Dagdag-singil sa passport, dagdag-pasakit sa OFWs

ni Bong Go @Bisyo Magserbisyo | September 24, 2026

Personal nating dinaluhan ang 2027 budget hearing ng Department of Migrant Workers (DMW). Binigyang-diin ko ang isang mahalagang bagay: dapat sapat ang pondo para maprotektahan at matulungan ang ating overseas Filipino workers (OFWs), lalo na kapag may emergency, kaguluhan, o iba pang problema sa ibang bansa.

Malaki ang sakripisyo ng ating mga OFW. Malayo sila sa kanilang pamilya para makapagtrabaho at makapagbigay ng mas maayos na buhay sa kanilang mga mahal sa buhay. Kaya tungkulin ng pamahalaan na tiyaking may matatakbuhan ang ating OFWs at may sapat na pondo ang gobyerno para sa kapakanan ng migrant workers.

Nagpasalamat din ako sa mga kawani ng DMW, Overseas Workers Welfare Administration (OWWA), at ng iba pa nitong attached agencies. Hindi ko nakakalimutan ang ginawa nila noong panahon ng pandemya, tulad na lamang ng OWWA na umalalay sa ating mga OFWs na nangailangan ng tulong. Bukod d’yan ay marami ring kawani ng gobyerno ang halos walang pahinga at 24/7 nakaantabay para asikasuhin ang mga OFWs o modern-day heroes nating kailangang makauwi o humingi ng tulong.

Nilikha ang DMW sa ilalim ng Republic Act No. 11641 o Department of Migrant Workers Act noong administrasyon ni dating Pangulong Rodrigo Duterte. Pinagsama sa isang departamento ang iba’t ibang tungkulin ng gobyerno para sa overseas employment at kapakanan ng migrant workers. Kabilang din sa batas ang pagtatatag ng Migrant Workers Offices (MWOs) sa ibang bansa at ng Agarang Kalinga at Saklolo para sa mga OFW na Nangangailangan (AKSYON) Fund para sa legal at iba pang tulong sa mga OFW na nangangailangan. Mahalaga rin ang OWWA sa patuloy nitong papel sa pagbibigay ng welfare programs at iba pang serbisyo para sa ating OFWs at kanilang mga pamilya.

Ngayong maraming bansa ang nakararanas ng krisis, lalo na sa West Asia, dapat ay may sapat na suporta para sa ating OFWs na naiipit sa conflict areas. Kaya nga ang lagi kong panawagan sa DMW, OWWA, Department of Foreign Affairs, at sa iba pang concerned government agencies, dapat bukas ang kanilang mga opisina para sa mga OFWs sa panahon na kailangan nila ng tulong lalo na’t malayo sila sa ating bansa. 

Isa rin sa mga concern na inilapit sa akin ay ang pangangailangan ng MWO sa Nagoya, Japan. Kamakailan ay nakapunta ako roon at nakausap ko ang ating mga kababayan. Ipinaabot din sa akin ng ating Consul General doon sa Nagoya na si Shirlene Mananquil ang usaping ito. Sa kasalukuyan, may mga serbisyo mula sa MWO-Osaka na umaabot sa Filipino community sa Nagoya at iba pang bahagi ng central Japan.

Mahalaga ring mapanatili ang suporta sa Overseas Filipino Workers Hospital o OFW Hospital sa Pampanga. Dapat patuloy nating tingnan kung paano mapapalakas ang serbisyong medikal para sa ating mga OFW at kanilang pamilya.

Kaya, inihain ko ang Senate Bill No. 414 o OFW Hospital Act of 2025 upang maisabatas at mapalakas ang OFW Hospital. Isinusulong ko rin ang Senate Bill No. 1290 o OFW Ward Act of 2025, na naglalayong magkaroon ng nakalaang ward para sa mga OFW at kanilang dependents sa bawat Department of Health-retained hospital.

Tinalakay rin sa hearing ang plano ng Department of Foreign Affairs at ng official printer and supplier nito na APO Production Unit, Inc. na itaas ang regular Philippine passport fee mula ₱950 patungong ₱1,500. 

Mariin kong tinutulan na dagdagan ang passport fee dahil dagdag-pasakit lamang ito sa ating mga kababayan, lalo na sa ating mga OFW. Nakikiusap ako na huwag nang ipatupad ang ganitong dagdag na gastos. Noong nakapunta ako sa Nagoya, isa rin ito sa mga usap-usapan ng ating mga kababayan doon. Bawat piso at bawat sentimo na kinikita ng ating mga OFW ay mahalaga. Pinaghihirapan nila ang perang ipinapadala sa kanilang pamilya para sa pagkain, pag-aaral ng mga anak, gamot, bahay, at iba pang pang-araw-araw na pangangailangan.

