Mas maagang paghahanda, mas malakas ang atleta

ni Bong Go @Bisyo Magserbisyo | September 11, 2026

Patuloy nating suportahan at ipagdasal ang ating mga atletang Pilipino na buong-pusong lumalaban at itinataas ang ating bandila sa ongoing Asian Games sa Japan. Anuman ang resulta, saludo tayo sa kanilang sakripisyo, dedikasyon at pagmamahal sa bayan.

Naniniwala ako sa kakayahan ng mga Pilipinong manlalaro. Magagaling ang mga players natin at marami sa kanila ay professionals na matagal nang napatunayan ang kanilang kakayahang irepresenta ang bansa. Napakahalaga para sa kanila ang sapat na panahon upang makapag-training at makapaghanda para sa international competitions.

Nalungkot at nanghinayang ang buong bansa matapos ma-eliminate ang Gilas Pilipinas sa 2026 Asian Games, kung saan defending champion pa naman tayo sa men’s basketball. Bilang chairperson ng Senate Committee on Sports, mahalaga para sa akin na malaman kung ano ang nangyari, saan nagkulang ang programa, at kung paano natin ito maaayos.

Sa sesyon ng Senado, iminungkahi ko na magkaroon ang Samahang Basketbol ng Pilipinas (SBP) ng mas malaking pool ng mga manlalaro na maaaring pagpilian ng national team buong taon. Maaaring nasa humigit-kumulang 30 qualified players ang pool upang may sapat na pagpipilian kapag may international tournament.

Kung may player na hindi available dahil sa injury, professional commitments, eligibility requirements o conflict sa schedule, mayroon agad na ibang nakahandang pagpipilian. Hindi tayo dapat limitado sa iilang players lamang at saka pa bubuo ng team kapag malapit na ang torneo. Dapat mas mahaba at mas maaga ang preparation.

Isa rin sa mga nais nating pagtuunan ng pansin ay ang usapin tungkol sa naturalized players. Wala tayong naturalized player sa Asian Games kahit pa minadali natin noon ang pagpasa sa naturalization ng basketball pro na si Bennie Boatwright. Nagkaroon pa nga ng special session sa Senado para rito. Bilang mga senador, ginawa namin ang aming trabaho upang makatulong sa ating national team, kaya nais nating malaman kung bakit hindi nakalaro si Boatwright.

Isang malaking inspirasyon naman, hindi lamang sa mga atleta kundi sa buong bansa, ang ipinakitang patriotism ni Filipina tennis champion Alex Eala. Pinili niyang katawanin ang Pilipinas sa 2026 Asian Games kahit may conflict ito sa kaniyang professional schedule sa Women’s Tennis Association (WTA) para sa China Open sa Beijing.

Dahil kabilang si Alex sa top tennis players sa buong mundo, kailangan niyang lumahok sa WTA tournament o posibleng maharap sa penalties at multa dahil sa nakatakda niyang paglahok sa Asian Games.

Para sa akin, hindi dapat maparusahan ang isang atleta dahil pinili niyang katawanin ang ating bandila at bansa. Pag-aaralan natin ang posibilidad na maghain ng panukalang batas na tutulong sa mga eligible Filipino athletes na gustong mag-try out, mag-training at lumahok para sa national team kapag tinawag silang katawanin ang bansa.

Ang pagrepresenta sa bansa ay isang malaking karangalan at responsibilidad. Bihira lamang ang pagkakataong ito kaya dapat unahin ang interes ng bayan at ng ating kapwa Pilipino sa larangan ng sports.

Samantala, tuloy pa rin ang paghahatid natin serbisyo at tulong sa ating mga kababayan. Noong September 10, personal tayong nagtungo sa Pasay City upang magbigay ng tulong sa 29 na biktima ng sunog, katuwang sina Mayor Emi Calixto at Barangay Captain Virgilio Mabag. Doon, sinuportahan din natin ang mga lokal na nagtitinda ng kwek-kwek, turon, banana cue at carioca. Gaya ng lagi kong paalala sa ating mga kababayan, tangkilikin natin ang sariling atin!

Noong September 11 naman, dumalo tayo sa inauguration at turnover ng Super Health Center sa Maramag, Bukidnon, kasama sina Mayor Atty. Jose Doromal, Vice Mayor John Lester "Jan-Jan" Tan-Malack Tan, at iba pang mga lokal na opisyal. Nagbigay rin tayo ng tulong sa ating mga barangay health workers na mahalagang katuwang sa paghahatid ng serbisyong pangkalusugan sa mga komunidad.

