Pinahabang validity ng pasaporte at lisensya, malaking ginhawa sa Pinoy

ni Bong Go @Bisyo Magserbisyo | August 7, 2026

Noong August 2, ginunita natin ang anibersaryo ng dalawang mahalagang repormang ipinatupad sa panahon ni dating Pangulong Rodrigo Duterte. Siyam na taon na ang nakalipas mula nang lagdaan niya ang mga batas na nagpalawig sa bisa ng Philippine passport at driver’s license.

Sa ilalim ng Republic Act No. 10928, naging sampung taon mula sa dating limang taon ang bisa ng regular na pasaporte para sa mga Pilipinong 18 taong gulang pataas. Sa Republic Act No. 10930 naman, pinalawig mula tatlo hanggang limang taon ang pangkalahatang bisa ng driver’s license. Maaari rin itong ma-extend hanggang sampung taon kung maganda ang record ng may-ari ng lisensya.

Maganda ang naging pagtanggap ng publiko sa mga repormang ito dahil direktang nabawasan ang gastos at abala ng ating mga kababayan. Hindi na nila kailangan ang mas madalas na pagbabayad ng renewal fee, paghahanda ng mga dokumento, pagkuha ng appointment, pagbiyahe patungo sa mga tanggapan, at pagliban sa trabaho.

Para sa ating mga overseas Filipino worker (OFW) na madalas lumabas ng bansa, malaking ginhawa ang sampung taong bisa ng pasaporte. Nabawasan ang pagkaantala sa pag-aasikaso ng mga dokumento para sa trabaho, paglalakbay, o paninirahan sa ibang bansa.

Huwag nating pahirapan ang mga Pilipino kung maaari namang gawing mas mahaba ang validity nang hindi isinasakripisyo ang seguridad at kalidad ng serbisyo. Pera ng taumbayan ang ginagamit sa pagpapatakbo ng gobyerno. Nararapat lamang na maayos, mabilis, at convenient para sa kanila ang serbisyong kanilang natatanggap.

Ito rin ang prinsipyong nais kong ipagpatuloy sa Senate Bill No. 2326, na inihain ko noong July 15. Layunin nitong palawigin mula tatlo hanggang limang taon ang bisa ng mga Professional Identification Card na inilalabas ng Professional Regulation Commission (PRC).

Layunin ng panukalang ito na gawing mas magaan ang proseso para sa ating mga propesyonal.

Ang serbisyo ng gobyerno ay dapat nakatuon sa kapakanan ng tao. Dapat protektado ang seguridad at pagiging maaasahan ng mga opisyal na dokumento, ngunit kailangan ding maging makatwiran ang proseso at panahon ng pag-renew.

Umaasa ako sa suporta ng aking mga kapwa mambabatas para sa panukalang limang taong validity ng mga PRC ID. Ipinakita na ng positibong tugon sa mas mahabang validity ng pasaporte at lisensya sa pagmamaneho na pinahahalagahan ng mga Pilipino ang mga repormang direktang nagpapagaan sa kanilang buhay.

Samantala, personal tayong bumisita sa Davao Oriental noong August 1 upang dumalo sa Inauguration Ceremony ng Davao Oriental State University Lupon Extension Campus.

Matapos nito, nagtungo tayo sa Barangay Tibanban, Governor Generoso sa parehong lalawigan, kung saan personal tayong nagpaabot ng tulong sa mga pamilyang naapektuhan ng sunog. Nagbigay rin tayo ng financial assistance sa humigit-kumulang 800 benepisyaryo mula sa mga mahihirap na sektor, kabilang ang mga kababaihan, miyembro ng mga religious organizations, at mga barangay functionaries.

Sa parehong araw, naging panauhin din tayo sa pagdiriwang ng ika-78 Founding Anniversary ng Governor Generoso at sa State of the Municipal Address ni Mayor Juanito “Kulot” Inojales. Ipinaabot din natin ang pagbati at pagkilala sa mga lokal na opisyal ng bayan para sa kanilang patuloy na paglilingkod sa kanilang mga nasasakupan.