Samantala, pagdating ko sa Nagoya noong September 16, agad kong kinamusta ang mga miyembro ng Team Philippines sa Asian Games. Nais kong malaman kung kumusta sila, paano ang kanilang paghahanda, at kung ano pa ang kanilang mga pangangailangan habang lumalahok sila sa kani-kanilang mga laban. Naniniwala ako na dapat nilang maramdaman ang tunay na malasakit sa panahong ito. Napanood ko rin ang laban ng Alas Pilipinas Women upang personal na maipakita ang ating suporta sa ating national volleyball team.

Kinabukasan, September 17, personal kong pinanood at sinuportahan ang ating women’s basketball at volleyball teams. Congratulations sa Gilas Pilipinas Women sa kanilang 86–58 na panalo kontra Kazakhstan! Saludo rin tayo sa ating football at volleyball teams sa kanilang pagsisikap at sa buong pagmamalaking pagrepresenta sa Pilipinas.

Sa araw ding iyon, ikinatuwa ko rin ang unang panalo ng Philippine Women’s Football Team sa Asian Games matapos nilang talunin ang Hong Kong, 2–0, sa pamamagitan ng mga goal nina Skye Leach at Mallie Ramirez.

Noong September 19, ikinarangal kong personal na masaksihan ang opening ceremony ng 20th Asian Games sa Nagoya. Nakakatuwang makita ang Team Philippines na buong pagmamalaking lumahok sa Parade of Nations kasama ang mga atleta mula sa iba’t ibang bahagi ng Asya.

Samantala, noong September 20, pinanood ko rin ang ating mga atletang Pilipino na lumaban sa wushu at mixed martial arts.

Kasama ang aking mga kapwa mambabatas, patuloy nating palalakasin ang grassroots sports, hahasain ang kakayahan ng ating mga atletang Pilipino, at ibibigay sa kanila ang suporta at pagkakataong nararapat upang maabot nila ang kanilang mga pangarap. Go lang nang Go!

Samantala, noong nakaraang linggo, nagtungo ang ating Malasakit Team sa mga komunidad upang maghatid ng tulong sa ating mga kababayang nangangailangan. Tinulungan nila ang mga nasunugan sa Bislig City, Butuan City, Roxas City, Malabon City at Davao City.

Bilang Mr. Malasakit, patuloy akong magseserbisyo sa ating mga kababayan sa abot ng aking makakaya, lalo na sa pagsusulong ng mga inisyatibong makatutulong upang higit pang mapahusay ang kakayahan at paghahanda ng ating mga atleta. Bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mas maagang paghahanda, mas malakas ang atleta

ni Bong Go @Bisyo Magserbisyo | September 11, 2026

Patuloy nating suportahan at ipagdasal ang ating mga atletang Pilipino na buong-pusong lumalaban at itinataas ang ating bandila sa ongoing Asian Games sa Japan. Anuman ang resulta, saludo tayo sa kanilang sakripisyo, dedikasyon at pagmamahal sa bayan.

Naniniwala ako sa kakayahan ng mga Pilipinong manlalaro. Magagaling ang mga players natin at marami sa kanila ay professionals na matagal nang napatunayan ang kanilang kakayahang irepresenta ang bansa. Napakahalaga para sa kanila ang sapat na panahon upang makapag-training at makapaghanda para sa international competitions.

Nalungkot at nanghinayang ang buong bansa matapos ma-eliminate ang Gilas Pilipinas sa 2026 Asian Games, kung saan defending champion pa naman tayo sa men’s basketball. Bilang chairperson ng Senate Committee on Sports, mahalaga para sa akin na malaman kung ano ang nangyari, saan nagkulang ang programa, at kung paano natin ito maaayos.

Sa sesyon ng Senado, iminungkahi ko na magkaroon ang Samahang Basketbol ng Pilipinas (SBP) ng mas malaking pool ng mga manlalaro na maaaring pagpilian ng national team buong taon. Maaaring nasa humigit-kumulang 30 qualified players ang pool upang may sapat na pagpipilian kapag may international tournament.

Kung may player na hindi available dahil sa injury, professional commitments, eligibility requirements o conflict sa schedule, mayroon agad na ibang nakahandang pagpipilian. Hindi tayo dapat limitado sa iilang players lamang at saka pa bubuo ng team kapag malapit na ang torneo. Dapat mas mahaba at mas maaga ang preparation.

Isa rin sa mga nais nating pagtuunan ng pansin ay ang usapin tungkol sa naturalized players. Wala tayong naturalized player sa Asian Games kahit pa minadali natin noon ang pagpasa sa naturalization ng basketball pro na si Bennie Boatwright. Nagkaroon pa nga ng special session sa Senado para rito. Bilang mga senador, ginawa namin ang aming trabaho upang makatulong sa ating national team, kaya nais nating malaman kung bakit hindi nakalaro si Boatwright.

