Valdez, namahala uli sa Cool Smashers, Cignal lumakas pa

ni MC / Gerard Arce - @Sports | July 18, 2022

Matapos maharang sa walong puntos sa kanilang laro sa pagbubukas ng torneo kontra PetroGazz, muling bumangon ang kapitan ng Creamline na si Alyssa Valdez sa kanilang straight-set na panalo laban sa PLDT noong Sabado ng gabi sa 2022 Premier Volleyball League (PVL) Invitational Conference.

Nagpaputok ang beteranong open spiker ng 13 puntos — lahat sa mga kill — nang inangkin ng Cool Smashers ang 25-22, 25-16, 25-21 na tagumpay laban sa High Speed ​​Power Hitters.

May 11 digs din si Valdez para tulungan ang Creamline na umangat sa 2-0 sa 2022 Premier Volleyball League (PVL) Invitational Conference. “After the first game, I’m just very thankful na I’m with this team,” ani Valdez.

Ang karaniwang prolific open spiker ay nakakuha lamang ng walong puntos sa apat na set na tagumpay ng Creamline laban sa PetroGazz upang buksan ang kanilang kampanya noong nakaraang linggo. Aminado si Alyssa na pangit ang kanyang naging laro sa opening game.

Ngunit hindi nagtagal at ipinakita nito ang kanyang husay at nakipagtulungan nito kina Jema Galanza at Tots Carlos para palakasin ang Cool Smashers sa panalo kontra PLDT.

Si Carlos, ang MVP ng PVL Open Conference, ay may 17 puntos at nagdagdag si Galanza ng 12 markers nang magrehistro ang Creamline ng 53 kills sa laban.

“Sobrang nakaka-encourage [sila],” ani Valdez sa kanyang teammates at coaches. “After the game, the next day we trained talaga and we just focused on improving, not really focusing on what happened during the match.”

Samantala, hindi naman naging hadlang sa Cignal HD Spikers na wala ang kanilang playmaker upang ihatid ang Cignal HD Spikers sa panalo para sa ikatlong sunod na pagwawagi. Nagpahinga si Gal Cayuna pero nagapi pa rin ang Chery Tiggo sa 25-23, 25-16, 25-18 sa loob lamang ng 1 oras at 30 minuto.

Nanguna para sa panalo si reserve setter Ayel Estrañero, na humalili kay Cayuna at tumapos ng 2 points at 12 excellent sets.