Samantala, noong nakaraang linggo, naghatid din ng karagdagang tulong ang ating Malasakit Team sa mga nangangailangang mga kababayan natin. Agad nating tinulungan ang mga nasunugan sa Pasay City, Caloocan City, Valenzuela City, Muntinlupa City, Cebu City, at Anilao sa Iloilo. 

Nagpaabot din ang ating Malasakit Team ng tulong sa mga naulilang pamilya nina Aron Ontong, estudyanteng mula sa Las Piñas City na nasaksak ng kanyang kaklase. Nakikiisa tayo sa kanilang mga mahal sa buhay sa gitna ng mabigat na panahong ito. Naniniwala ako na nararapat lamang na magkaroon ng kapanatagan ang bawat Pilipino.

Naghatid din ng suporta ang ating Malasakit Team sa mga nagsitapos sa technical-vocational scholarship programs sa Paranas, Samar. 

Nakiisa rin ang ating Malasakit Team sa turnover ng Super Health Center sa Balo-i, Lanao del Sur at naghatid din tayo ng grocery packs para sa ating mga barangay health workers.

Bilang Mr. Malasakit, isang malaking karangalan para sa akin ang tiwalang ibinigay ng sambayanang Pilipino. Patuloy lang akong magseserbisyo sa abot ng aking makakaya. Bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Tiyaking mailalapit sa Pilipino ang serbisyong medical

ni Bong Go @Bisyo Magserbisyo | July 30, 2026

Mahalagang balita para sa ating mga kababayan ang patuloy na pagpapalawak ng regional specialty centers at medical scholarship programs na binanggit ng Pangulo sa kanyang State of the Nation Address noong July 27. Makakatulong ang mga programang ito upang mas lalong mailapit ang de-kalidad na serbisyong medikal sa mga lalawigan at madagdagan ang mga health professional na naglilingkod sa ating mga pampublikong ospital.

Bilang isang health reforms crusader, matagal ko nang isinusulong na hindi dapat nakabase sa tirahan o kakayahang pinansyal ng isang tao ang kanyang pagkakataong magpagamot.

Marami sa ating mga kababayan sa probinsya ang kailangang bumiyahe nang malayo para lamang magpagamot sa sakit sa puso, cancer, kidney disease at iba pang malubhang karamdaman. Bukod sa pagpapagamot, kailangan pa nilang gumastos sa pamasahe, pagkain at matutuluyan. Dagdag na pasanin ito sa mga pasyente at kanilang pamilya.

Kaya patuloy kong sinusuportahan ang pagtatayo at pagpapalakas ng mga specialty center sa iba’t ibang rehiyon. Layunin natin na hindi na kailangang lumuwas pa sa Metro Manila ang mga pasyente para lamang makatanggap ng specialized medical care.

Ako ang principal sponsor at isa sa mga may-akda ng Republic Act No. 11959 o ang Regional Specialty Centers Act. Sa ilalim ng batas na ito, magtatatag ng mga regional specialty center sa mga kasalukuyang regional hospital ng Department of Health (DOH).

Layunin ng batas na mapalawak ang access sa mataas na antas ng gamutan para sa cancer, cardiovascular diseases, kidney ailments, neurological disorders at iba pang seryosong kondisyon. Makakatulong din ito upang mabawasan ang siksikan sa malalaking ospital sa Metro Manila.

Hindi sapat na magkaroon lamang ng gusali o pangalan ang isang specialty center. Kailangang mayroon itong sapat na specialized at modernong kagamitan, gamot at pondong kailangan upang tuloy-tuloy na mapagsilbihan ang mga pasyente.

Maraming kabataang Pilipino ang may kakayahan at pangarap na maging doktor o health professional ngunit kapos sa perang kailangan para sa kanilang pag-aaral. Sa pamamagitan ng medical scholarships, nabibigyan natin sila ng pagkakataong makapagtapos habang nadaragdagan din ang mga propesyonal na maaaring maglingkod sa ating mga ospital at komunidad. Iniulat na mahigit doble na ang bilang ng mga medical scholar na inaasahang maglilingkod sa mga pampublikong ospital matapos ang kanilang pag-aaral at pagsasanay.