Kinabukasan, September 12, nagtungo tayo sa aking hometown sa Lupon, Davao Oriental upang dumalo sa blessing ng mga bagong bleachers, basketball ring at shot clock ng gym. Pagkatapos nito, dumiretso tayo sa Mati City kung saan tinulungan natin ang 600 indigent residents mula sa iba’t ibang sektor, kabilang ang persons with disabilities, farmers, at mga miyembro ng tricycle operators and drivers' association.

Bilang chairperson ng Senate Committee on Sports, dumalo rin tayo sa Mati City Basketball League Inter-Barangay 2026, kasama si Councilor Paolo Rabat, ang founder ng liga. Patuloy kong sinusuportahan ang mga programang nagbibigay ng pagkakataon sa ating mga kabataan at atleta na mahasa ang kanilang kakayahan sa sports.

Matapos ang mahabang araw sa Davao Oriental, bumalik tayo sa Davao City upang makiisa sa Davao Sportswriters Association Inc. Davao Sports Heroes Night. Dito, kinilala ang mga rising stars sa sports bilang bahagi ng ating hangaring palakasin ang grassroots sports development.

Nagpapasalamat ako sa DSA, sa pangunguna ni President Jon Develos, gayundin kay Leonard Paul Palo ng Southern Sports Digest, sa patuloy nilang pagsuporta sa ating mga atleta at sports programs.

Samantala, noong nakaraang linggo, patuloy din ang ating Malasakit Team sa pag-abot sa mga kababayan nating nangangailangan. Agad silang nagbigay ng tulong sa mga biktima ng sunog sa Surigao City, Butuan City, Cagayan de Oro City, Roxas City, at Hermosa, Bataan.

Dahil sa masamang panahon na tumama sa iba’t ibang bahagi ng bansa, naghatid din ng tulong ang ating Malasakit Team sa mga naapektuhan ng bagyo sa mga bayan ng Mexico, San Luis, Minalin, Sto. Tomas, Guagua, Sasmuan at Macabebe sa Pampanga, gayundin sa Botolan, Cabangan at Subic sa Zambales.

Nagbigay rin ang ating tanggapan ng tulong sa mga scholars mula sa Malabon City; Ipil, Zamboanga Sibugay; at Molave, Zamboanga del Sur.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Bawat Pilipino dapat may maayos na healthcare

ni Bong Go @Bisyo Magserbisyo | September 11, 2026

Bilang isang health reform crusader, patuloy kong isinusulong na mabigyan ng sapat na pondo ang ating sektor ng kalusugan upang mas maraming Pilipino ang makinabang sa mga serbisyong medikal na kailangan nila.

Sa pagdinig ng Senado noong September 4 para sa panukalang 2027 budget ng Department of Health (DOH) at mga attached agencies nito, inihayag natin ang suporta sa kanilang budget proposal. Importante ang budget sa kalusugan dahil investment ito sa ating mga mamamayan. Health is wealth at ang kalusugan ay katumbas ng buhay ng bawat Pilipino.

Kasabay nito, binigyang-diin ko ang pangangailangang mabigyan ng sapat na pondo ang Philippine Health Insurance Corporation (PhilHealth). Napakalayo pa natin sa full implementation ng Republic Act No. 11223 o ang Universal Health Care Act, kung saan layong maibaba nang husto ang out-of-pocket expenses o panggastos mula sa sariling bulsa ng pasyente.

Tulad ng dati na nating ipinaglalaban, nanawagan ako sa PhilHealth na gamitin sa health ng Pilipino ang pondong nakalaan sa health. Hindi negosyo ang PhilHealth kaya’t hindi ito dapat nagkakaroon ng excess funds habang marami pa ring Pilipino ang nagkakasakit, namamatay, at takot na magpa-ospital dahil sa laki ng gastusing medikal.

Bilang resulta ng patuloy nating pagbabantay at pagsusulong ng mas maayos na health benefits, nagpapasalamat tayo sa PhilHealth dahil sa mga ipinatupad na reporma tulad ng itinaas na case rates; dagdag na benefit packages para sa dental services, optometric care at emergency outpatient services; pag-scrap sa Single Period of Confinement rule; at pagpapatigil sa 24-hour confinement requirement. Nilabanan natin ang mga polisiyang illogical, outdated, at anti-poor.

Patuloy ko ring isinusulong ang pagkakaroon ng mas maayos na PhilHealth identification system, na maaari ring maiugnay sa National ID. Mahalaga na alam ng bawat Pilipino na sakop sila ng Universal Health Care at naiintindihan nila ang mga benepisyong maaari nilang makuha.

