Asawang hiwalay sa pagsasama, karapat-dapat pa ring magmana

ni PAO Chief Persida Rueda-Acosta @Magtanong Kay Attorney | June 18, 2026

Dear Chief Acosta,

Matagal nang hiwalay at hindi nagsasama ang kapatid ko at ang kanyang asawa. May isa silang anak at may kani-kanya na silang buhay. Sa kasamaang palad ay namatay ang kapatid ko sa sakit. May naiwan siyang bahay at lupa. May habol pa po kaya ang kanyang asawa sa mga ito? — Arturo

---

Dear Arturo,

Ang mga karapatan ng paghalili (rights of succession) sa namatay na tao ay inililipat sa mga tagapagmana mula sa sandali ng kamatayan ng taong panggagalingan ng mana.

Kaugnay nito, sa kasong Jose Baritua and Edgar Bitancor vs. Honorable Court of Appeals, Nicolas Nacario and Victoria Ronda Nacario, G.R. No. 82233, 22 Marso 1990, sa panulat ni Kagalang-galang na Associate Justice Abraham F. Sarmiento, Sr., pinasiyahan ng ating Korte Suprema na ang paghihiwalay o hindi pagsasama ng mag-asawa ay hindi legal na batayan para sa diskwalipikasyon ng nabubuhay na asawa bilang tagapagmana ng namatay niyang asawa:

“Mere estrangement is not a legal ground for the disqualification of a surviving spouse as an heir of the deceased spouse.”

Muli itong pinagtibay ng ating Korte Suprema sa kasong Spouses Iluminada Capitle and Cirilo Capitle vs. Fortunata Elbambuena and Rosalinda C. Olar, G.R. No. 169193, 30 Nobyembre 2006, sa panulat ni Kagalang-galang na Associate Justice Conchita Carpio-Morales:

“Although estranged from Olar, respondent Fortunata remained his wife and legal heir, mere estrangement not being a legal ground for the disqualification of a surviving spouse as an heir of the deceased spouse.”

Alinsunod dito, kahit matagal nang hiwalay ang yumao mong kapatid at ang kanyang asawa, maituturing pa rin ang huli na tagapagmana ng iyong kapatid.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.