Cabagnot, sasakay sa Dyip; PBA 3X3 Teams, handa na

ni MC / Gerard Arce - @Sports | November 14, 2021

Makaraang mailipat si Arwind Santos, nasundan pa ng isang miyembro ng tinaguriang Death 5 ng San Miguel Beermen ang pinalipat sa ibang koponan.

Mapupunta si veteran guard Alex Cabagnot sa Terrafirma Dyip bilang bahagi ng kanilang “reboot” matapos hindi makapasok sa finals ng Philippine Cup. Kukunin naman ng SMB Bilang kapalit ni Cabagnot sina young guns Simon Enciso at Roosevelt Adams mula sa Dyip.

Kamakailan ay binitiwan ng Beermen si forward Santos para dalhin sa NorthPort kapalit ni forward Vic Manuel.

Katulad ni Santos, malaki ring papel ang ginagampanan ng 38-year-old na si Cabagnot.

Hindi nakapaglaro ng husto si Cabagnot sa huling All-Filipino conference dahil sa torn meniscus sa kanyang kaliwang tuhod.

Samantala, may 13-koponan na maghaharap para sa pagbubukas ng inaugural competition ng PBA 3X3 at ang mga makakasama nila sa kanilang bracket matapos ang official drawing of lots kahapon para sa kompetisyon Nobyembre 20 sa Ynares Sports Arena sa Pasig City, habang inihahanda ang kakatawan sa 2024 Paris Olympics.

Makakasama ng 2021 PBA Philippine Cup champion na TNT ang guest teams na Limitless Appmasters, Zamboanga Valientes, Platinum Karaoke at Purefoods TJ Giants para sa Pool A.

Nasa Pool B ang Meralco Bolts 3x3, Sista Super Sealers, Terrafirma 3x3 at ang Ginebra 3x3, habang nasa Pool C ang Cavitex Braves, Pioneer Pro Tibay, Northport Batang Pier at Beermen. “Dati nilalaro ko lang ito sa kanto namin sa Project 6 (Quezon City), ngayon malaki na ang tsansa na makakuha tayo ng mga manlalaro na pwedeng mag-represent sa bansa sa Olympics sa 3X3. Sana galingan ninyo at sana makita ko kayo sa Olympics,” pahayag ni PBA Commissioner Willie Marcial.

Nasa grand opening din sina 3X3 chairman Richard Bachmann, SBP 3X3 program director Ronnie Magsanoc, tournament director Joey Guanio, at SBP deputy executive director Butch Antonio.