Good news at bad news sa presyo ng langis

ni Pablo Hernandez @Prangkahan | May 10, 2026

PATINDI NANG PATINDI ANG BANGAYAN NINA SEN. LACSON AT SEN. MARCOLETA – Patindi nang patindi ang bangayan nina Sen. Ping Lacson at Sen. Rodante Marcoleta.

Dumating na sa punto na nais ni Sen. Lacson na imbestigahan ang umano’y P500 million allocables insertion ni Sen. Marcoleta na may kaugnayan sa mga flood control projects.

Sa kabilang banda, inaasahan ding maaaring tumugon si Sen. Marcoleta sa isyu, kaya’t marami ang nag-aabang kung may ihahain din siyang kahilingan para maimbestigahan ang panig ni Sen. Lacson.

Abangan ang susunod na mga kaganapan.

XXX

KAPAG ISINAMA PA ANG PANGALAN NINA MAYOR LENI AT SEN. RAFFY TULFO SA PRESIDENTIAL SURVEY, NILOLOKO NA NG MGA SURVEY FIRMS ANG MGA PINOY – Sa susunod na maglabas ng presidential survey ang mga survey firms, dapat hindi na nila isama ang mga pangalan nina Leni Robredo at Raffy Tulfo dahil malinaw na nagsabi na sila na hindi sila kakandidato sa 2028 presidential election.

Ayon sa kanila, magpapatuloy si Leni Robredo sa kanyang tungkulin bilang alkalde ng Naga City, habang si Sen. Raffy Tulfo naman ay nakatuon sa kanyang muling pagtakbo bilang senador.

Kung isasama pa rin ng mga survey firms ang kanilang pangalan sa presidential survey, maaari itong magmukhang nakalilito o nakalilinlang sa publiko. Period!

XXX

BOTO NG MGA TAGA-4TH DISTRICT NG CAVITE KAY CONG. KIKO, SAYANG – Nang matanong ng mga mamamahayag si Cavite 4th District Rep. Kiko Barzaga tungkol sa panibagong ethics complaint laban sa kanya na posibleng maging dahilan ng kanyang pagkakatanggal bilang kongresista, kaugnay ng patuloy niyang pagbatikos sa House of Representatives, umano’y pambabastos sa ilang kapwa mambabatas, at pag-post ng mga sinasabing maling impormasyon sa social media, sinabi niyang tinatanggap niya ang posibleng pagkatanggal niya sa puwesto.

Ayon sa mga ulat, ang nauna niyang isa hanggang dalawang ethics complaint na nagresulta sa kanyang suspensyon ay dapat sana nagsilbing paalala upang ituon na lamang niya ang pansin sa paggawa ng mga programa at proyekto para sa kanyang distrito sa Cavite. Gayunman, sa halip ay muli umano siyang naglabas ng mga kritisismo laban sa ilang kapwa mambabatas at nagbahagi ng mga nilalamang naging dahilan ng panibagong reklamo laban sa kanya. Sa kabila nito, sinabi rin niyang wala siyang problema sakaling tuluyan siyang matanggal sa kanyang pwesto. Boom!

XXX

KAPAG ANG DOE ANG NAG-ANUNSYO, HINDI LAHAT GOOD NEWS, MAY BAD NEWS DIN – Sa susunod na linggo, may inaasahang rollback sa presyo ng diesel at kerosene, ngunit may pagtaas naman sa presyo ng gasolina.

Ayon sa Department of Energy (DOE), hindi puro magagandang balita ang anunsyo dahil may mga produktong bababa ang presyo, at mayroon ding tataas. Tsk!