Isang malaking inspirasyon naman, hindi lamang sa mga atleta kundi sa buong bansa, ang ipinakitang patriotism ni Filipina tennis champion Alex Eala. Pinili niyang katawanin ang Pilipinas sa 2026 Asian Games kahit may conflict ito sa kaniyang professional schedule sa Women’s Tennis Association (WTA) para sa China Open sa Beijing.

Dahil kabilang si Alex sa top tennis players sa buong mundo, kailangan niyang lumahok sa WTA tournament o posibleng maharap sa penalties at multa dahil sa nakatakda niyang paglahok sa Asian Games.

Para sa akin, hindi dapat maparusahan ang isang atleta dahil pinili niyang katawanin ang ating bandila at bansa. Pag-aaralan natin ang posibilidad na maghain ng panukalang batas na tutulong sa mga eligible Filipino athletes na gustong mag-try out, mag-training at lumahok para sa national team kapag tinawag silang katawanin ang bansa.

Ang pagrepresenta sa bansa ay isang malaking karangalan at responsibilidad. Bihira lamang ang pagkakataong ito kaya dapat unahin ang interes ng bayan at ng ating kapwa Pilipino sa larangan ng sports.

Samantala, tuloy pa rin ang paghahatid natin serbisyo at tulong sa ating mga kababayan. Noong September 10, personal tayong nagtungo sa Pasay City upang magbigay ng tulong sa 29 na biktima ng sunog, katuwang sina Mayor Emi Calixto at Barangay Captain Virgilio Mabag. Doon, sinuportahan din natin ang mga lokal na nagtitinda ng kwek-kwek, turon, banana cue at carioca. Gaya ng lagi kong paalala sa ating mga kababayan, tangkilikin natin ang sariling atin!

Noong September 11 naman, dumalo tayo sa inauguration at turnover ng Super Health Center sa Maramag, Bukidnon, kasama sina Mayor Atty. Jose Doromal, Vice Mayor John Lester "Jan-Jan" Tan-Malack Tan, at iba pang mga lokal na opisyal. Nagbigay rin tayo ng tulong sa ating mga barangay health workers na mahalagang katuwang sa paghahatid ng serbisyong pangkalusugan sa mga komunidad.

Kinabukasan, September 12, nagtungo tayo sa aking hometown sa Lupon, Davao Oriental upang dumalo sa blessing ng mga bagong bleachers, basketball ring at shot clock ng gym. Pagkatapos nito, dumiretso tayo sa Mati City kung saan tinulungan natin ang 600 indigent residents mula sa iba’t ibang sektor, kabilang ang persons with disabilities, farmers, at mga miyembro ng tricycle operators and drivers' association.

Bilang chairperson ng Senate Committee on Sports, dumalo rin tayo sa Mati City Basketball League Inter-Barangay 2026, kasama si Councilor Paolo Rabat, ang founder ng liga. Patuloy kong sinusuportahan ang mga programang nagbibigay ng pagkakataon sa ating mga kabataan at atleta na mahasa ang kanilang kakayahan sa sports.

Matapos ang mahabang araw sa Davao Oriental, bumalik tayo sa Davao City upang makiisa sa Davao Sportswriters Association Inc. Davao Sports Heroes Night. Dito, kinilala ang mga rising stars sa sports bilang bahagi ng ating hangaring palakasin ang grassroots sports development.

Nagpapasalamat ako sa DSA, sa pangunguna ni President Jon Develos, gayundin kay Leonard Paul Palo ng Southern Sports Digest, sa patuloy nilang pagsuporta sa ating mga atleta at sports programs.

Samantala, noong nakaraang linggo, patuloy din ang ating Malasakit Team sa pag-abot sa mga kababayan nating nangangailangan. Agad silang nagbigay ng tulong sa mga biktima ng sunog sa Surigao City, Butuan City, Cagayan de Oro City, Roxas City, at Hermosa, Bataan.

Dahil sa masamang panahon na tumama sa iba’t ibang bahagi ng bansa, naghatid din ng tulong ang ating Malasakit Team sa mga naapektuhan ng bagyo sa mga bayan ng Mexico, San Luis, Minalin, Sto. Tomas, Guagua, Sasmuan at Macabebe sa Pampanga, gayundin sa Botolan, Cabangan at Subic sa Zambales.

Nagbigay rin ang ating tanggapan ng tulong sa mga scholars mula sa Malabon City; Ipil, Zamboanga Sibugay; at Molave, Zamboanga del Sur.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Bawat Pilipino dapat may maayos na healthcare

ni Bong Go @Bisyo Magserbisyo | September 11, 2026

Bilang isang health reform crusader, patuloy kong isinusulong na mabigyan ng sapat na pondo ang ating sektor ng kalusugan upang mas maraming Pilipino ang makinabang sa mga serbisyong medikal na kailangan nila.

