Apelyido ng ama, dapat gamitin ng lehitimong anak

ni Atty. Persida Rueda-Acosta @Magtanong Kay Attorney | May 28, 2025

Dear Chief Acosta, 

Noong taong 2000, ikinasal ako sa isang sundalo at kami ay nagkaroon ng apat na anak. Ngunit noong umalis ang asawa ko dahil sa isang digmaan ay hindi na siya muling nagbalik. Pilit kong inalam mula sa mga kasamahan niya at nagpalathala pa ako sa diyaryo para matunton ang kinaroroonan niya, ngunit hindi ko siya nakita. Noong taong 2010 ay nagsumite na ko ng “declaration of presumptive death” na kalaunan ay dinesisyunan ng korte sa aking pabor. Kaya nakapag-asawa akong muli noong taong 2011. Minahal ng pangalawang asawa ko ang mga anak ko na parang sarili niyang anak. Nais ko lang malaman kung maaari ko bang papalitan ang apelyido ng mga anak ko at isunod sa apelyido ng kanilang amain? — Bebe

---

Dear Bebe,

Nakasaad sa Article 364 ng ating New Civil Code na ang lehitimong anak ay dapat na gamitin ang apelyido ng kanyang tatay: 

“ARTICLE 364. Legitimate and legitimated children shall principally use the surname of the father.” 

Para lalo nating maintindihan, kailangang malaman natin kung sino ba ang itinuturing na lehitimong anak ng batas.  Ayon sa Article 164 ng ating Family Code of the Philippines, ang mga batang nabuo o naipanganak sa loob ng isang kasal na may bisa, ay itinuturing na lehitimo. 

Dahil dito, ang isang lehitimong anak ay dapat na gamitin ang apelyido ng kanyang tatay. Kaya naman, sa kasong In the matter of the Petition for Change of name, Dolores Gemora Padilla vs. Republic of the Philippines, G.R. No. L28-274, 30 April 1982, nagdesisyon ang Korte Suprema, sa pamamagitan ni Kagalang-galang na Kasamang Mahistrado Venicio T. Escolin, na hindi maaaring gamitin ng mga lehitimong anak sa unang kasal ang apelyido ng pangalawang asawa ng kanilang nanay, o ang kanilang amain. 

Sa iyong sitwasyon, ang apat mong anak sa iyong unang asawa ay maituturing na lehitimo ninyong anak dahil sila ay nabuo at ipinanganak habang ang kasal ninyo ay may bisa pa. Kaya naman nararapat lang na gamitin nila ang apelyido ng unang asawa mo na kanilang ama. Dahil dito, maaaring hindi sila pahintulutan na gamitin ang apelyido ng iyong pangalawang asawa. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.