Hindi puwedeng sabay na bunuin ang dalawang kasong may sentensiyang pagkakakulong

ni Atty. Persida Rueda-Acosta - @Magtanong Kay Attorney | December 23, 2020

Dear Chief Acosta,

Nasentensiyahan ng tatlong kaso ng estafa at dalawang kaso ng BP 22 ang aking kapatid na may mga kaparusahan ng pagkakabilanggo. Kaugnay nito, nalaman ko na nakasaad diumano pala sa batas na maaaring sabay na bunuin ang sentensiya ayon sa Article 70 ng sinasabing Revised Penal Code. Totoo ba ito, at maaari rin kayang sabay na bunuin ng aking kapatid ang pagkakakulong niya sa limang kaso? – Prela

Dear Prela,

Ang sagot sa inyong katanungan ay hindi po. Bagama’t nakasaad sa Seksiyon 70 ng Act Number 3815, o mas kilala sa tawag na Revised Penal Code, ang batas tungkol sa simultaneous o magkasabay na pag-serve o buno sa sentensiya, ito ay naangkop lamang kapag ang kaparusahan ay hindi parehong binubuo ng pagkakakulong sapagkat hindi pinahihintulutan ang sabay na pagbuno sa kaparusahang pagkakakulong, viz:

“ARTICLE 70. Successive service of sentences. — When the culprit has to serve two or more penalties, he shall serve them simultaneously if the nature of the penalties will so permit; otherwise, the following rules shall be observed:
In the imposition of the penalties, the order of their respective severity shall be followed so that they may be executed successively or as nearly as may be possible, should a pardon have been granted as to the penalty or penalties first imposed, or should they have been served out. xxx.”

Sa katunayan, ito rin ang sinabi ng Korte Suprema sa kasong In The Matter Of The Petition For Habeas Corpus Of Pete C. Lagran, Pete C. Lagran (G.R. No. 147270, August 15, 2001), na isinulat ni Honorable former Chief Justice Reynato Puno, kung saan nabanggit ng Korte Suprema ang mga sitwasyon kung saan lamang maaari mag-apply ang simulatenous o sabay na pagbuno ng sentensiya:

“Article 70 of the Revised Penal Code allows simultaneous service of two or more penalties only if the nature of the penalties so permit. The penalties that can be simultaneously served are: (1) perpetual absolute disqualification, (2) perpetual special disqualification, (3) temporary absolute disqualification, (4) temporary special disqualification, (5) suspension, (6) destierro, (7) public censure, (8) fine and bond to keep the peace, (9) civil interdiction, and (10) confiscation and payment of costs. These penalties, except destierro, can be served simultaneously with imprisonment. The penalties consisting in deprivation of liberty cannot be served simultaneously by reason of the nature of such penalties. Where the accused is sentenced to two or more terms of imprisonment, the terms should be served successively.” (Binigyang-diin)

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.