Sa pagdinig ng Senado noong September 4 para sa panukalang 2027 budget ng Department of Health (DOH) at mga attached agencies nito, inihayag natin ang suporta sa kanilang budget proposal. Importante ang budget sa kalusugan dahil investment ito sa ating mga mamamayan. Health is wealth at ang kalusugan ay katumbas ng buhay ng bawat Pilipino.

Kasabay nito, binigyang-diin ko ang pangangailangang mabigyan ng sapat na pondo ang Philippine Health Insurance Corporation (PhilHealth). Napakalayo pa natin sa full implementation ng Republic Act No. 11223 o ang Universal Health Care Act, kung saan layong maibaba nang husto ang out-of-pocket expenses o panggastos mula sa sariling bulsa ng pasyente.

Tulad ng dati na nating ipinaglalaban, nanawagan ako sa PhilHealth na gamitin sa health ng Pilipino ang pondong nakalaan sa health. Hindi negosyo ang PhilHealth kaya’t hindi ito dapat nagkakaroon ng excess funds habang marami pa ring Pilipino ang nagkakasakit, namamatay, at takot na magpa-ospital dahil sa laki ng gastusing medikal.

Bilang resulta ng patuloy nating pagbabantay at pagsusulong ng mas maayos na health benefits, nagpapasalamat tayo sa PhilHealth dahil sa mga ipinatupad na reporma tulad ng itinaas na case rates; dagdag na benefit packages para sa dental services, optometric care at emergency outpatient services; pag-scrap sa Single Period of Confinement rule; at pagpapatigil sa 24-hour confinement requirement. Nilabanan natin ang mga polisiyang illogical, outdated, at anti-poor.

Patuloy ko ring isinusulong ang pagkakaroon ng mas maayos na PhilHealth identification system, na maaari ring maiugnay sa National ID. Mahalaga na alam ng bawat Pilipino na sakop sila ng Universal Health Care at naiintindihan nila ang mga benepisyong maaari nilang makuha.

Magandang balita rin para sa mga pasyenteng nangangailangan ang pagtitiyak ng DOH na tuloy-tuloy ang operasyon ng Malasakit Centers Program. Bilang principal author at sponsor ng Republic Act No. 11463 o ang Malasakit Centers Act of 2019, patuloy nating binabantayan na maisakatuparan nang maayos ang layunin ng batas na gawing mas madali para sa mga mahihirap at indigent patients na makakuha ng tulong medikal mula sa iba’t ibang ahensya ng gobyerno sa ilalim ng isang bubong.

Mahalaga rin na patuloy na suportahan ang Cancer Assistance Fund, pagpapahusay ng mga health facility, pagtatayo at pagpapaunlad ng Regional Specialty Centers, at pagkuha at pagpapanatili ng sapat na healthcare workers. Magkakaugnay ang mga ito sa layunin nating gawing mas accessible at abot-kaya ang serbisyong pangkalusugan.

Dasal ko na dumating tayo sa puntong hindi takot ang Pilipinong magpa-ospital dahil iniisip niya agad kung saan kukuha ng pambayad. Bilang inyong senador, magtatrabaho ako sa abot ng aking makakaya para mailapit sa Pilipino ang mas maayos na serbisyong medikal.

Patuloy rin ang ating Malasakit Team sa paghahatid ng tulong sa ating mga kababayang nangangailangan. Natulungan nila ang mga pamilyang naapektuhan ng habagat sa Hagonoy, Bulacan; La Trinidad, Atok, Tublay, at Buguias sa Benguet; Minalin, Sto. Tomas, Mexico at San Luis sa Pampanga; at Cabangan at Subic sa Zambales.

Tinulungan din natin ang mga nasunugan sa Cagayan de Oro City at Surigao City. Nakatanggap din ng tulong mula sa ating Malasakit Team ang mga indigent na residente ng Batuan, Masbate, katuwang ang lokal na pamahalaan.

Nitong September 6 rin ay dumalo tayo sa opening ceremony ng UNTV Cup Executive Face-Off Basketball League sa San Juan City. Nagpapasalamat tayo kay Kuya Daniel Razon at sa lahat ng organizers. Matapos ang opening ceremony ay masaya akong nakapaglaro kasama ang aking mga teammates sa Senate Sentinels.

Bilang Mr. Malasakit, patuloy kong isinusulong ang mga programa at panukalang batas na makatutulong sa pagpapabuti ng buhay ng ating mga kapwa Pilipino, lalo na pagdating sa kalusugan. Bukas ang aking opisina at patuloy akong tutulong at magseserbisyo sa abot ng aking makakaya, dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.