Hindi rin dapat matapos ang suporta sa pagbibigay lamang ng scholarship. Pagkatapos nilang mag-aral, kailangan nila ng maayos na trabaho, sapat na sahod at benepisyo, ligtas na kondisyon sa paglilingkod at pagkakataong mapalawak ang kanilang kaalaman at kasanayan.

Kailangan din nating palakasin ang mga insentibo para sa mga doktor, nurse, medical technologist at iba pang health worker na handang maglingkod sa geographically isolated and disadvantaged areas. Kabilang dito ang sapat na kompensasyon, housing assistance, hazard pay, karagdagang training at maayos na oportunidad para sa career advancement.

Nananawagan ako sa national government na bigyang-prayoridad ang sapat na pagpopondo at maayos na pagpapatupad ng mga programang ito. Bilang inyong senador, patuloy kong babantayan na ang mga specialty center, medical scholarship at suporta para sa ating health workers ay tunay na mapakinabangan ng mga Pilipino, lalo na ng mga nasa malalayong komunidad.

Samantala, noong July 21, personal nating binisita ang ating mga kababayang naapektuhan ng mga insidente ng sunog sa Barangay 163 at Barangay 152 sa Tondo, Maynila.

Noong July 23, inanyayahan tayo ni Rotary Club Membership Director Wilbert Loa na dumalo sa ika-48 Induction Ceremonies ng Rotary Club Downtown Manila sa Quezon City. Binati ko ang mga bagong opisyal at miyembro ng samahan, sa pangunguna ni President Arlene Jane Tanchay, sa kanilang pormal na pagtanggap sa responsibilidad na pamunuan ang club sa panibagong taon ng bolunterismo, pagpapaunlad ng komunidad, at serbisyong makatao.

Bilang Vice Chairperson ng Senate Committee on Health, nakiisa tayo noong July 24 sa pagdiriwang ng ika-55 anibersaryo ng Davao Oriental Provincial Medical Center at sa turnover ng mga bagong medical equipment na donasyon ng Okada Foundation.

Pagkatapos nito, nagtungo tayo sa turnover ceremony ng Super Health Center sa Barangay Central, Mati City, na sinundan ng pamamahagi ng tulong sa mga solo parent, persons with disabilities (PWDs), senior citizens, at mga miyembro ng transport sector, partikular ang TODA, sa lungsod.

Bilang tubong Lupon sa Davao Oriental, nagpaabot din tayo ng tulong sa ating mga kababayang nangangailangan, partikular sa mga solo parent, PWDs, at senior citizens. Masaya rin nating ibinabalita na mayroon nang mobile clinic sa Lupon, at nagpapasalamat rin tayo sa Okada Foundation sa donasyon na ito.

Pagkatapos nito, bilang Chairperson ng Senate Committee on Sports, dumalo rin tayo sa pagbubukas ng Inter-Barangay Basketball and Volleyball League sa Lupon. Tulad ng lagi kong paalala sa ating mga kabataan: get into sports, stay away from illegal drugs to keep us healthy and fit!

Noong July 25, dumalo tayo sa National Assembly ng Partido Demokratiko Pilipino–Lakas ng Bayan o PDP-Laban sa Davao City. Nahalal ang mga bagong pambansang opisyal ng partido sa pangunguna ni Mayor Sebastian “Baste” Duterte bilang Party President.

Nitong July 29 naman ay personal din tayo naghatid ng tulong sa mga nasunugan sa Brgy. 61, Brgy. 66 at Brgy. 138 sa Pasay City. 

Samantala, nagpaabot ang ating Malasakit Team ng suporta sa mga pamilyang naapektuhan ng sunog sa Muntinlupa City; Caloocan City; at Puerto Princesa City, Palawan. Gayundin ang mga naapektuhan ng landslide sa Calamba City, Laguna; Davao City; at Mati City.

