ni Vinia Vivar - @Frankly Speaking | May 15, 2021
Magiging regular co-host na nga ba si Ai Ai delas Alas ni Willie Revillame sa Wowowin?
Nag-guest si Ai Ai sa programa ni Willie last Tuesday along with Rhian Ramos. Pero ang nakakatuwa, hindi alam ni Comedy Queen na guest din ang impersonator ni Kris Aquino as Krissy na si Jenny Gabriel.
Ani Willie, hindi raw ine-expect ni Ai Ai na iimbitahan din niya si Krissy.
“Enjoy lang, friendship lang, eh,” natatawang sabi ni Willie kay Ai Ai.
Well, hindi naman siguro kaila sa lahat na matagal nang may tampuhan sina Ai Ai at Kris.
“I miss you, friendship,” sabi ni Krissy kay Ai Ai. Sumagot naman ang komedyana, “Yeah, I miss you too, friendship.”
Kung matatandaan ay “friendship” ang tawagan nina Kris at Ai Ai noong bati pa sila.
Tawa nang tawa si Rhian sa dalawa kaya sey ni Ai Ai, “Tawang-tawa siya, ako, parang nalungkot ako.” Pero binawi naman niya agad ito at sinabing nagbibiro lang siya.
Kaya naman dito na seryosong nagsalita si Willie at binigyan ng payo si Ai Ai.
“You know what? Hindi ito ang panahon para kayo magkakaroon ng bitterness, hatred, galit at tampo o selos. Eto ang panahon para tayo magmahalan. Tama?” ani Willie.
Umayon naman si Ai Ai at aniya, “Good vibes!”
Samantala, minsan pa ay sinabi ni Ai Ai na gusto niyang maging co-host sa Wowowin.
Sabi naman ni Willie sa manonood, “Mag-text ho kayo, mag-comment kayo if ever na gusto n’yo si Ai Ai dito, gagawin ko siyang co-host.”