Epekto ng pirmadong contract of employment

ni Atty. Persida Rueda-Acosta @Magtanong Kay Attorney | July 16, 2025

Dear Chief Acosta, 

Inalok ako ng trabaho ng isang kumpanya. Dahil maganda ang alok ay pumirma na ako sa isang sulat na ako ay pumapayag magtrabaho sa kanila, at sumailalim sa iba pang probisyon ng nasabing kontrata. Nakasaad din doon na ako ay magsisimula ng trabaho sa ika-1 ng Agosto taong 2025. Sa kasamaang palad, bago ang petsa na nakalagay para ako ay magsimula ng trabaho, sinabi sa akin na may ipinatupad diumano na “restructuring” ang nasabing kumpanya, at kasama ang puwesto ko sa mga sinabing tatanggalin na dahil sa “redundancy”. Ang inalok lang sa akin ay isang buwang sahod ko. Maaari ba akong mag-file ng kaso sa Labor laban sa aking employer kahit na ako ay hindi pa nagtatrabaho at nakapirma pa lang ng kontrata? — Niko

---

Dear Niko,

Sa kasong Paolo Landayan Aragones vs. Alltech Biotechnology Corporation, et al., G.R. No. 251736, 2 April 2025, ipinahayag ng Korte Suprema, sa pamamagitan ni Kagalang-galang na Mahistrado Alfredo Benjamin S. Caguioa, na ang isang kontrata ng pagtatrabaho (employment contract) ay nagiging ganap o buo sa oras na ang mga partido sa nasabing kontrata ay nagkasundo sa mga tuntunin at kondisyon na nakapaloob dito. 

Ipinaliwanag din ng Korte Suprema na bagama’t sa nasabing kontrata ay may ibinigay na petsa ng pagsisimula ng pagtatrabaho, hindi nangangahulugan na magiging ganap at perpekto lamang ito sa nasabing petsa. Narito ang pahayag: 

“An employment contract, like any other contract, is perfected at the moment the parties come to agree upon its terms and conditions, and thereafter, concur in the essential elements thereof. x x x

Here, the July 1, 2016 commencement date agreed upon by the parties is a suspensive period that merely deferred the demandability of their respective obligations as employer and employee-namely, the employee's obligation to render services and the employer's obligation to pay wages. It did not affect the existence or birth of those obligations. In other words, while the employer-employee relationship was already established when the contract was entered into on April 18, 2016, the demandability of their respective obligations as employer and employee was deferred until July 1, 2016.”

Samakatuwid, kung may pinirmahang contract of employment, ang relasyon ng employer at empleyado ay nagsisimula sa oras na iyon; sa oras na sila ay nagkasundo sa mga probisyon ng nasabing kontrata at pirmahan ito, kahit na may ibang petsang nakatakda rito kung kailan ang pagsisimula ng trabaho. 

Sa iyong sitwasyon, ang relasyon sa pagitan mo at ng iyong employer ay nabuo sa oras na magpirmahan kayo ng contract of employment. Hindi kailangang hintayin ang nakatakdang petsa ng pagsisimula ng iyong trabaho para masabi na may bisa na ito. Kaya naman, hindi ka maaaring basta-bastang tanggalin sa iyong dapat na magiging trabaho, maliban na lamang kung mapatunayan ng iyong employer ang sinasabi nila na redundancy. Dahil dito, maaari ka pa ring magsampa ng kaso laban sa iyong employer dahil sa pagbawi nito sa iyong nakatakdang trabaho.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.