ni Vinia VIvar @Frankly | October 20, 2026
Photo: IG _mccoydeleon
Hindi na rin napigil ng aktor na si McCoy de Leon ang magbigay ng kanyang saloobin tungkol sa pang-iinsultong nararanasan ng mga children with special needs kabilang na ang kanyang kapatid na si Marcus.
Sa kanyang Instagram (IG) account nitong Lunes, October 19, ipinahayag ng aktor kung gaano siya ka-proud sa kanyang younger brother na “Kuya Marcus” kung kanyang tawagin.
“I’m a proud brother of a very loving, kind hearted, and always smiling Kuya Marcus and I will always be proud of him,” aniya.
“I know medyo late na po ako sa usapin na ‘to, but I just want to share something close to my heart,” patuloy niya.
Kung dati raw ay tumatahimik lang siya kapag ginagawang katatawanan ang mga special children, ngayon ay nagdesisyon na si McCoy na magsalita na rin upang ipahayag ang kanyang pagtutol.
“I admit whenever I hear jokes about people on the autism spectrum most of the time I just stay silent. Pero ngayon I realized po that we should never allow these kinds of jokes to become normal. Sana po, maging mas mindful tayo. Their differences should never be turned into jokes or content just for entertainment.
“I’m not usually vocal when it comes to myself, pero pagdating po sa pamilya ko po, ‘di ko kayang manahimik,” saad ng aktor.
Pagtatanggol niya sa kapatid, “Some people may think they don’t contribute much to their families. Pero sa totoo lang po, sometimes they give more than we could ever imagine, even more than what we expect from any family member. And I can proudly say that because we have Kuya Marcus in our family.
“Kuya Marcus is the heart of our family. Mula sa bunso, kapatid hanggang sa parents namin, lahat po kami ay ibinubuhos ang pagmamahal sa kanya. He has taught us patience, understanding, and most importantly, unconditional love.
“‘Di po sila katatawanan. They have feelings, they have beautiful hearts, and they deserve the same love, respect, and understanding as everyone else.
“Sana po, before we make jokes or turn something into content, isipin natin na may pamilyang nagmamahal, nag-aalaga, at handang ipaglaban sila.”
Pakiusap pa niya, “Let’s stop normalizing jokes at the expense of others. What may be entertainment to some is someone’s loved one, someone’s family, and someone’s whole world.”
At ang mensahe ng aktor sa kapatid, “I love you, Kuya Marcus. Kuya will protect you kahit buhay ko pa ang kapalit. I’m forever proud and grateful to be your brother.”
Ilang araw nang mainit na usapin sa social media ang tungkol sa mga PWDs (person with disability) at special children na nagsimula nang insultuhin ng mga podcasters ng Machong Chismisan ang panganay na anak ni Kris Aquino na si Joshua.
Bumuhos ang galit ng mga netizens and celebrities as well at isa-isang nagpahayag ng pagkondena sa mga taong minamaliit ang mga taong may kapansanan.
BUKOD kay McCoy de Leon, nagpahayag din ng matinding saloobin ang TV host na si Valerie Tan tungkol sa panlalait na ginawa kay Joshua Aquino sa Machong Chismisan.
Sa panayam ng entertainment press kay Valerie sa press conference ng kanyang travel show na I Heart PH Season 11, iginiit ng TV host na may mga biro na hindi na dapat ginagawa dahil nagiging offensive at below the belt na ang mga ito.
“‘Yung mga comedian ngayon, they try to push the envelope, but there are jokes na ‘di mo na dapat sabihin because ‘di s’ya joke. Below the belt s’ya, offensive s’ya,” pahayag ng award-winning TV host.
Binigyang-diin din ni Valerie na lahat ng nasa entertainment industry, kabilang ang mga comedians, actors, performers at content creators ay dapat na maging responsable sa kanilang mga sinasabi at inilalabas na content.
“Because your words affect and your words have a ripple effect, especially on a platform like a podcast,” paliwanag niya.
“Dapat alam mo kung ano ‘yung puwede mong i-joke at alam mo ‘yung hindi. Definitely this one, they definitely crossed the line,” mariing pahayag ni Valerie.
Natanong din siya kung sa tingin niya ay dapat na magsampa ng kaso si Kris Aquino laban sa podcast at sa mga hosts nito.
“We all know naman that Ms. Kris has some health issues so I don’t know if she would prefer to do that,” tugon niya.
Dagdag pa niya, “S’yempre, nakaka-stress din naman na mag-file ng case. But, at the same time, if you don’t file a case, how will people learn?”
Pero sa huli ay si Kris lamang daw ang puwedeng magdesisyon tungkol dito.
“It’s really up to Ms. Kris to decide if she wants to file a case. If she does, I think the people will definitely support her. If she doesn’t, I think the people will understand as well. But whether she files the case or not, the people are behind her,” paliwanag niya.
Samantala, excited na si Valerie sa pagbabalik ng kanyang travel show na I Heart PH Season 11, na mapapanood sa GTV tuwing Linggo, 11:30 AM simula October 25.
Sa bagong season, ipagpapatuloy ng programa ang pagtuklas sa iba’t ibang tourist destinations at attractions sa Hong Kong, kabilang ang mga sikat na pasyalan at hidden gems ng lungsod.
Isa sa mga tampok na destinasyon ang Madame Tussauds Hong Kong, kung saan makikita ang wax figures ng ilang Filipino celebrities gaya nina Kathryn Bernardo, Anne Curtis, Manny Pacquiao, Pia Wurtzbach, at Catriona Gray.
Patuloy namang makikipagtulungan ang I Heart PH sa Hong Kong Tourism Board upang maipakita sa mga manonood ang kultura, heritage, creativity at modern lifestyle ng naturang bansa.
