DOTr Sec. Dizon, itinalaga lang yata ni PBBM para ibenta ang mga ari-ariang pang-transportasyon ng gobyerno

ni Pablo Hernandez @Prangkahan | June 28, 2025

HINDI LANG SI VP SARA ANG TATAMAAN SA PEOPLE POWER, TIYAK DAMAY DIN SI PBBM -- Nagbabala ang mga law expert, iba’t ibang civil society groups at cause-oriented groups na posibleng mag-People Power uli sa EDSA kapag dinismis ng Senado na tumatayong impeachment court nang walang naganap na impeachment trial ni Vice Pres. Sara Duterte-Carpio.

Aba teka, hindi ba madadamay diyan sa People Power si Pres. Bongbong Marcos (PBBM)?

Kapag nag-People Power ang mamamayan, hindi lang si VP Sara ang tatamaan diyan dahil automatic damay din si PBBM dahil sa anumang pag-aalsa ng taumbayan, ang pinatatalsik ay ang mga namamahala sa gobyerno, at sa ngayon, ang nagpapatakbo ng pamahalaan ay Marcos government, period!

XXX

KAPAG DINISMIS NG MAJORITY SENATOR-JUDGES ANG IMPEACHMENT KAY VP SARA PARANG SINABIHAN NINA CAYETANO AT ESCUDERO ANG MGA PRO-IMPEACHMENT NA MAGHABOL NA LANG SA ‘TAMBOL MAYOR’ -- Sinegundahan ni Sen. Alan Cayetano ang sinabi ni Senate President Chiz Escudero na posible nga raw na ma-dismiss agad ang impeachment cases ni VP Sara nang walang magaganap na impeachment trial kapag majority ng mga senator-judges ay bumoto na ibasura agad ang mga "articles of impeachment" laban sa bise presidente. At iyong mga tutol sa magiging desisyon ng Senado na tatayong impeachment court sa pag-dismiss sa mga kasong impeachment kay VP Sara ay puwede namang magpetisyon sa Supreme Court (SC).

Kumbaga, parang sinabi na rin nina Cayetano at Escudero na iyong mga pro-impeachment, maghabol na lang sa “tambol mayor,” boom!

XXX

TAMA ANG SINABI NI SEC. BOYING REMULLA NA POWERFUL ANG MASTERMIND SA ‘MISSING SABUNGEROS’ DAHIL ANG ONLINE SABONG PINA-STOP NA NI PBBM PERO TULOY PA RIN ANG OPERASYON -- Tama ang sinabi ni Sec. Boying Remulla ng Dept. of Justice (DOJ) na masyadong powerful ang inakusahan ni alyas "Totoy" na pasimuno ng online sabong sa ‘Pinas na siyang mastermind umano sa pagpatay sa mga "missing sabungeros."

Napaka-powerful talaga, kasi mantakin n'yo, Presidente na ng ‘Pinas na si PBBM ang nag-utos noong Dec. 29, 2022 nang pagbabawal sa online sabong pero hanggang ngayon ay talamak pa rin ang operasyon ng online sabong sa social media, tsk!

XXX

ITINALAGA LANG YATA NI PBBM SI SEC. DIZON SA DOTr PARA IBENTA ANG MGA ARI-ARIANG PANG-TRANSPORTASYON NG PAMAHALAAN -- Plano raw ni Sec. Vince Dizon ng Dept. of Transportation (DOTr) na isapribado ang LRT 2.

Naku kapag nangyari iyan, tiyak na sunud-sunod na magtataas ng pasahe sa LRT 2 ang kapitalistang makakabili nito dahil tiyak ang gagawin niyan ay makabawi agad sa

ginasta sa pagbili ng LRT 2.

Hay naku, itinalaga lang yata ni PBBM si Sec. Dizon sa DOTr para ibenta ang mga ari-ariang pang-transportasyon ng pamahalaan, buset!