Magandang balita rin para sa mga pasyenteng nangangailangan ang pagtitiyak ng DOH na tuloy-tuloy ang operasyon ng Malasakit Centers Program. Bilang principal author at sponsor ng Republic Act No. 11463 o ang Malasakit Centers Act of 2019, patuloy nating binabantayan na maisakatuparan nang maayos ang layunin ng batas na gawing mas madali para sa mga mahihirap at indigent patients na makakuha ng tulong medikal mula sa iba’t ibang ahensya ng gobyerno sa ilalim ng isang bubong.

Mahalaga rin na patuloy na suportahan ang Cancer Assistance Fund, pagpapahusay ng mga health facility, pagtatayo at pagpapaunlad ng Regional Specialty Centers, at pagkuha at pagpapanatili ng sapat na healthcare workers. Magkakaugnay ang mga ito sa layunin nating gawing mas accessible at abot-kaya ang serbisyong pangkalusugan.

Dasal ko na dumating tayo sa puntong hindi takot ang Pilipinong magpa-ospital dahil iniisip niya agad kung saan kukuha ng pambayad. Bilang inyong senador, magtatrabaho ako sa abot ng aking makakaya para mailapit sa Pilipino ang mas maayos na serbisyong medikal.

Patuloy rin ang ating Malasakit Team sa paghahatid ng tulong sa ating mga kababayang nangangailangan. Natulungan nila ang mga pamilyang naapektuhan ng habagat sa Hagonoy, Bulacan; La Trinidad, Atok, Tublay, at Buguias sa Benguet; Minalin, Sto. Tomas, Mexico at San Luis sa Pampanga; at Cabangan at Subic sa Zambales.

Tinulungan din natin ang mga nasunugan sa Cagayan de Oro City at Surigao City. Nakatanggap din ng tulong mula sa ating Malasakit Team ang mga indigent na residente ng Batuan, Masbate, katuwang ang lokal na pamahalaan.

Nitong September 6 rin ay dumalo tayo sa opening ceremony ng UNTV Cup Executive Face-Off Basketball League sa San Juan City. Nagpapasalamat tayo kay Kuya Daniel Razon at sa lahat ng organizers. Matapos ang opening ceremony ay masaya akong nakapaglaro kasama ang aking mga teammates sa Senate Sentinels.

Bilang Mr. Malasakit, patuloy kong isinusulong ang mga programa at panukalang batas na makatutulong sa pagpapabuti ng buhay ng ating mga kapwa Pilipino, lalo na pagdating sa kalusugan. Bukas ang aking opisina at patuloy akong tutulong at magseserbisyo sa abot ng aking makakaya, dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Gamitin nang tama ang pondo para sa mga apektado ng baha

ni Bong Go @Bisyo Magserbisyo | September 4, 2026

Patuloy po nating ipinagdarasal ang milyun-milyong mga kapwa nating Pilipino na lubos na pinahihirapan ng malawakang pagbaha. Dasal ko po na makabalik na sa normal ang buhay ng mga Pilipino.

Nitong mga nakaraang araw, personal nating pinuntahan ang mga lugar na lubog pa rin sa baha para kumustahin ang ating mga kababayan. Lagi kong sinasabi na baha, bagyo, o anumang kalamidad ay pupuntahan ko basta’t kaya ng aking katawan at oras para maghatid ng kaunting tulong sa abot ng aking makakaya. Kaya bukod sa mga trabaho sa Senado, hindi ko rin matiis na nasa opisina lang habang maraming kababayan natin ang nangangailangan ng tulong.

Noong August 27, matapos ang halos dalawang oras na pagbiyahe sa mga kalsadang lubog sa baha, dumaan tayo sa mga bayan ng Macabebe, Apalit, at San Simon kung saan personal nating nakita kung gaano kalalim ang baha. Doon, nagbigay rin tayo ng tulong sa mga residenteng nakita nating patuloy na nagsisikap na maitawid ang pang-araw-araw na pangangailangan sa kabila ng kanilang sitwasyon. Pagkatapos nito, nakarating tayo sa Masantol, Pampanga, kung saan tinulungan natin ang 750 biktima sa pakikipag-ugnayan kay Mayor Dan Guintu. Sabi ko nga, hindi ko na malaman kung alin ang kalsada at alin ang dagat habang binabagtas ang daan sa mga nabahang bayan sa Pampanga dahil sa taas ng tubig.

Bumisita at nagbigay-tulong din tayo sa mga pamilyang naapektuhan ng baha dulot ng habagat sa Brgy. Tatalon, Quezon City nitong August 31. Kasama ang aking Malasakit Team, naging katuwang natin sa pagtulong sina Congressman Bong Suntay, Brgy. Captain Emmanuel del Mundo at iba pang lokal na opisyal.

