Ambulansiya para sa bayan, ‘huwag hayaan na matengga lang

ni Leonida Bonifacio-Sison @Boses | November 20, 2026

Malaking tulong sa mga mamamayang nangangailangan ng agarang serbisyong medikal ang pagkakaroon ng sapat na ambulansiya sa bawat komunidad. Sa oras ng aksidente, biglaang pagkakasakit, o iba pang emergency, bawat minutong lumilipas ay mahalaga. Kaya ang planong pagbili ng daan-daang bagong patient transport vehicles ng Philippine Charity Sweepstakes Office (PCSO) ay isang hakbang na dapat suportahan at bantayan upang matiyak na tunay na makikinabang ang taumbayan.
Nakatakdang bumili ang PCSO ng hanggang 450 ambulansiya na nagkakahalaga ng kabuuang P1.035 bilyon. Kukuhanin ang pondo mula sa 2026 corporate operating budget ng ahensya at ipamamahagi ang mga sasakyan sa mga lokal na pamahalaan at institusyong medikal na nangangailangan nito.
Batay sa inilaan na halaga para sa kontrata, tinatayang P2.3 milyon ang presyo ng bawat unit. Nakatakda namang matapos ang pagsusumite ng mga bid nang personal sa ganap na alas-12:30 ng tanghali, kasunod ang pagbubukas ng mga ito sa pamamagitan ng videoconferencing at sa Conservatory Shaw Plaza Building sa Mandaluyong dakong ala-1 ng hapon. Ipinapakita ng hakbang na ito ang pagsisimula ng proseso para maisakatuparan ang pagbili ng mga sasakyan.
Maraming lokal na pamahalaan ang humihiling ng karagdagang ambulansiya dahil hindi sapat ang kanilang kasalukuyang kagamitan upang matugunan ang pangangailangan ng mga residente. Sa ilang lugar, malaking problema ang kakulangan ng sasakyan para maihatid agad sa ospital ang mga pasyenteng nangangailangan ng agarang atensiyong medikal. Mas mabigat ang sitwasyon sa mga komunidad na malayo sa mga pagamutan at may limitadong serbisyong pangkalusugan.
Gayunman, hindi sapat na bumili lamang ng maraming ambulansiya. Dapat tiyakin na maayos ang pagpili sa supplier, makatwiran ang presyo, at de-kalidad ang bawat sasakyang ihahatid. Kailangang may malinaw ding sistema sa pamamahagi upang mapunta ang mga ito sa mga lugar na higit na nangangailangan, sa halip na maiparada lamang at hindi magamit.
Mahalaga ring tiyakin na may sapat na pondo para sa gasolina, maintenance, kagamitan at mga taong magpapatakbo ng ambulansiya. Walang saysay ang bagong sasakyan kung hindi ito agad maipakikinabang sa oras ng emergency.
Ang sukatan ng programang ito ay hindi ang dami ng nabiling ambulansiya o laki ng pondong nagastos, kundi ang bilang ng mga buhay na matutulungan at maililigtas. Pera ng bayan ang ginagamit, kaya nararapat lamang na bawat sasakyan ay makarating sa tamang lugar at makapaghatid ng serbisyong kailangan ng mamamayan. Ang ambulansiyang binili para sa taumbayan ay dapat laging handang rumesponde, hindi nakatengga habang may pasyenteng naghihintay ng saklolo.





Comments