Authority to Operate ng microgrid system

ni PAO Chief Persida Rueda-Acosta @Magtanong Kay Attorney | May 30, 2026

Dear Chief Acosta,

Nagbabalak ako na mag-apply ng trabaho sa isang kumpanya na may kinalaman sa pagbibigay ng microgrid system na serbisyo sa ibang liblib na lugar sa bansa. Bago po sana ako magsumite ng mga dokumento, nais ko munang masigurado na lehitimo ang pinapasok kong trabaho. Ano po ba ang dokumento na dapat maipakita ng kumpanya para makapagpatakbo ng isang negosyong may kaugnayan sa paglalaan ng isang integrated power generation? Maraming salamat po. — Melissa Miguella

---

Dear Melissa Miguella,

Ang sagot sa iyong katanungan ay matatagpuan sa Seksyon 6 ng Republic Act (R.A.) No. 11646, o mas kilala sa tawag na “Microgrid Systems Act,” kung saan nakasaad na:

“Section 6. Microgrid System Providers. – The ownership and operation of a microgrid system in unserved and underserved areas pursuant to this Act shall not be considered a public utility operation. For this purpose, any MGSP shall not be required to secure a franchise from Congress, but shall secure an Authority to Operate (ATO) from the ERC prior to its operation. All qualified third parties (QTPs) providing alternative electric service pursuant to Section 59 of Republic Act No. 9136 are hereby renamed and shall hereafter to be known as Microgrid Systems in Underserved and Unserved Areas (MGSPs).

Any party, including private corporation, local government units, cooperatives, non-government organizations, generation companies and their subsidiaries, and Distribution Utilities (DUs) and their subsidiaries who have demonstrated the capability and willingness to comply with the relevant technical financial, and other requirements, may be an MGSP: Provided, That these entities shall not subsidize their respective MGSPs and shall maintain a separate account for such business undertaking pursuant to ERC’s applicable rules and guidelines on business separation and unbundling, whenever applicable.” 

Ayon sa nasabing probisyon ng batas, ang pagmamay-ari o operasyon ng isang microgrid system sa mga lugar na walang serbisyo at kulang sa serbisyo ay hindi maikokonsidera na operasyong public utility. Kung kaya, ang mga nagbibigay ng microgrid system ay karaniwang hindi inaatasan na kumuha ng prangkisa sa Kongreso upang maipagpatuloy ang kanilang operasyon. 

Ganoon pa man, ang mga nagbibigay ng microgrid system ay inaatasan na kumuha muna ng Authority to Operate mula sa Energy Regulatory Commission (ERC) bago ang pagsisimula ng kanilang operasyon. Kung kaya, base sa iyong nabanggit na katanungan, maaari mong hilingin sa kumpanyang iyong papasukan ang kanilang Authority to Operate mula sa ERC.

Nais din namin ipaalam na ano mang paglabas sa batas ay may kaukulang parusa alinsunod sa R.A. No. 11646. Muli, kinakailangan mong alamin kung ang iyong papasukang kumpanya ay napagkalooban ng ERC ng nasabing Authority to Operate para masabi na ang kanilang operasyon ay alinsunod sa batas.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.