Nagpaabot din tayo ng tulong sa mga indigent residents sa Cebu City sa pakikipagtulungan ng kanilang lokal na pamahalaan at ng pambansang pamahalaan. Bukod dito, nagbigay rin tayo ng tulong sa mga pamilyang naapektuhan ng Bagyong Inday sa Tubungan, Iloilo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Batas para sa maginhawang buhay ng mga Pinoy

ni Bong Go @Bisyo Magserbisyo | July 24, 2026

Patuloy kong isinusulong sa Senado ang mga panukalang makatutulong sa pang-araw-araw na buhay ng ating mga kababayan. Noong Hulyo 15, naghain ako ng panibagong mga panukalang batas na nakatuon sa modernisasyon ng serbisyo ng gobyerno, imprastruktura, edukasyon, kalusugan, at seguridad sa pagkain.

Kabilang dito ang Senate Bill No. (SBN) 2330, na naglalayong maglatag ng komprehensibong legal na balangkas para sa mas malawak, maayos, at magkakaugnay na paggamit ng digital payment systems sa mga transaksyon ng gobyerno at negosyo. Sa pamamagitan nito kapag naisabatas, nais nating gawing mas mabilis at mas maginhawa ang pagbabayad at pagtanggap ng serbisyo.

Inihain ko rin ang SBN 2326 upang gawing limang taon ang bisa ng Professional Identification Cards. Kung maisasabatas, makababawas ito sa gastos, oras, at abala ng mga propesyonal na kailangang regular na mag-renew ng kanilang mga lisensya.

Layunin naman ng SBN 2329 na palawigin ang saklaw ng estate tax amnesty sa ilalim ng Republic Act No. (RA) 11213. Saklaw ng panukala ang mga ari-arian ng mga namatay noon ang Disyembre 31, 2024, na may hindi pa nababayarang estate tax. Mahalagang mabigyan ng pagkakataon ang mga pamilya na maayos ang kanilang obligasyon nang hindi lalo pang nahihirapan.

Bilang galing ng Davao Oriental at adopted son ng Mati City, alam ko ang kahalagahan ng maayos na paliparan sa pag-unlad ng mga lalawigan. Kaya inihain ko ang SBN 2325, na naglalayong italaga ang Mati Airport bilang opisyal na alternate airport ng Davao International Airport. Makakatulong ito sa pagpapalakas ng koneksyon, turismo, kalakalan, at paghahanda sa mga pagkakataong hindi magamit ang pangunahing paliparan.

Isinusulong din natin ang mas maayos at pangmatagalang pagpaplano ng imprastruktura sa pamamagitan ng SBN 2331, o ang Masterplan for Infrastructure and National Development (MIND) Bill. Layunin nitong magkaroon ng koordinasyon at tuluy-tuloy na direksyon sa pagtatayo ng mga pangunahing proyekto para sa kinabukasan ng ating bansa.

Bilang Chairman ng Senate Committee on Youth, patuloy kong inuuna ang kapakanan at kinabukasan ng kabataan. Sa SBN 2327, isinusulong natin ang pag-convert sa Cotabato Foundation College of Science and Technology sa Arakan, Cotabato, bilang isang state university. Layunin nitong mapalawak ang access sa dekalidad na edukasyon para sa mga estudyante sa Cotabato at mga kalapit na lugar.

Inihain ko rin ang SBN 2332 upang maisama sa basic education curriculum ang pag-aaral ng Saligang Batas ng Pilipinas. Mahalaga na maagang maunawaan ng kabataan ang kanilang mga karapatan, tungkulin, at papel bilang mamamayan.

Bilang Vice Chairman ng Senate Committee on Health at isang health reforms crusader, patuloy kong isinusulong ang mas maayos at mas abot-kayang serbisyong medikal. Sa ilalim ng SBN 2324, layunin nating i-upgrade ang Roxas Memorial Provincial Hospital sa Barangay Lanot, Roxas City, bilang isang Level III general hospital na tatawaging Capiz Medical Center.

