Sugarol at mabisyo, walang "K" mag-ampon

ni Atty. Persida Rueda-Acosta - @Magtanong Kay Attorney | August 14, 2021

Dear Chief Acosta,

Sa kasamaang palad, mula noong nakaraang taon ay nalulong sa sugal ang aking asawa. Makakaapekto ba ito sa aming foster family care license kahit may sarili akong trabaho at kayang buhayin ang aming foster child? – Linda

Dear Linda,

Para sa inyong kaalaman, ang batas na nakasasaklaw sa inyong katanungan ay ang Rule 11.4 ng Implementing Rules and Regulations (IRR) ng Republic Act No. 10165, o mas kilala sa tawag na Foster Care Act of 2012 kung saan nakasaad na:

“11.4. Revocation of Foster Family Care License. – The DSWD Field Office shall investigate any report that the placement is detrimental to the Foster Child. It shall revoke the Foster Family Care License upon the recommendation of the Social Worker confirming the existence of any of the following circumstances:

x x x

Manifestation of high risk social behavior of any member of the Foster Family, such as, but not limited to, substance abuse, gambling, alcoholism, and commercial sexual exploitation.” (Binigyang-diin)

Samakatwid, malinaw sa batas na maaaring ma-revoke o bawiin ang foster care license ng pamilya kung base sa imbestigasyon ng Department of Social Welfare and Development (DSWD) ay makakakitaan ang isa sa miyembro nito ng high risk social behavior gaya ng madalasang pagsusugal. Ibig sabihin, maaaring makaapekto ang pagsusugal ng inyong asawa sa inyong foster care license.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.