Gumuhong gusali sa Angeles, hindi lang contractor ang dapat managot

ni Pablo Hernandez @Prangkahan | June 3, 2026

DUTERTE BLOC, GUMAWA NG RESOLUSYON SA KAMARA PARA HINDI MAGTAGUMPAY ANG PLANONG ‘NO-EL’ SA 2028 ELECTION — Walong kongresista mula sa Duterte bloc sa Kamara, na pinamumunuan ni Davao City 1st District Rep. Paolo Duterte, ang nagsulong ng isang resolusyon na tutol sa anumang planong Charter Change (Cha-cha) o pag-amyenda sa Saligang Batas.

Mainam ang hakbang na ito upang mabigyang-diin ang kahalagahan ng pagdaraos ng regular na halalan at maiwasan ang anumang pagbabago na maaaring magbukas ng usapin tungkol sa umano’y planong “No-El” o no election sa 2028. Period!

XXX

KAWAWA ANG MGA LOKAL NA MAGBABABOY KASI SILA ANG TATAMAAN SA EO NO. 116 NI PBBM — Kinuwestiyon ni Sen. Imee Marcos ang Executive Order No. 116 ng kanyang kapatid na si Pangulong Ferdinand “Bongbong” Marcos Jr. (PBBM), na nagpapahintulot sa malaking pagtaas ng importasyon ng karne ng baboy. Mula sa dating 54,210 metriko tonelada, itataas ito sa 205,210 metriko tonelada.

Ang hakbang na ito ni Sen. Imee ay nararapat lamang na pag-aralan at talakayin nang mabuti sa Senado, dahil kung tuluyang maisakatuparan ang naturang pagtaas sa importasyon, posibleng maapektuhan ang kabuhayan ng mga lokal na magbababoy. Kapag mas dumami ang imported na karne sa merkado, maaaring lumiit ang bahagi ng mga lokal na produkto at mabawasan ang kita ng mga hog raiser sa bansa. Tsk!

XXX

ANG LAKI NG BUDGET NG DEPED, TAPOS HINDI NILA MAPAUNLAD ANG KALIDAD NG EDUKASYON SA ‘PINAS — Inamin ng Department of Education (DepEd) na may umiiral na krisis sa literacy o kakayahan sa pagbasa at pagsulat ng mga mag-aaral sa bansa.

Nakaaalarma ang pag-amin na ito dahil sa kabila ng napakalaking pondong inilaan para sa edukasyon—na umaabot sa P1.015 trilyon ngayong 2026—nananatiling mababa ang antas ng pagbasa at pag-unawa ng maraming estudyante. Dahil dito, lalong lumalakas ang panawagan para sa mas epektibong paggamit ng pondo at mga programang tunay na makapagpapataas sa kalidad ng edukasyon sa ‘Pinas. Pwe!

XXX

HINDI LANG MAY-ARI AT KONTRAKTOR NG GUMUHONG GUSALI SA ANGELES CITY ANG DAPAT MANAGOT, DAPAT MANAGOT DIN ANG MGA TAUHAN NI MAYOR LAZATIN SA ENGINEERING OFFICE — Pumalo na sa 18 katao ang iniulat na nasawi sa pagguho ng isang ginagawang gusali sa Angeles City. Kung mapatutunayang may kapabayaan sa pagsunod at pagpapatupad ng mga itinakdang pamantayan sa konstruksyon, dapat itong masusing imbestigahan upang matukoy ang tunay na sanhi ng trahedya.

Ang nais nating ipunto rito ay hindi lamang ang may-ari ng gusali at ang kontratista ang dapat managot kung may mapatutunayang paglabag o kapabayaan, kundi maging ang mga opisyal at tauhang may tungkuling magsagawa ng inspeksyon at magpatupad ng mga regulasyon. Mahalaga na mapanagot ang lahat ng responsable upang matiyak na hindi na maulit ang ganitong trahedya. Period!