Pagkatapos ay dumiretso tayo sa Calumpit, Bulacan na kahit matindi ang pagbaha, sumuong tayo at naghatid ng tulong sa humigit-kumulang na 400 residente mula sa Brgy. Sapang Bayan. 

Kuwento naman ng ilang residenteng nakasalubong ko mula sa Brgy. Pio Cruzcosa, halos isang buwan na raw ang baha sa kanilang lugar. Kaya naman, bukod sa ilang naipamahaging grocery packs sa kanila, binalikan ng ating Malasakit Team ang mga residente para magpaabot ng dagdag na 1,000 grocery packs. 

Patuloy ang ating panawagan sa national government na puntahan ang mga lugar na tinamaan ng kalamidad para malaman ang tunay na paghihirap ng ating mga kababayan. Nakikiusap din ako na unahing tulungan ang mga mahihirap. 

Ang perang galing sa taumbayan ay dapat gamitin sa tama at para sa mga proyektong talagang kailangan ng mga komunidad, lalo na sa mga lugar na paulit-ulit na binabaha. Hindi dapat masayang ang pondo dahil sa korapsyon. Sa halip na gamitin sa ghost at palpak na flood control projects, maaari sanang magamit ang pondong ito sa mga evacuation centers, health centers, at iba pang serbisyong direktang makatutulong sa ating mga kababayan.

Bilang principal author at co-sponsor ng Republic Act No. 12076, o ang Ligtas Pinoy Centers Act, patuloy nating ipinapanawagan ang full implementation ng batas para sa pagtatayo ng mga permanenteng evacuation center. Patuloy nating isinusulong din ang Senate Bill No. 173, na naglalayong magtatag ng Department of Disaster Resilience upang mapalakas ang paghahanda, pagtugon at pagbangon ng bansa mula sa mga sakuna. Ipaglalaban din natin ang Senate Bill No. 669, o ang proposed Hazard Pay for Disaster Personnel Act, na layong mabigyan ng hazard pay ang disaster response personnel na ipinapadala sa mga lugar na may emergency at kalamidad.

Samantala, patuloy lang ang paghahatid natin ng iba pang serbisyo sa ating mga kapwa Pilipino. Noong August 24, personal nating tinulungan ang 221 biktima ng sunog sa Pasay City.

Noong August 28 naman, nagtungo tayo sa Muntinlupa City upang tulungan ang 103 biktima ng sunog sa kabila ng masamang panahon. Pagkatapos nito, bilang Chairperson ng Senate Committee on Sports, dumalo tayo sa Talionis Golf Tour Supremo Cup Awarding and Fellowship sa Dasmariñas City, Cavite, sa pakikipag-ugnayan kay Atty. Fred Lim.

Personal din tayong nakilahok kasama ang mga youth leader at mga advocate sa Gawad Bayani Kabataan National Leadership Summit & Awards noong Sabado, August 29. Hinikayat ko roon ang mga kabataang Pilipino na tingnan ang pamumuno bilang isang responsibilidad na nakabatay sa serbisyo, kakayahan, tapang, at malasakit.

Noong nakaraang mga araw, pinarangalan din tayo bilang Public Servant Awardee sa InCharge Magazine CEO Awards 2026. Tinanggap ng aking representative na si Gani Macatoman ang parangal, sa pakikipag-ugnayan kay InCharge Magazine President Grace Bondad Nicolas. May parangal man o wala, patuloy akong magseserbisyo sa ating mga kababayan.

Marami ring kababayan natin ang naapektuhan ng habagat sa iba’t ibang bahagi ng bansa ang natulungan ng ating team, kabilang ang mga nasa Nampicuan, Nueva Ecija; Paombong, Guiguinto, at Malolos City sa Bulacan; Biñan City, Laguna; Minalin at Macabebe sa Pampanga; at Agno at Calasiao sa Pangasinan.

Bukod dito, may mga biktima rin ng sunog na natulungan natin mula sa Cagayan de Oro City, Davao City, gayundin sa Balingasag at Gingoog City sa probinsya ng Misamis Oriental.

Dumalo rin ang ating Malasakit Team, bilang kinatawan natin, sa turnover ng bagong Super Health Center sa Santa Catalina, Negros Occidental.

Bilang Mr. Malasakit, sisikapin kong manatiling bukas ang aking opisina sa mga hinaing at pangangailangan ng ating mga kababayan. Patuloy din nating isusulong ang pagpapatupad ng ating mga batas upang mapabuti ang kapakanan ng bawat Pilipino. Bisyo ko ang magserbisyo at naniniwala ako na ang serbisyo sa tao ay serbisyo sa Diyos. 

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.