance, na inatasang makisali para itaguyod at ipatupad ng mga aktibidad patungkol sa nasabing selebrasyon na ginaganap tuwing ikalawang linggo ng Nobyembre ng bawat taon sa ating bansa.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.