Tuluy-tuloy na pagbangon mula sa pandemya at mga hamon ng panahon!

ni Bong Go - @Bisyo Magserbisyo |November 3, 2021

Sinalubong natin ang Nobyembre nang may pag-asa na unti-unti na nating malalampasan ang pandemya. Ang mga kaso ng COVID-19 ay bumababa na habang ang ating pagbabakuna sa publiko ay tumataas araw-araw.

Nitong Nobyembre 1, 2021 ay nakatanggap tayo ng mahigit 108.9 milyong doses ng mga bakuna. Nakapagbigay na rin tayo ng kabuuang 59.5 milyong doses, kung saan mahigit 32 milyong Pilipino ang nakatanggap ng kanilang unang dose, habang mahigit 27.4 milyon naman ang nabakunahan na nang buo.

Habang patuloy tayong nagsisikap patungo sa pagbangon ng ating ekonomiya, napakahalagang hindi tayo maging kampante sa ngayon. Bagama’t nakikita na natin ang liwanag, importante na malaman na hindi pa tapos ang laban.

Dapat tayong manatiling mapagbantay, sumunod sa mga health protocols, bakunahan ang natitirang populasyon at tiyaking walang Pilipino ang maiiwan sa ating pagbangon bilang isang bansa.

Tandaan, ang bakuna ang susi para bumalik tayo sa normal at mapagtagumpayan ang pandemyang ito. Kaya hinihikayat natin ang lahat ng mga Pilipino na magpabakuna, lalo na’t bukas na ang programa sa buong publiko.

Nasa siyensiya at datos na kapag bakunado, mas maiiwasan ang matinding epekto ng COVID-19. ‘Yan talaga ang ating nais iwasan kapag nagkakasakit tayo. Walang bisa ang bakuna kung hindi natin ito kukunin, kaya huwag tayong matakot para magpabakuna sa pagdating ng oportunidad.

Habang pinoproteksiyunan natin ang buhay ng mga Pilipino, patuloy na ginagawa ng pamahalaan ang lahat upang maibsan ang gutom at mapagaan ang hirap na dinadala ng mamamayan. Importante ang tiyan ng bawat Pilipino. Kapag protektado ang komunidad gamit ang bakuna, mas makapagtatrabaho na rin ang mga tao at sisigla ang kabuhayan ng lahat.

Ayon sa Department of Health, inaprubahan na nila ang pagsu-supply ng booster injections para sa mga priority groups. Kaya nananawagan tayo sa pamahalaan na ayusin na ang plano at maipatupad na agad ayon sa guidelines at supply ng bakuna, lalo na sa pinakamahihirap at pinakanangangailangan.

Hinihikayat natin ang mga kapwa lingkod-bayan na unahin muna ang pagseserbisyo bago ang ibang mga bagay tulad ng kampanya. Darating din ang tamang oras para riyan. Lutasin muna natin ang pandemya at unahin muna ang pagbabakuna bago ang pulitika dahil kung hindi natin malampasan ang krisis, marahil ay wala na tayong pulitikang mapag-uusapan pa.

Palagi nating tandaan na nakasalalay ang kinabukasan ng ating bayan sa patuloy na pakikipagbayanihan at pagmamalasakit sa isa’t isa. Ang ating pagbangon mula sa pandemya at mga hamon ng panahon ang ating pangunahing hangarin bilang mga tagapaglingkod.

Tuloy ang serbisyo. Tuloy ang malasakit. Tuloy ang pagbabagong ating inaasam tungo sa mas komportable at maunlad na buhay para sa lahat. Kayang-kaya natin ito!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.