Inihain ko rin ang SBN 2333 upang gawing mas propesyonal at maayos ang propesyon ng mga sanitarians. Mahalaga ang kanilang tungkulin sa pagpapanatili ng kalinisan, kaligtasan, at pampublikong kalusugan sa ating mga komunidad.

Kasama rin sa mga panukala ang SBN 2328, o ang Food Waste Reduction and Prevention Act. Layunin nitong maiwasan ang pag-aaksaya ng pagkain at isulong ang maayos na pagre-recycle at pamamahagi ng mga sobrang pagkain na maaari pang mapakinabangan.

Ang mga panukalang ito ay nakatuon sa mga konkretong pangangailangan ng ating mga kababayan. Patuloy akong magsisikap na makapaghain at makapagsulong ng mga batas na maglalapit ng serbisyo sa tao, magpapagaan sa kanilang buhay, at magbibigay ng mas maraming oportunidad, lalo na sa mahihirap, nangangailangan, at walang ibang malalapitan.

Samantala, personal akong pumunta sa mga kababayan nating nasunugan sa Brgy. 145 at Brgy. 163, Tondo, Manila, upang mamahagi ng tulong sa kanila. Nakasama ko sa aking pagbisita si Brgy. 163 Chairwoman Baby Gutierrez.

Personal din akong dumalo sa Romblon Sangguniang Kabataan Congress 2026 upang makapagbahagi ng mensahe at personal na makasama ang ating mga kabataang lider, ilang vice mayors at board members ng probinsya. Bilang Chairman ng Senate Committee on Youth, patuloy kong hinihikayat ang ating SK na mamuno nang may integridad, malasakit, at dedikasyon sa serbisyo.

Samantala, noong nakaraang linggo, agad na naghatid ng karagdagang tulong ang Malasakit Team natin sa mga nasunugan sa Malabon City, Valenzuela City, at Pasig City. Nagbigay rin tayo ng tulong sa mga pamilyang naapektuhan ng bagyo sa Jose Abad Santos, Davao Occidental.

Tinulungan din ng Malasakit Team natin ang naulilang pamilya ng mga pinaslang na motorcycle taxi rider na sina Fabio Norberte Jr. at Ren Ren De Laviga. Nagpaabot tayo ng suporta sa kanilang mga mahal sa buhay sa gitna ng mahirap na panahong ito. Naniniwala ako na ang bawat Pilipino ay nararapat magkaroon ng kapanatagan ng loob. Dapat ligtas tayong nakalalakad sa mga lansangan, namumuhay nang payapa, at naghahanapbuhay nang marangal nang walang pangamba. Dapat nating patuloy na protektahan ang buhay at kapakanan ng mga ordinaryong Pilipino na nais lamang maghanapbuhay para sa kanilang pamilya at mamuhay nang may dignidad.

Nagbigay rin ang aking opisina ng financial assistance, grocery packs, at iba pang tulong sa dalawang naulilang pamilyang naapektuhan ng landslide sa Barangay Poblacion, Malapatan, Sarangani Province. Sampung katao ang nasawi sa trahedya, kabilang ang mga miyembro ng pamilyang Maladian at Yaton, matapos matabunan ng landslide ang dalawang bahay.

Tinulungan din ng ating team ang mga kapuspalad na nasunugan sa pakikipag-ugnayan sa lokal na pamahalaan ng Davao City. Nagpaabot din ng suporta ang Malasakit Team natin sa mga nagtapos ng technical-vocational scholarship programs sa Daet, Camarines Norte; Sariaya, Quezon; at San Fernando City, Pampanga.

Bilang Mr. Malasakit, lubos kong pinahahalagahan ang tiwalang ibinigay sa akin ng sambayanang Pilipino. Patuloy kong gagawin ang aking makakaya upang maisulong ang mas marami pang batas na makatutulong sa ating mga kapwa Pilipino hanggang sa mga susunod na henerasyon. Bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.