Marriage license hindi na kailangan sa matagal na nagsasama

ni PAO Chief Persida Rueda-Acosta @Magtanong Kay Attorney | November 20, 2026

Dear Chief Acosta,
Mahigit sampung (10) taon na kaming nagsasama ng partner ko. Mayroon na rin kaming dalawang anak. Nais na sana namin magpakasal upang maging ganap na legal ang pagsasama namin. May nakapagsabi sa amin na kahit hindi na kami kumuha ng marriage license ay maaari pa rin kaming magpakasal. Totoo po ba ito? — Jonas
Dear Jonas,
Ang marriage license ay isa sa mga pormal na rekisito ng kasal, ang kawalan ng lehitimong marriage license ay sapat na basehan upang ang isang kasal ay maituring na walang bisa (void ab initio). Ngunit nakasaad sa Artikulo 34 ng Family Code of the Philippines ang isang pagkakataon kung saan kahit walang marriage license ay maaari pa ring maging lehitimo at may bisa ang isang kasal. Sa nasabing Artikulo ay nasasaad na:
“Article 34. No license shall be necessary for the marriage of a man and a woman who have lived together as husband and wife for at least five years and without any legal impediment to marry each other. The contracting parties shall state the foregoing facts in an affidavit before any person authorized by law to administer oaths. The solemnizing officer shall also state under oath that he ascertained the qualifications of the contracting parties are found no legal impediment to the marriage.”
Ipinaliwanag ang nasabing probisyon sa kaso na Republic of the Philippines vs. Boots Rodel Aguirre and Alma T. Aguirre, G.R. No. 262653, February 24, 2026, sa panulat ni Honorable Associate Justice Henri Jean Paul B. Inting, kung saan sinabi ng Kataas-taasang Hukuman na:
“For the exception in Article 34 of the Family Code to apply, the following requisites must be met: first, the man and woman must have been living together as husband and wife for at least five years before the marriage; second, the parties must have no legal impediment to marry each other; third, the fact of absence of legal impediment between the parties must be present at the time of marriage; fourth, the parties must execute an affidavit stating that they have lived together for at least five years and are without legal impediment to marry each other; and fifth, the solemnizing officer must execute a sworn statement that he or she had ascertained the qualifications of the parties and that he or she had found no legal impediment to their marriage.”
Sa inyong kalagayan, yamang kayo ay nagsasama na ng higit sa sampung (10) taon ay maaari ninyong gamitin ang nabanggit na probisyon ng batas upang hindi na kumuha ng marriage license kung kayo ay magpapakasal. Kailangan lamang siguraduhin na kayo ay parehas na walang legal na kahadlangan upang magpakasal at sumunod sa proseso na itinakda sa paggawa ng affidavit hinggil dito upang magamit ang nasabing probisyon.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.





Comments