20% discount sa pamasahe ng estudyante mula Lunes hanggang Linggo

ni PAO Chief Persida Rueda-Acosta @Magtanong Kay Attorney | April 28, 2026

Dear Chief Acosta, 

Kasalukuyan akong nasa kolehiyo at may pasok kahit araw ng Sabado. Upang makapunta sa eskwelahan ay kinakailangan kong sumakay ng bus. Ngunit sa maraming pagkakataon na sumasakay ako ng bus kapag Sabado ay sinasabihan ako ng konduktor na diumano ay hindi ako puwedeng humingi ng diskwento dahil araw ng Sabado at wala namang pasok ang karamihan ng mga estudyante. Gusto ko lang pong malaman kung tama po ba ang ginagawa ng konduktor sa akin? — Irish

Dear Irish,

Una sa lahat, alamin muna natin kung sino ang saklaw ng batas kaugnay sa pagbibigay ng diskwento sa mga estudyante. Ayon sa Section 3 ng Republic Act (R.A.) No. 11314, o mas kilala sa tawag na “Student Fare Discount Act”: 

“Section 3. Definition of Terms. -As used in this Act:

1. Student refers to any Filipino citizen currently enrolled in a duly authorized elementary, secondary, technical-vocational, or higher education institution. The term does not include those enrolled in post graduate degree courses and informal short-term courses such as dancing, swimming, music and driving lessons and seminar-type courses;”

Kasunod nito, alamin naman natin ang karapatan na binibigay ng batas sa mga nasabing estudyante, kaugnay ng kanilang pagsakay sa mga pampublikong transportasyon. Ayon sa Section 5 ng R.A. No. 11314: 

 “Section 5. Student Fare Discount Privilege. -A student under this Act shall be entitled to a grant of twenty percent (20%) discount on domestic regular fares, upon personal presentation of their duly issued school identification cards (IDs) or current validated enrollment form, supported by the prescribed government-issued identification document, subject to an appropriate verification mechanism to be provided in the implementing rules and regulations (IRR): Provided, That in the case of air public transportation utilities, the discount shall only apply to the base fare or the price of the ticket before taxes and costs for ancillary services.”

Ayon sa nasabing artikulo, ang mga estudyante na sinasakop ng nasabing batas ay may karapatan sa diskwento na umaabot sa 20% ng pamasahe sa mga pampublikong transportasyon. Ang tanong ngayon ay kung kasama ba ang weekend, o Sabado o Linggo, sa sinasakop ng nasabing karapatan ng mga estudyante. 

Malinaw ang nakasulat sa Section 4 ng R.A. No. 11314 na: 

“Section 4. Coverage. -

The fare discount granted under this Act shall be available during the entire period while the student is enrolled, including weekends and holidays: Provided, That, in a case where a promotional fare, as approved by the concerned regulatory agency, is granted by a public transportation utility operator, the student shall have the option to choose between the promotional fare and the regular fare less the discount as provided under this Act.”

Samakatuwid, kabilang sa saklaw ng batas ang mga araw ng Sabado at Linggo. Sa madaling sabi, ang mga estudyante ay maaari pa ring makinabang sa nasabing diskwento kahit na araw ng Sabado o Linggo, hangga’t siya ay kasalukuyang nag-aaral. 

Kaya naman sa iyong sitwasyon, ang pagbabawal sa iyo ng konduktor na pakinabangan ang 20% na diskwento sa pamasahe ay hindi sang-ayon sa sinasabi ng batas dahil maliwanag na kahit Sabado at Linggo ay maaari pa ring bawasan ng 20% ang pamasahe ng mga estudyante na sumasakay sa pampublikong transportasyon. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.