Animal Welfare Act, panahon nang palawakin ang proteksiyon

ni Leonida Bonifacio-Sison @Boses | November 9, 2026

Kinakailangan nang palakasin ang mga batas na nagpoprotekta sa mga hayop, lalo na ngayong lumilitaw na hindi sapat ang kasalukuyang mga probisyon upang tugunan ang mga iregularidad sa mga serbisyong dapat sana ay nagbibigay ng maayos at makataong pag-aasikaso sa mga alagang namatay na. 

Hindi dapat matapos sa pagkamatay ng isang alaga ang pananagutan ng mga taong pinagkatiwalaan ng kanilang huling pangangalaga.

Naging dahilan ito ng panawagan ng mga animal rights advocates na amyendahan ang mga batas na may kaugnayan sa afterlife pet care services matapos matagpuan ang mga bangkay ng mga aso at pusa na itinapon sa San Jose del Monte City, Bulacan.

Kinasuhan noong Biyernes ang may-ari ng Ahjay Paws Aftercare Pet Crematorium at tatlo pang indibidwal kaugnay ng insidente.

Ipinunto ng mga tagapagtaguyod ng karapatan ng hayop na hindi saklaw ng Animal Welfare Act of 1998 ang regulasyon sa mga serbisyong nag-aasikaso sa mga labi ng namatay na alaga. Hindi umano ito naisip ng mga mambabatas noong binuo ang batas dahil hindi pa nakikita noon ang posibilidad na magkaroon ng ganitong uri ng problema.

Dahil dito, isinusulong ang mga panukalang mag-uugnay at magpapalinaw sa magkakahiwalay na probisyon ng batas upang magkaroon ng mas maayos na sistemang magtatakda ng pananagutan sa mga negosyong nag-aalok ng cremation at iba pang serbisyo para sa mga alagang hayop.

Sa ilalim ng kasalukuyang batas, hindi basta-basta maikakapit ang mga probisyon nito sa naturang insidente maliban kung mapatutunayang namatay ang mga hayop dahil sa kalupitan, pagmamaltrato, kapabayaan o pag-abandona. Ipinakikita nito ang kakulangan sa umiiral na proteksiyon, lalo na sa mga kasong may kinalaman sa hindi wastong paghawak at pagtatapon sa mga labi ng alaga.

Para sa maraming pamilya, ang aso at pusa ay hindi lamang hayop kundi bahagi na ng kanilang tahanan. Kaya kapag ipinagkatiwala nila sa isang negosyo ang huling pag-aasikaso sa kanilang alaga, nararapat lamang na matiyak ang maayos, malinis at makataong serbisyo. Hindi dapat samantalahin ang tiwalang ito para kumita nang walang sapat na pananagutan.

Dapat magkaroon ng malinaw na pamantayan sa operasyon, wastong paglalagak ng mga labi, regular na inspeksiyon at mabigat na parusa sa mga lalabag. Hindi sapat ang paghabol sa mga responsable matapos magkaroon ng iskandalo. Mas mahalagang pigilan ang pag-uulit ng ganitong pangyayari.

Ang tunay na paggalang sa buhay ng mga hayop ay hindi nagtatapos sa kanilang huling hininga. Dapat itong manaig hanggang sa maayos at marangal na pag-aasikaso sa kanilang mga labi. Sa ganitong paraan, mapoprotektahan hindi lamang ang mga alaga kundi pati ang tiwala ng mga pamilyang nagmamahal sa kanila.