Boto sa tax records ni VP Sara, maglalantad kung sino ang pro o anti-Duterte

ni Pablo Hernandez @Prangkahan | July 18, 2026

MGA SENATOR-JUDGES NA MAGYE-YES I-SUBPOENA ANG TAX RECORDS NG MAG-ASAWANG VP SARA AT MANS, MGA ANTI-DUTERTE 'YAN, PRO-DUTERTE NAMAN ANG MAGNO-NO – Sa Lunes, July 20, o sa ikapitong araw ng impeachment trial ni Vice President Sara Duterte, pagbobotohan ng mga senator-judges kung dapat bang i-subpoena ng impeachment court ang tax records ng mag-asawang VP Sara at Mans Carpio.

Kaya sa Lunes, magkakaalaman na kung sinu-sino ang boboto ng yes at kung sinu-sino ang boboto ng no. Abangan!

XXX

HAMON NI SEN. CAYETANO SA MARCOS ADMIN, SABLAY – Hinamon ni Sen. Alan Cayetano ang Marcos administration na ituloy ang imbestigasyon sa umano'y 2019 Southeast Asian (SEA) Games scam, habang sinabi rin niyang magsasagawa ang Senate minority ng sariling imbestigasyon sa flood control scandal.

May dalawang sablay sa pahayag na ito ni Cayetano. Una, hindi na niya kailangang hamunin ang Marcos administration dahil nagsasagawa na ng imbestigasyon ang National Bureau of Investigation (NBI) kaugnay ng 2019 SEA Games scam. Ikalawa, malabong maisakatuparan ang sinasabi niyang imbestigasyon ng Senate minority sa flood control scandal dahil hindi na siya ang Senate President at hindi na rin chairperson ng Senate Blue Ribbon Committee ang kanyang kapatid na si Sen. Pia Cayetano. Period!

XXX

KAPAG INUMPISAHAN NA ULI ANG FLOOD CONTROL INVESTIGATION, DAPAT IMBITAHAN SI EX-OMBUDSMAN MARTIRES PARA MAGISA – Tiniyak ni Sen. Erwin Tulfo, chairman ng Senate Blue Ribbon Committee, na pagkatapos ng State of the Nation Address (SONA) ni Pangulong Ferdinand “Bongbong” Marcos Jr. (PBBM) sa Hulyo 27, 2026, ay bubuksan muli ang imbestigasyon sa flood control scandal.

Sana, sa muling pagdinig, ay maisama rin sa iimbitahan si dating Ombudsman Samuel

Martires. Ayon kay anti-corruption convenor John Chong, noong 2021 at 2022 ay wala umanong naging aksyon ang dating Ombudsman sa hiling nilang imbestigahan sina noo'y Ako Bicol Party-list Rep. Zaldy Co, noo'y ACT-CIS Partylist Rep. Eric Yap, at CWS Party-list Rep. Edwin Gardiola kaugnay ng umano'y maanomalyang P50-bilyong flood control landslide slope protection projects sa buong Cordillera Administrative Region (CAR).

Ani Chong, kung inaksyunan lamang umano ito noon ni Martires, baka hindi na lumala ang umano'y korupsiyon sa flood control sa bansa. Boom!

XXX

KUNG NAG-IMBAK LANG SANA NG LANGIS ANG MARCOS ADMIN, HINDI SANA MAGKAKAROON NG BIGTIME OIL PRICE HIKE NEXT WEEK – May bigtime oil price hike na naman sa susunod na linggo. Tataas ng P11 kada litro ang diesel at P4 naman kada litro ang gasolina. Ayon sa Department of Energy (DOE), dulot ito ng muling paglala ng tensyon sa Middle East sa pagitan ng US at Iran.

Kung naghanda sana ang Marcos administration at nag-imbak ng sapat na suplay ng langis nang humupa noon ang tensyon sa Middle East, hindi sana ganito kalaki ang itataas ng presyo ng mga produktong petrolyo. Pero dahil hindi ito nagawa, asahan nang muling magdurusa ang mga motoristang Pinoy sa panibagong bigtime oil price hike. Tsk!