BSKE sa Nobyembre ‘pag hindi natuloy, P8B pera ng bayan, masasayang

ni Pablo Hernandez @Prangkahan | September 7, 2026

PLUNDER CASE ISINAMPA NA SA SANDIGANBAYAN AT KASUNOD NIYAN AY WARRANT OF ARREST, KAYA TIYAK MASA-SWAK NA SA CITY JAIL SI CONG. ROMUALDEZ — Isinampa na ng Office of the Ombudsman sa Sandiganbayan ang kasong plunder laban kina Leyte 1st Dist. Rep., former Speaker Martin Romualdez at former Ako Bicol Partylist Rep. Zaldy Co kaugnay sa pagkakasangkot nila sa multi-billion-peso flood control scandal sa bansa.

At dahil naisampa na ito sa Sandiganbayan, ay asahan nang kasunod nito ang warrant of arrest, na ibig sabihin, masa-swak na sa city jail ang dating speaker, abangan!

XXX

MALAMANG KAKABA-KABA NA SI SEN. ALAN CAYETANO SA STATEMENT NI NBI DIRECTOR NA KAKASUHAN NILA ANG MGA SANGKOT SA OVERPRICED NA P55M CAULDRON — Inanunsyo ni National Bureau of Investigation (NBI) Director Melvin Matibag na base sa kanilang imbestigasyon ay 'yung P55 million na ginastos ng Philippine Southeast Asian Games Organizing Committee (PHISGOC) sa paggawa ng cauldron para sa 2019 Southeast Asian (SEA) Games ay lumabas na umabot lang sa P5 million ang materyales at pati ang ibinayad sa arkitektong gumawa nito.

Dahil overpriced ito ng P50 million, kaya't ayon kay Director Matibag ay kakasuhan nila lahat ng sangkot sa anomalyang ito, at dahil P55M ito, pasok ito sa kasong plunder. 

At dahil kabilang ang noo'y Speaker Alan Cayetano (senador na ngayon) sa nangasiwa sa pagpapagawa ng cauldron na ito, ay hindi man niya aminin, malamang kakaba-kaba na siya dahil kapag isinama siya ng NBI sa sinampahan ng kasong plunder, swak din siya sa city jail, boom!

XXX

DAPAT I-REJECT NI PBBM ANG PANUKALANG POSTPONEMENT NG BSKE SA NOV. 2026 PARA HINDI MASAYANG ANG P8B PERA NG BAYAN — Sa pagdinig sa Kongreso ay inulit ni Comelec Chairman George Garcia na nakagastos na ang komisyon ng higit P8 billion, kabilang ang pag-imprenta ng mga balota para sa paghahanda sa nalalapit na Barangay and Sangguniang Kabataan Election (BSKE) sa November 2026.

Mantakin n'yo, ang laki na ng halagang nagastos ng Comelec sa paghahanda sa BSKE sa November 2026, P8 billion ito, tapos gusto ng Kamara at Senado na ipagpaliban ang barangay election sa kadahilanan lang na nais nilang mula sa 3-year term, ay gawin na itong 5-year term.

Dapat i-reject o i-veto ni President Ferdinand “Bongbong” Marcos Jr., (PBBM) ang panukalang postponement ng BSKE sa November 2026 kasi kapag inaprub niya ito, P8 billion pera ng bayan ang masasayang dito, period!

XXX

PABIDA LANG YATA NI COMM. NEPOMUCENO ANG SINABI NIYANG WALANG PUWANG ANG SMUGGLING SA CUSTOMS KASI SA DAMING SHABU AT SMUGGLED NA YOSI ANG NAIPUPUSLIT PALABAS SA ADWANA ANG NASASABAT NG PNP — Sinabi ni Commissioner Ariel Nepomuceno na wala raw puwang ang smuggling sa Customs.

Pabida lang yata ito ni Comm. Nepomuceno, kasi sa daming shabu at smuggled na yosi ang naipupuslit palabas sa Customs at nasasabat ng Philippine National Police (PNP) sa iba't ibang panig ng bansa, period!