ni Atty. Persida Rueda-Acosta @Magtanong Kay Attorney | Oct. 18, 2024

Dear Chief Acosta,
Napansin ko na tuwing may kalamidad tulad ng lindol o bagyo ay may mga natatanggap ako na mensahe patungkol dito. Ito ay napakaimportanteng impormasyon upang mapaghandaan natin ang mga nasabing kalamidad. Kaya nais ko lamang malaman kung ito ba ay sakop ng isang batas? Salamat sa iyong magiging kasagutan. — Let-Let
Dear Let-Let,
Sinisigurado sa ating batas ang kaligtasan ng publiko sa panahon ng ano mang sakuna o kalamidad. Isa sa mga paraan upang masigurado ang kaligtasan ng lahat ay ang pagbibigay ng napapanahon at tamang impormasyon patungkol dito. Ang mga mensaheng nagbibigay alerto, babala o impormasyon patungkol sa mga natural na kalamidad sa ating bansa ay partikular na nakasaad sa Seksyon 4 ng Republic Act (R.A.) No. 10639, o mas kilala sa tawag na “The Free Mobile Disaster Alerts Act”, kung saan nababanggit na:
“Section 4. Mobile Disaster Alerts. – In the event of an impending tropical storm, typhoon, tsunami, or other calamities, mobile phone service providers are mandated to send out alerts at regular intervals as required by the National Disaster Risk Reduction and Management Council (NDRRMC), the Philippine Atmospheric, Geophysical and Astronomical Services Administration (PAGASA), the Philippine Institute of Volcanology and Seismology (PHIVOLCS) and other relevant agencies.
The alerts shall consist of up-to-date information from the relevant agencies, and shall be sent directly to the mobile phone subscribers located near and within the affected areas. The alerts shall include contact information of local government units and other agencies required to respond to the situation. The alerts may contain other relevant information such as, but not limited to, evacuation areas, relief sites and pick-up points.
The alerts shall be at no cost, whether direct or indirect, to the consumers; and shall be included as part of the service providers auxiliary service. The alerts may be in the form of SMS (text messages), MMS, or email, as needed and appropriate.”
Malinaw na nabanggit sa nasabing probisyon ng batas na, sa okasyon na may nalalapit na kalamidad tulad ng bagyo, tsunami, o ano pa mang katulad na sakuna, ang mga mobile phone service providers ay inaatasan na magpadala ng mga babala o magbigay alerto sa mga tao. Ito ay maaaring inatas ng mga sumusunod na ahensya ng gobyerno: a.) National Disaster Risk Reduction and Management Council (NDRRMC); b.) Philippine Atmospheric, Geophysical and Astronomical Services Administration (PAGASA); c.) the Philippine Institute of Volcanology and Seismology (PHIVOLCS); at (d) iba pang ahensya na may kaugnayan dito.
Nais din namin ipaalam na ang mga nasabing impormasyon ay nararapat na up-to-date at nagmula sa mga nabanggit na ahensya ng gobyerno. Ang nasabing mensahe ng pagbibigay alerto o babala ay dapat ipadala sa mga mobile phone subscribers na malapit o matatagpuan sa lugar na maaapektuhan o naapektuhan ng kalamidad.
Ang mahalaga pang aspeto nito ay libre o walang bayad ang pagpapadala ng mga nasabing mensahe dahil ito ay masasabing parte ng pagbibigay serbisyo ng mga mobile phone service providers.
Ngunit, bilang babala, may karampatang parusa kung mapatutunayan na ang isang tao ay magbibigay ng ano mang maling impormasyon, o magtatago o magbibigay ng huwad na impormasyon alinsunod sa nasabing batas. Ito ay nakasaad sa Seksyon 6 ng R.A. No. 10639:
“Section 6. Penalties. – (a) Any person who gives false or misleading data or information or willfully or through gross negligence, conceals or falsifies a material fact, in any investigation, inquiry, study, or other proceeding held pursuant to this Act, shall be punished with imprisonment of not less than two (2) months but not more than six (6) months, and with a fine of not less than One thousand pesos (P1,000.00) but not more than Ten thousand pesos (P10,000.00): x x x”
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.
Comments